Yesu na balongi baye abapu kukita mafuku asatu mu Betanii n’abo kukatuka ku Yeeriko. Binobino ku namashika mu Dimune mwifuku dya 10 mweshi wa Nisane, abadi babadiile ku Yelusaleme. Yesu badi na nsala. Binobino pabafikile pa mutshi wa figiyee, badi mwifubwile kwaudi. Bapetele tukuba twa nfinyo su?

Mafuku abapwile kukila mu mweshi wa Kasatu, anka kipungo kya nfinyo kibadi na ku Mweshi wa kasamombo. Sunga mbyabya, wawa mutshi ubadi na masaki na ntabi isampile. Byabya Yesu bamwene shi wi kwikala na tukuba twa kumpala. Anka bapetele takwi su nkakuba nkamune. Masaki a mutshi abadi aamweneka bu e na bikuba, anka tabibadi kwanka nya. Nyi bwakinyi Yesu bambile shi: “Muntu taanadye dimo bikuba byoobe bwa looso!” (Maako 11:14) Mutshi ubabangile kuuma musango umune, bibafikile kumweneka butookye namishika.

Yesu na balongi baye abafikile mu Yelusaleme kumpala kwa nsaa. Yesu bayile ku ntempelo kunyima kwa midi mu muladilo bwa nkamutala. Butokye, tabafikile penda bwa kutala nya, bakitshine mwanda wi mumune na ubakitshine takudi bipwa bisatu mu Kidiibwa kya lukilo kya mu kipwa kya 30 B.B. (Yowano 2:14-16) Uno musango Yesu babingile “babadi abaudisha na abaulu bintu” mu ntempelo. Badi dingi mufudidikye meesa “a bashintudi ba mmono na bishaaleelo bya baudishi ba nkudimba.” (Maako 11:15) Tabadi mutadiile sunga muntu umune bwa kusemuna byaye bintu lungi lupese lwa musoko tala akidila nabyo mwibalasa dya ntempelo.

Bwakinyi Yesu badi mwate kitshibilo kii bino bwa bano bantu abadi abashintula mmono na kuudisha nyema mu ntempelo? Yesu bambile shi: “Ta mbifundjibwe’shi: ‘Shibo yande yanayitanyinwe’shi shibo ya luteko bwa maumbo ooso?’ Anka’nwe nubeyaluula bu kifwamino kia bangifi.” (Maako 11:17, Kilombeeno kilya 2014) Badi mwitanyine bano bantu bu bangifi mwanda abadi abatungu bantu nfwalanga ikile bungi kwi baba abadi abaulu nyema bwa kutusha milambu. Nyi bwakinyi Yesu badi ebamono bu abanyengeshena bintu sunga kuyiba.

Byabya, bakata ba batshiite mwakwidi, bafundji na bangi bantu abapushishe bibakitshine Yesu, ababangile dingi kukimba bya kumwipaa. Anka abapetele lukalakashi. Tababaukanga bya kwipaa Yesu nya mwanda bantu abadi bamwifunyishe bwa kumuteemesha.

Takubadi penda beena Yuuda abafikile ku Kidiibwa kya lukilo nya, kubadi na bantu ba bingi bisamba abatwelele mu kipwilo kya beena Yuuda. Munkatshi mwabo mubadi na beena Greke abafikile mu kulangwila ku musangeelo. Abadi betamine Fidipe, pangi mwanda w’eshina dyaye dya kiina Greke, abo nkumwipusha bwa kwimoneena na Yesu. Fidipe tabadi ashinkamisha su bibuwa kwisamba nabo, nyi bwakinyi badi mwitanyine Andree. Abo nkutwadila Yesu mukandu pabadi kii pangi mu ntempelo.

Yesu baukanga shi akyebe kufwa kunyima kwa mafuku, nyi bwakinyi yaaya tayibadi nsaa ya kukitshina bantu byabakyebe sunga kukimba kuukiibwa nya. Aye nkwaluula batumibwa babidi abafikile na kileshesho pa kwibalungula shi: “nsaa yibakumbana bwa’shi mwana a muntu atumbishiibwe. Eyendo, nenulungula’shi: Anka su emuma dia diebele, pa kupona mu nsenga, tandifwe, adishaala bupenka; anka su diafwa, adipa [myepo] i bungi.”—Yowano 12:23, 24, Kilombeeno kipya 2014.

