Bibadi kinyongwa kikata kwi bana bakashi pababadi bapete mu mashama amumweneka bisumanga! Maadiya a ku Mandala bayile lubilo kwi “Simone Mpyeele na ungi mulongi yawa badi mufule Yesu”—Yowano mutumibwa. (Yowano 20:2) Anka, bangi bana bakashi abashadile ku mashama abamwene mwikeyilu. Munda mwa mashama abamwene ungi mwikeyilu badi mufwale “musapi utooka.”—Maako 16:5.

Mwikeyilu umune nkwibalungula shi: “Lekaayi kupusha moo; nawuku’shi anukimbi Yesu [bapudikilwe ku mutshi, NWT]. Tee pano nya mmusangukye, buu bibadi mwakule; fikaayi numone mbalo yeekeele mutuulwe. Ndaayi bukidibukidi, nukalungule balongi baye’shi basanguka ku bafwe na bapu kwinubadidiila mu Ngalileya.” (Mateo 28:5-7) Bu bibabadi na “moo ukata na kusuusakana,” bana bakashi abayile lubilo mu kulungula balongi.—Maako 16:8.

Binobino, Maadiya bapetele Mpyeele na Yowano. Na kupuwakana kooso bebalungula shi: “Mbakatushe Mwanaana mu nyembo, na taatuuku kwabadi bamutuule.” (Yowano 20:2) Mpyeele na Yowano abayile lubilo. Yowano bayile bukidi, aye nkufika kumpala ku mashama. Badi mwilamine mu mashama, aye nkumona bilamba, anka bashadile paasha.

Pabafikile Mpyeele, batwelele mwanka. Aye nkumona kilamba kya kishiika bafwe na kibabadi bapombeleshe Yesu ku mutwe. Akupu Yowano nkutwela n’aye namu, abo nkukumina mukandu wa Maadiya. Sunga bibadi Yesu mwibalungule kumpala, takwi su ngumune bapushishe shi Yesu bapu kusanguka nya. (Mateo 16:21) Na kukaanya kooso, abalukile ku nshibo. Anka Maadiya balukile kunyima ku mashama aye nkushala kwakwa.

Mu yaya nsaa, bangi bana bakashi abadi mwishinda mu kulungula balongi shi Yesu basanguka. Pababadi abende bukidi, Yesu bafumankene nabo, aye nkwibalungula shi: “Neenusemeeyi!” Abaponene ku ngwa yaaye, abo ‘nkwiyela paashi kumpala kwaye.’ Akupu Yesu nkwibalungula shi: “Lekaayi kutshiina. Ndaayi nukawukishe bakwetu balume shi be na kya kwenda ku Ngalileya, kwakwa nkwa bakammwena.”—Mateo 28:9, 10.

Kumpala pabadi nsenga itshinkakane akupu bamwikeyilu nkutuka, basalayi abadi ku mashama “babasuusakeene, mbidi nkwibauma bu bafwe.” Kunyima kwa kupeta binangu, babayile mu kibundji, “mu kuukisha bakata ba ba-tshiite-mwakwidi byooso bibadi bikitshikye.” Batshite mwakwidi abebungile na bakulu ba beena Yuuda. Abatshile kitshibilo kya kutshiba basalayi milomo bwa kufya wawa mwanda na kwakuula shi: “Balondji baye mbafikye bufuku, bamwiba, atwe balaale.”—Mateo 28:4, 11, 13.

Abadi na kya kwipaa basalayi ba bena Looma su balaala pa mbalo ya kulama, nyi bwakinyi batshite mwakwidi abebalayile shi: “Su [abadimbi pabitale kwakula shi bekeele balaale] mwanda wafika ku matwi a mukat’eumbo, nnaatwe abamupoosha, atukitshi mwetu mooso bwa’shi tala beenukalakasha.” (Mateo 28:14) Basalayi abatshile makuta, abo nkwakula bibebalungwile batshite mwakwidi. Wawa mukandu wa kwamba shi abafiki mu kuyiba mbidi ya Yesu ubapalakeene kwi bena Yuuda bebungi.

Maadiya a ku Mandala bashadile na kinyongwa ku mashama. P’aye kwimana pa kibelo na kutala munda, bamwene bamikeyilu babidi bafwale bitooka! Umune mushale pababadi batule mutwe wa Yesu, ungi pabadi ngwa yaaye. Abo nkumwipusha shi: “Mukashi, odidi bwakinyi?” Maadiya nkwibaluula shi: “Babatentula Nfumwa’mi, ntanguku kwinyi kwabadi bamutuule.” P’aye kwialuula, Maadiya bamwene ungi muntu. Aye nkumwipusha dingi nka bu miikeyilu shi: “Mukashi’be, odidi bwakinyi?” Na kunangushena shi badi muntu balamanga ku mashama, Maadiya nkwakula shi: “Mwanaana, su noobe mumutentule, ndungule koodi mumutuule, ami naamu ngyende mu kumwata.”—Yowano 20:13-15.

