Yosefe baadi umune a ku bana balume bakinga ba Yakobo. Ba tuutu baaye babamuene’shi nshabo baadi mufule Yosefe bikata. Omono’shi abaadi abapusha naminyi? Abaadi bakuatshile Yosefe kiutu, abo nkumushikua. Pabaadi Yosefe muloote bilootua, baadi mulungule bakuabo. Abelele binangu ku bibaadi abipatula bilootua’shi dingi’efuku abakamukunamina. Abo nkunyiisha dingi kumushikua!

Dingi efuku ba tuutu ba Yosefe abayile mu kudiisha mikooko peepi n’eumbo dia Shekeme. Yakobo batumine Yosefe bua nkebatala. Pabaabadi bamone Yosefe ku bula, abo nkuilungushena shi: ‘Muntu sha bilootua ngiawa afiki. Tumuipeeyi!’ Abo nkumukuata, nkumutakula mu kitonko kishii na meema. Kadi Yunda, umune a ku ba tuutu baaye bambile shi: ‘Tanumuipanga nya! Tumupaneeyi mu bupika.’ Abo nkupaana Yosefe ku nfualanga 20 kui ba nsunga ba bena Madiane abaadi abende ku Ejipitu.

Akupu, ba tuutu baaye abaatshile nkandio aaye bamufundakasha mu mase a mbushi, abo nkumutuadila nshabo na nkuakula’shi: ‘Tundula su nkandio a muan’oobe.’ Yakobo nkupuandikisha’shi nyema a mu kisuku bayipayile Yosefe. Aye nkuinyongola kuishimba bikata. Takubaadi bia’shi muntu amusamba nya.

Abaadi baudishe Yosefe mu Ejipitu bu mpika kua muntu mukata abetanyina bu Potifare. Anka Yehowa baadi na Yosefe. Potifare nkumona’shi Yosefe baadi mufubi ebuwa adi mulombeene kukulupila. Munda mua mafuku apeela, Potifare batudile Yosefe kunundu kua bintu biaye bioso.

Mukashi a Potifare nkumona’shi Yosefe baadi buwa bua mpala na e bukome. Baadi atekie Yosefe efuku dioso bua kulaala naye bulunda. Yosefe badia kukita kinyi? Baadi mupele na nkuakula shi: ‘Nya! Bibubi. Nfumu’ami munkulupile, dingi obe we mukashi aaye. Su nalaala noobe bulunda, nakitshi muluisho ukata kui Efile Mukulu!’

Dingi efuku mukashi a Potifare nkutompa kukuata Yosefe pa bukopo bua’shi alaale naye bulunda. Aye nkumukuata ku kilamba, anka Yosefe basuukile. Nsaa ibalukiile Potifare, bamulunguile’shi Yosefe nyi bamukuatshile. Tabamulunguile bia binyibinyi nya. Potifare baadi mufiite munda bikile, aye nkuela Yosefe mu lukano. Kadi Yehowa tabaadi muiluankane Yosefe nya.

Pabaadi Yosefe mu lukano, Faraone, nfumu a bena Ejipitu, baadi muloote bilotua bishibaadi na muntu a kuibipatuula. Muina mudimo aaye nkumulungula’shi Yosefe e kumupatuluila bilotua biaye. Faraone nkutuma eyi musango umune buabadia kufika na Yosefe.

Faraone nkumuipusha shi: ‘We kupatuula bilotua biande su?’ Yosefe nkumulungula’shi: ‘Akuikala bipua musambo bia bidiibua bibungi mu Ejipitu, na bipua musambo bia nsala. Sangula muntu e na binangu bua kubunga biakudia kupela muilo oobe wafua na nsala.’ Faraone bamualuluile shi: ‘Nakusangula obe! Wekala muntu a kabidi e na matalua mu Ejipitu!’ Yosefe baukile akipatuula bilotua bia Faraone naminyi? Yehowa baadi mumukuashe.

Munda mua bipua musambo, Yosefe baadi mubungishe bidibua. Akupu, kubekeele nsala mu nsenga yooso nka bu bibaadi biakule Yosefe. Bantu nkubanga kufika mu ma mbalo ooso kui Yosefe bua kuula bidibua. Pabapushile nshaye Yakobo’shi mu Ejipitu mui bidibua, batumine bana baaye ekumi bua nkaula bidiibua.

Pabayile bana ba Yakobo kui Yosefe, baadi muibatundule musango umune. Kadi bakuabo tababaadi bamutundule nya. Babaadi bamukunamine nka bu bibaadi muibiloote ku bukinga. Yosefe bakimbile kuuka su bakuabo bakii na mushikua. Aye nkuibalungula shi: ‘Nui ba mpuupa. Nui bafikie bua kubekieela eumbo bua kumona padidi dibofule.’ Abo nkuakula’shi: ‘Nya! Tui bana 12 ba muntu mu Kanaana. Kadi umune a kuatudi tabafuile, na mukinga a ku booso e lelo uno kui nshetu.’ Yosefe nkuibalungula’shi: ‘Ndayi nukaate yawa mukinga ku booso buandja kukumiina.’ Abo nkualukiila ku nshibo kui nshabo.

Pabaadi kifuko kia Yakobo kikutue dingi bidibua, baadi mutume dingi bana baye mu Ejipitu. Abaadi bakaate Benyamine mukinga ku booso abo nkufika naye. Bua kutompa ba tuutu baaye, Yosefe baatshile ekopo diaye dia kiamo kia arja, eela mu mpaya a Benyamine bua’shi bambe’shi ba tuutu baaye nyi abayibile. Nsaa ibaadi bafubi ba Yosefe bataluule abapetele diadia ekopo mu mpaya a Benyamine, bibaatapile bakuaabo kuishimba bikata. Abo nkusendeela Yosefe bua kuibanyoka pa mbalo ya Banyamine.

Yosefe batunduile shi ba tuutu baaye abaadi bapue kushintuluka. Yosefe tabaadi mobeshe kunyinga dingi eshimba nya. Baabangile kudila akula shi: ‘Ne mukuenu, Yosefe. Nshami ki’nka na muwa?’ Ba tuutu baaye abaadi bakaanye bikata. Yosefe nkuibalungula shi: ‘Biabia bianubaadi bankite tabinukalakashanga nya. Efile Mukulu nyi bantumine pano bua kupaasha miuwa yeenu. Binobino ndayi nukafikie na nshami.’

Abo nkualukiila kui nshabo nkumulondela wawa mukandu wibuwa na wa kumutuala mu Ejipitu. Kunyima kua bino bioso bipua bi bungi, Yosefe na nshaye abaadi bafumankane dingi.