Lota abaadi bashaale pamune na Abalahama, muyomba aaye muiumbo dia Kanaana. Muenda mafuku, Abalahama na Lota abapetele nyema ibungi, anka takubaadi mbalo ya kuibalombana booso bubidi nya. Abalahama nkulungula Lota shi: ‘Takui mushindo wa shi tuashala booso pamune nya. Bibuwa tuilamunushene, su okumiina we na bulungantu bua kusangula lupese lodia kuenda. Ami namu nakende lungi lupese.’ T’omono shi Abalahama baadi na kalolo?

Lota nkusangula kipindi kia nsenga kibuwa bukile peepi na kibundi kiabetanyina bu Sodome. Mubaadi muule na meema na lubishi lusampile. Aye nkuenda yaaya mbalo na kifuko kiaye.

Bantu ba mu Sodome na be mu kibundi kia Gomore kibaadi peepi, abaadi bubi bukile. Yehowa baatshile kitshibilo kia kubutula biabia bibundi muanda wa bubi buabio. Kadi Yehowa baadi mukumiine kupaasha Lota na kifuko kiaaye, aye nkutuma ba miikeyilu babidi bua kuibadimusha shi: ‘Tukaayi bukidi, mu luno lupata! Muanda Yehowa akiebe kuilubutula.’

Lota tabakatukile bukidi nya. Baadi’nka anyengakana. Ba miikeyilu nkukuata Lota ku mboko na mukashi aaye na ba nsonguakashi baaye babidi nkuibatuusha paasha pa kibundi na kuibalungula shi: ‘Suukayi bua kupaasha miuwa yeenu, tanutalanga ku mongo. Su nubatala kumongo anufu!’

Pabaabafikile mu kibundi kiabetanyina bu Soware, Yehowa baadi munokieshe mpeshi a kaalo na sufule mu kibundi kia Sodome na Gomore. Biabia bibundi bibidi bibaadi bibutulue bioso. Pabaadi mukashi a Lota mukutue kukookiela Yehowa p’aye kutala kunyima, baadi mualulukie bu ebue dia mungua! Kadi Lota na bansonguashi baaye babapandile muanda abaadi bakookiele Yehowa. Babaadia kuikala benyongole bikata muanda wa kukutua kukookiela kua mukashi a Lota. Anka babaadi na muloo wa kukookiela bibaadi Yehowa muibalungule.

Abalahama baadi mulongieshe muan’aye Isaake bua kufula na kukulupila mu milayilo yooso ya Yehowa. Kadi pabafikile Isaake peepi na bipua 25 Yehowa batekiele Abalahama bua kukita kintu kibadia kumuikeela bukopo bua kulombasha. Bamulunguile bua kukita kinyi?

Efile Mukulu baadi mulungule Abalahama shi: ‘Ata namu muan’obe mulume umune eeleka, omundambule bu mulambu pa muengie wa mu nsenga ya Moriya.’ Abalahama tabaadi auku buakinyi Yehowa bamutekiele bua kukita biabia nya. Anka baadi mukookiele Yehowa.

Ku namashika pa kafito, Abalahama nkuata Isaake na bafubi baaye babidi abo nkuenda dia ku muengie wa Moriya. Abaadi balombeene kumona yaya miengie ku bula kunyima kua mafuku asatu. Abalahama nkulugula bafubi baaye buabadia kuibatengiela p’abende na Isaake mu kutuusha mulambu. Abalahama nkupa Isaake kiita kia nteete, Abalahama nabeene nkukuata lupete. Isaake nkuipusha nshaye shi: A ‘nyema atukalambula e kunyi?’ Abalahama nkumualuula shi: Muan’ande, ‘Yehowa etupa anka.’

P’ababafikile ku muengie, abaadi bebakie kilambuilo. Akupu Abalahama nkuanya Isaake mioshi ku maboko, aye nkumuladisha pa kilambuilo.

Abalahama nkuata lupete. Muikeyilu a Yehowa nkumuitamina musango umune muiyilu na nkumulungula shi: ‘Abalahama! Tokitshinanga nsongualume muanda wibubi! Binobino nauku’shi otshinaa Efile Mukulu, muanda bokumiina kulambula muana’obe umune.’ Akupu Abalahama nkuibuesha meso, aye nkumona mukooko ulume ukuatshikie nsengua mu ntabi ya mutshi. Aye nkuangula bukidi Isaake mioshi na nkulambula mukooko pamutue pa Isaake.

Kubanga’nka diadia efuku, Yehowa nkuitanyina Abalahama bu kuuku aaye. Ouku buakinyi? Muanda Abalahama baadi akitshi kioso kibaadi akikumiina Yehowa mpa na pashibaadi apusha buakinyi Yehowa amutekie bua kukita biabia.

Yehowa nkulungula dingi Abalahama mulayilo waye shi: ‘Nakakuelela miabi, na nakafuimisha binyibinyi bekulu bana bobe, sunga’shi bekulu bobe.’ Bino abilesha shi Yehowa baadi na kia kuelela bantu booso bebuwa miabi kukiila ku kifuko kia Abalahama.