Yaya nsaa, Maadiya badi esamba na Yesu mupwe kusanguka, anka tabadi amutundula nya. Binobino pabambile shi: “Maadiya!” Baukile shi nyi Yesu, aye nkumutundula muyile bibadi akamba kumwitanyina. Maadiya nkumwitanyina na muloo shi: “Rabuni” (ngi abikyebe kwamba shi: “Mulambukishi”). Na moo wa kwamba shi e kukaamina mwiyilu, Maadiya bamukamine kiipa. Anka Yesu bamulungwile shi: “Tonkumanga nya! Mwanda ntshii mubande kukaamina kwi Yaaya. Obe nda kwi bakwetu, webalungule shi: ‘Naakamina kwi Yaaya, aye mwikale Nsheenu, kwi Efile Mukulu ande, mwikale Efile Mukulu eenu.’”—Yowano 20:16, 17.

Maadiya basuukile aye nkwenda ku mbalo ibadi iibungye batumibwa na bangi balongi. Aye nkwibalungula shi: “Naamono Mwanaana.” Nkwibalungula dingi mwanda ubabadi bapushe kwi bangi bana bakashi. (Yowano 20:18) Yaaya mikandu ‘ibadi ayimweneka bu kubalakana’ kwabadi.—Luka 24:11.

Mu dya lubingo mwifuku dya 16 dya mweshi wa Nisane, balondji abadi babofule mu kinangu. Tabapushanga bwakinyi mashama e kwikala bisumanga kushi kintu nya. (Mateo 28:9, 10; Luka 24:11) Kunyima mu dyadya efuku, Kleopase na bangi balongi abakatukile ku Yelusaleme bwa kwenda ku Emause kubadi bilometre bifikye ku 11.

Pababadi mwishinda, abadi abesamba bwa bibadi bikitshikye. Akupu ungi muntu bebabangile mwishinda. Yawa muntu bebayipwishe shi: “Myanda kinyi yanwilungusheena mwishinda?” Kleopase nkwalula shi: “We bupenka mushaale mu Yelusaleme, shyaawuku kiimukitshikye ano mafuku!” Yawa muntu nkwipusha shi: “Kinyi kyaakya?”—Luka 24:17-19.

Abo nkwalula shi: “Mwanda wa Yesu a mu Nazarete. . . . Tubadi atukulupila shi aye nyi akakuula Isaleele.”​—Luka 24:19-21.

Kleopase na benaye nkubanga kumupatulwila bibadi bikitshikye kubanga dyady’efuku. Abo nkumulungula shi bangi bana bakashi bekele bende ku mashama a Yesu abo nkwiapeta bisumanga, akupu baba bana bakashi nkumona myanda ya kukanya; abamwene miikeyilu ayibalungula shi Yesu e na muwa. Abambile shi bangi abayile namu ku mashama, “babasangeene anka mubadi mwisambile bakashi.”​—Luka 24:24.

Kushi mpaka bano balongi babidi abadi abakanya bwa bibadi bikitshikye. Yawa muntu nkwibalula na matalwa bwa kulumbula mweneno aabo eebubi mu kipaso kibakumine mashimba aabo pa kwibalungula shi: “Anwe bantu bashii na kinangu na ba-sha-mashimba akutwe lukumiino mu byooso bibadi bibwele batemuki patooka! Kidishitu tabadi na kya kufwambuka byaabya, na kutwela mu ntumbo yaaye su?” (Luka 24:25, 26) Aye nkubanga kwibapatulwila kalolo Bifundwe bibungi pabitale Kidishitu.

Nfudilo a byoso, abafikile ku Emause busatu bwabo. Balongi babidi abakimbile kumuteemesha dingi, abo nkumulungula shi: “Shaala neetu, mwanda tatudi kyoolwa, na bufuku tabudi pa kwila.” Badi mukumine kushala nabo, abo nkudya kidiibwa. Pabadi yawa muntu mwele luteko, nkutshokola mukate, akupu nkwibatambika, abadi bamutundule, anka badi mwibashimine. (Luka 24:29-31) Binobino abadi bashinkamishe shi Yesu e na muwa!