Emuma dimune dya dyebele di kumweneka bu di na muulo upeela. Anka su bedyela mu nsenga, akupu “diafwa” bu emiino, di kumena, adyo nkukula munda mwa mafuku na kutusha dyebele dii na mamuna ebungi. Mu kipaso kimune, Yesu mmuntu umune mupwidikye. Anka, p’aye kwikala na lulamato kwi Efile Mukulu na ku lufu lwaye, afiki mushindo wa kupetela muwa wa ikalaika kwi bantu bebungi abalesha kwilambula kwabo bu bibakitshine. Nyi bwakinyi Yesu bakwile shi: “Yaawa e na kifulo bwa muwa waaye eushimisha, anka yawa shyeeukalwila pano, akeekala na muwa wa looso.”—Yowano 12:25.

Yesu tabadi eakwila nya, mwanda akula shi: “Su muntu akyebe kunfubila, andonde; byaabya kwakwa kwandji ngi akwikala na mufubi ande. Su muntu anfubila, Yaaya amupa kineemo.” (Yowano 12:26) Ndjikale efuto dikata dyabakapete! Baba babadi bate na kineemo kwi Yaaya abakebungu pamune na Kidishitu mu Bufumu.

Bu bibadi auku lufu lwa makyenga na malwa lubadi alumutengyela, Yesu bakwile shi: “Binobino kikudi nkitupikye, byabya ngambe kinyi? Yaaya mpaashe ku bino abinfwila ku uno nguba.” Anka Yesu tabadi akimbi kusuka kukita akikumiina Efile Mukulu nya. Bakumbashile shi: “Anka mbwa uno nguba menemene bwandji mufikile.” (Yowano 12:27) Yesu bakimbanga kulombasha mpàngo yoso y’Efile Mukulu, pamune na lufu lwaye bu mulambu.

Mu Dimune efuku dya 10 mweshi wa Nisane mu ntempelo, Yesu badi mwisambile bwa lufu lwaye alwifubwila. Bu bibadi ekalakasha pabitale nkumo y’Efile Mukulu, Yesu bambile shi: “Yaaya, tumbisha eshina dyoobe.” Eyi diibukopo dibafikile mwiyilu dyakula shi: “Neemwiditumbishe, dingi needitumbisha dimo.”—Yowano 12:27, 28.

Bibadi bikaanyishe bantu babadi pa bwipi. Bangi abamonanga bu kapandapanda. Bangi abambile shi: “Mwikeeyilu ubakula naaye.” (Yowano 12:29) Anka, abapushile eyi dya Yehowa nabeene aakula! Na uno taubadi musango wa kumpala bwa bantu kupusha eyi dy’Efile pabitale Yesu nya.

Kunyima kwa bipwa bisatu na kipindji pa kubatshishibwa kwa Yesu, Yowano Mubatshishi bapushile akwakula Efile Mukulu pabitale Yesu shi: “Uno mMwande a-kifulo nee na muloo pa mwanda we.” Akupu kunyima kwa Kidiibwa kya lukilo mu kipwa kya 32 B.B., Yesu badi mwilenguule kumpala kwa Shake, Yowano na Mpyeele. Baba bantu basatu abapushile akwakula Efile Mukulu shi: “Uno nyi mMwanande a kifulo kikata, nee na muloo pa mwanda we. Mutemeesheeyi.” (Mateo 3:17; 17:5) Kadi bwa uno musango wa kasatu, Yehowa bakwile mu kipaso kya’shi bantu bebungi bapushe.

Yesu bambile shi: “Ta mbwande bubatukila dino eyi, anka mbwenu’nwe.” (Yowano 12:30) Bibadi bishinkamisho abilesha shi badi binyibinyi Mwan’Efile Mukulu, Mesiya mulayibwe.

