Isaake baadi na bipua 40 pabaadi muibakile Rebeka. Baadi mumufule ngofu. Babatandile bana balume babidi ba mpasa.

Mukulu baadi Esau na mumulondele baadi Yakobo. Esau baadi mufule mu mapia muanda baadi mpiibue. Anka Yakobo namu baadi akumiina kushala paasha.

Mu aa mafuku, muana mbedi abaadi abamupa kipindi kikata kia nsenga na makuta ebungi a nshabo su baafu. Abaadi abetanyina biabia bu bupianyi. Mu kifuko kia Isaake, kuikala mpianyi kubaadi mpa na kuikala mu mulongo wa milayilo ya Yehowa ibapeele Abalahama. Esau tabaadi anangushena bua yaaya milayilo nya, anka Yakobo baadi auku shi i na muulo ukata.

Dingi efuku, Esau nkualukiila mu mapia mukookie bikile. Aye nkupusha mapembue kubaadi akuteekie Yakobo, aye nkuamba’shi: ‘Ngiu’mi afu na nsala! Mpe ndambo a tukunde tumonga!’ Yakobo nkumulungula shi: ‘Banda kundaa shi okiebe kumpa bupianyi boobe.’ Esau nkuakula shi: ‘Bupianyi buande buibuwa ku kinyi? We kuibuata kadi ompe kia kudia.’ We kuibuata su okumiina. Nakimbi penda kidiibua. Omono shi Esau bakitshiine kalolo su? Nya. Muanda Esau baadi mutuushe kintu ki na muulo ukata penda bu’elonga dia bintu bimongolokie.

Pabafikile Isaake ku bununu, nsaa ibakumbeene ya kuelela muan’aye mukulu miabi. Kadi Rebeka baadi mukuashe Yakobo muana mukinga bua kupeta miabi. Pabaukile Esau, baafiitshile munda bikile, aye nkuata mpango ya kuipaa lupasa naaye. Isaake na Rebeka nkukimba bia kukaluila Yakobo p’abo kumulungula shi: ‘Suukila kui tuutu a nyin’oobe Labane nyaa na apapu nsungu ya mukuenu Esau.’ Yakobo nkuteemesha elango dia bamutande, aye nkusuuka bua kupaasha muwa waye.

Yehowa balayile Yakobo’shi akiebe kumukaluila nka bibaadi mukaluile Abalahame na Isaake. Yakobo bakashaleele pa mbalo yabetamina bu Harane, kubaadi muibakile bakashi, afika kifuko kikata na bupeta buibungi.

Kunyima kua mafuku, Yehowa nkulungula Yakobo shi: ‘Alukiila kuiumbo dia bamashoobe.’ Yakobo na kifuko kiaye nkubanga luendo lula bua kualukiila. Muishinda, bangi bantu abafikile balungula Yakobo’shi: ‘Mukuenu Esau kuete kufika na balume 400!’ Yakobo bapushishe moo’shi Esau afiki mu kumuluisha ngoshi na kifuko kiaye. Aye nkuteka Yehowa shi: ‘Nakusendeela mpaashe namu kuiyaasa dia mukuetu.’ Efuku dibalondele, Yakobo nkutumina Esau mikooko, mbushi, ngombe ikashi, tumeelo na mpunda.

Buabua bufuku pabaadi Yakobo bupenka, bamuene muikeyilu! Muikeyilu nkubanga kulua na Yakobo. Abo nkulua mpa na ku nkielo. Sunga biekala’shi Yakobo baadi mukalakashue bikata, tabakookiele nya. Muikeyilu nkumulungula shi: ‘Ndekie nyende.’ Kadi Yakobo namu’shi: ‘Nta nkutakutadiila wende pa na pongiela miabi.’

Ku nfudiilo a bioso, muikeyilu nkuela Yakobo miabi. Binobino Yakobo nkushinguula’shi Yehowa t’atadiila Esau bua kumuluisha ngoshi nya.

Yawa namashika, Yakobo nkuibuesha meso, aye nkumona Esau ku bula na bantu 400. Yakobo nkuenda na kifuko kiaye abo nkukunama kumpala kua mukuabo misango musambobidi. Esau nkusuuka lubilo mufungule maboko aaye bua kumukuukila. Bubidi buabo nkubanga kudila na kualusha butaale. Yehowa bapushiishe naminyi mu kipaso kibaadi Yakobo mupudishe uno muanda?

Kunyima, Esau baalukiile kuaye, Yakobo namu batungunukile na luendo. Yakobo baadi na bana 12. Mashina aabo abaadi: Rubene, Simeone, Levi, Yunda, Dane, Neftali, Gade, Ashere, Isakare, Zabulone, Yosefe, na Benyamine. Yosefe ngumune a ku baba bana balume, Yehowa baadi mumufubishe bua kupaasha muilo Waye. Ouku bibaadi mumufubishe su? Tubande kutala.