Bano balongi babidi abadi belungushene na muloo bwa bibabapusha shi: “Mashimba eetu taekalanga bu aatembe kaalo munda mwetu, pekalanga eesamba neetu mwishinda, naa peetupushishanga Bifundwe su?” (Luka 24:32) Abayile bukidi ku Yelusaleme kubabadi bakapete batumibwa na bangi bantu. Kumpala kwa shi Kleopase na mwinaye bakule bibabamwene, abapushishe bangi bantu abakula shi: “Mbiinyibiinyi, Mwaanana mmusangukye na mmwileshe kwi Simone!” (Luka 24:34) Akupu baba babidi nkulonda bibadi Yesu mwibamwenekyele. Abo namu abadi bemwene.

Binobino boso abatapika ku mashimba—Yesu bebamwekyela mu kadimbo! Ubadi aumweneka bu mwanda wa madimi mwanda abadi bashite biibi bwa kutshina bena Yuuda. Sunga mbyabya Yesu badi mwimane munkatshi mwabo. Aye nkwakula na eyi diikye shi: “Butaale bwikale neenu.” Kadi abakwatshikilwe na moo. Anka bu bibabapushile kumpala, abadi ‘abeele kinangu’shi babamono mukishi.’—Luka 24:36, 37; Mateo 14:25-27.

Bwa kwibashinkamisha shi tabadi bu mukishi sunga bu kingi kintu, Yesu bafwadile mbidi ya mase na musamba, aye nkwibalesha maasa na ngwa yaaye pa kwibalungula shi: “Anusuusakana bwakinyi, dingi bwa kinyi bwanudi na mpaka mu mashimba eenu? Talaayi maasa ande na ngwa yande; naami binyibinyi, nkumeeyi numone, mwanda mukishi tawi na mbidi, sunga mifufwa, bu byaanumono nabyo.” (Luka 24:36-39) Abasankile bikata, abo nkukaanya, anka bangi abadi abealashena bwa kukumina.

Bwa kwibakwasha dingi bwabadya kushinkamisha shi nnaye, bebatekyele shi: “Pano nwi na ka kudya su?” Abamupeele kipindji kya mushipa wekyele aye nkwikidya. Akupu bebalungwile shi: “Tentekyeshaayi bishima byanaadi mwinulungule panaadi nkii neenu [kumpala kwa kufwa], bii na kya kulombana byooso, byaabya bibabadi bafunde pa mwanda wande mu mukanda wa Moyiise, wa Batemuki na wa Misambo.”—Luka 24:41-44.

Yesu bapwile kukwasha Kleopase na mwin’aye bwabadya kupusha Bifundwe, binobino bapatulwila booso abadi bebungye pa kwibalungula shi: “Bii bu bibabidi bifundwe; Kidishitu afwambuka, dingi asanguka ku bafwe efuku dya kasatu, abalambukisha mwishina dyaaye, mwanda wa kwaluluka na kulekyeelwa kwa milwisho mu bisamba byooso, kubangila ku Yelusaleme. Nnanwe tumonyi twaye.”—Luka 24:46-48.

T’atuku bwakinyi Mutumibwa Tomase tabadi panka nya. Efuku dibalondele, bangi abamulungwile na muloo ooso shi: “Tubamono Mwanaana!” Tomase nkwalula shi: “Su ntshi mumone mikofu ya misumaadi mu maasa aaye, su nshi mufuumikye minwe yande pa mbalo ibadi misumaadi, dingi su ntshi mwele eyaasa dyande mu lubafu lwaaye, ntakumiina’mi.”—Yowano 20:25.

Kunyima kwa mafuku mwanda, balongi abadi dingi bebungye ku biibi kushite, kadi uno musango Tomase badi panka. Yesu bebamwenekyele munkatshi mwabo na mbidi iilenguule pa kwibemuna shi: “Butaale bwikale neenu.” P’aye kwialula kwi Tomase, Yesu bamulungwile shi: “Fwisha munwe oobe kuno, otale maasa ande; fwisha eyaasa dyoobe, wedyeele mu lubafu lwande. Leka mpaka wekale na lukumiino.” Tomase nkwakula shi: “Mfumwami, n’Efile ande.” (Yowano 20:26-28) Eyendo, tabadi dingi na mpaka shi Yesu mmusangukye n’ashi badi mutumibwe mwiyilu kwi Yehowa Efile Mukulu.

Yesu bambile shi: “Mwanda boomono, bookumiina, ba-sha mwabi mbaba abakumina kushii kubanda kumona.”​—Yowano 20:29.