Anka, lulamato lwa Yesu lubalesheshe nshalelo atungu shi bantu bekale naye na kushinkamisha shi Satana Diabulu, nfumu a uno ndumbulwilo mukumbanyine lufu. Yesu bakwile shi: “Binobino ngi bibakumbana kiimu kya ba-pano; nfumu a pano pa nsenga abingiibwa binobino.” Pamutwe paludya kwikala bu kubofula, lufu lwa Yesu alwifubwila lubadi bu ntumbo. Mu kipaso kinyi? Apatuula shi: “Pabapu kunkaamisha, naakaka bantu booso.” (Yowano 12:31, 32) Ku bukwashi bwa lufu lwaye ku mutshi, Yesu akaka bantu booso kwadi bwa kwibafungwila eshinda dya ku muwa wa ikalaika.

Pabapushishe kibumbu bwa ‘kukaamishibwa’ kwa Yesu mwiyilu, kibambile shi: “Twi baukile ku mukanda wa Bishila shi, Kidishitu e na kya kwikala kwanka bwa looso. Mbii-kunyi byadya kwamba shi Mwan’amuntu akamishibwe? Aaye winyi Mwan’a muntu nnanyi?” (Yowano 12:34) Sunga byekala shi kubadi bishinkamiisho bibungi, pamune na kupusha eyi dy’Efile Mukulu’ye nabeeme, bantu bebungi tababadi bakumiine Yesu bu badi binyibinyi Mwana a muntu na bu Mesiya mulayibwe nya.

Nka bu bibakitshine kumpala, Yesu badi mwileeshe bu “etaata.” (Yowano 8:12; 9:5) Balungwile kibumbu shi: “Etaata dikii munkatshi mwenu bwa kipungo kiipi. Tambukaayi panukii n’etaata, tala mufito wenushikiila . . . Panudi n’etaata, kuminaayi mwi etaata, bwa kwikala bana b’etaata.” (Yowano 12:35, 36) Akupu Yesu bakatukile mwanda efuku dya 10 dya mweshi wa Nisane tadibadi nsaa yaaye ya kufwa nya. Mu Kidibwa kya lukilo mwifuku dya 14 nyi dibadi na kya ‘kukamishwa.’—pa kupudikibwa ku mutshi.—Beena-Ngalatea 3:13.

Patutala kunyima mu mudimo wa Yesu, abipushika kalolo shi butemuki bubadi abulombana pabadi apapele beena Yuuda kukumiina mwadi. Yeeshaya badi mutemukye shi bantu abadi na kya kuputshiibwa ku meeso na mashimba aabo abadi na kya kwikala apape bwa kupela kwaluluka bwa kupashibwa. (Yeeshaya 6:10; Yowano 12:40) Eyendo, beena Yuuda bebungi abadi basumbushene bishinkamisho abilesha shi Yesu nyi badi Mupaashi mulayibwe bu eshinda aditwala ku muwa.

Nikodeme, Yoosefe a ku Arimatee na bangi bakunkushi bebungi “babadi bapwe kukumiina” mwi Yesu. Binobino abalesha lukumiino su abalukila kunyima mwanda shi abebabingi mu bitumbwilo sunga mwanda wa kukimba ‘ntumbo ya bantu’?—Yowano 12:42, 43.

Yesu nabeene apatuula akilesha kutuula lukumiino mwadi pa kwakula shi: “Yaawa ankumiina, tanaami akumiina, ngyaawa muntume.” Bya binyibinyi bibadi Yehowa mulongyeshe Yesu bwa kulongyesha bibadi na muulo ukata, nyi bwakinyi badi ebilongyesha na kwakula shi: “Yaawa ansumbusheena, shyaatambula bishima byande, e na nsushi aaye. Eyi dyandi mwakule adimutshibila kiimu mw’efuku dya nfudiilo.”—Yowano 12:44, 45, 48.

Akupu Yesu badi mufudishe shi: “Ntshi mwiakwile ami nabeene, anka Yaaya muntume, ngi munfundjile kya kwakula, naa kyaakuukisha patooka. Nauku shi eyi dyaaye, ndya muuwa wa looso.” (Yowano 12:49, 50) Yesu baukanga shi mu kapindji kapeela, badi na kya kupongoola mase aaye bu mulambu bwa bantu abalesha lukumiino mwadi.—Beena-Looma 5:8, 9.