Kubaadi lupata lui peepi na Babele lui na eshina bu Ure, muamua bantu abaadi abalanguila b’efile bebungi kushi Yehowa. Anka mu Ure mubaadi muntu umune baadi alanguila nkapenda Yehowa. Eshina diaye mbu Abalahama.

Yehowa balunguile Abalahama’shi: “Katuka mu nsenga yenu na mu kifuko kiobe, na mu nshibo ya nshobe, wende mu nsenga ya nkakulesha.” Yehowa nkumulaa’shi: “Nakakuikasha muilo ukata, nakakuelela miabi, nakekasha eshina diobe dikata, na okekala muabi kui bangi.”

Abalahama tabaadi auku kubaabadi abamutumu kui Yehowa nya, kadi baadi’nka na lukulupilo. Biabia Abalahama, mukashi aaye Sara, na Tera nshaye na Abalahama na Lota muipu aaye abaadi bakookiele, abo nkuanya mabofu na nkubanga luendo lula.

Abalahama baadi na bipua 75 nsaa ibakafikile na kifuko kiaye muiumbo dibaadi adikumiina Yehowa bua’shi akashaale. Dibaadi aditaminyibua bu Kanaana. Kuakua Efile Mukulu nkuisamba na Abalahama na kumulaa’shi: “Nakapa bekulu bobe ino nsenga.” Kadi Abalahama na Sara abaadi bapue kununupa kushi muana su ngumune. Biabia Yehowa badia kukumbasha wawa mulayilo waye naminyi?

Kubaadi kupue kukila bipua bibungi kasha Abalahama na Sara beyibakishena. Abapuile kuleka nshibo yabo ibuwa mu Ure bua nkashaala mu tushibo tua mapema. Kadi Sara tabaadi edidi nsaa yooso muanda baadi mukulupile mui Yehowa.

Bu bibaadi Sara akimbi kupeta muana, balunguile Abalahama shi: ‘Su mufubi ande Agare apeta muana, ekala’nka bu ande.’ Muenda mafuku, Agare bapetele muana mulume. Eshina diaye dibaadi bu Ismaele.

Kunyima kua bipua bibungi, pabaadi Abalahama na bipua 99 Sara na bipua 89, abapetele benyi basatu. Abalahama nkuibetanyina bua kuikisha muushi mua mutshi na kudia kidibua. Weuku su baaba benyi basatu abaadi mba nnanyi? Abaadi ba mikeyilu! Abalunguile Abalahama’shi: ‘Kipua akifiki, mu kino kipungo, mukashi oobe, akekala na muana mulume.’ Sara baadi apusha ku lupese. Aye nkubanga kuisepela na kunangusheena’shi: ‘Ne mulombeene dingi kutanda na buno bununu buande?’

Kipua kibalondele, Sara nkutanda muana mulume, anka bibaadi mikeyilu a Yehowa mulee. Abalahama nkumuudika bu Isaake, eshina adipatuula’shi: “Kusepesha.”

Pabaadi Isaake na bipua bitaano, Sara bamuene bibaadi Ismaele oolomona Isaake. Baadi akimbi kukaluila muana aaye, aye nkulungula Abalahama bua kutuma Agare na Ismaele ingi mbalo. Anka, Abalahama tabaadi mukumiine musango umune nya. Kadi Yehowa nkulungula Abalahama shi: ‘Teemesha Sara. Nakiebe kukaluila Ismaele. Anka, ku bukuashi bua Isaake ngi akukalombana milayilo yande.’