DILONGYESHA 8

Bileshesho abilongyesha

Mateo 13:34, 35

MU KIKOSO: Longamisha ndongyesho oobe na bileshesho bipelepele abisangasha bantu na abipushisha kalolo myanda i na muulo.

Sangula bileshesho bipelepele. Anka bu Yesu, sangula bintu bipeela bwa kulongyesha myanda ikata, na bintu bibofule bwa kupatuula myanda i bukopo. Leka kutwesha tungi tu myanda tukumbene kukutshishwa bantu kulamiina kileshesho kyobe. Kita bya shi myanda i mu kileshesho kyobe ikale ipushene na dilongyesha dyotusha bwa shi tala byakutshisha bantu kulamiina mwanda wesambila.

Ikala otala. Tala bintu bikwifunyishe, longa mikanda ya ndumbulwilo, na oteemeshe bantu abalongyeshaa kalolo. Nsaa yokitshi byabya, olamiine bileshesho bilombene kulongamisha ndongyesho oobe. Lama bino bileshesho mu mikanda yoobe.
Tuula bantu abakuteemesha mu binangu. Sangula bileshesho bitale midimo na myanda ayisangasha bantu abakuteemesha. Dimuka tala bileshesho byotusha byebakalakasha sunga kwibatapa ku mashimba.
Longyesha mwanda wi na muulo. Bileshesho byobe bikale abisambila myanda i na muulo, kushi tu myanda tushi na muulo. Kita bya shi bantu abakuteemesha tabalaminanga penda kileshesho kibotusha nya kadi balamiine dilongyesha di mwanka.