Mu Kibundi kia Uze, mubaadi muntu baadi alanguila Yehowa. Eshina diaye mbu Yobo. Baadi na bupeta buibungi na kifuko kikata. Baadi na kalolo na akuasha balanda, bakashi kilele, na bana ba nshiye. Bu bibaadi muntu mululame, Yobo tabaadi na kia kupeta nkalakashi su?

Yobo tabaadi auku kintu nya, kadi Satana Diabulu baadi amutala. Yehowa nkulungula Satana’shi: ‘We mumone Yobo mufubi ande su? Tee na a kumupuandikisha naye pa nsenga. Muntu ampushiisha na ekumbaa bubi.’ Satana nkumualuula’shi: ‘Oolo Yobo akutshinaa. We mumulame na kumuelela miabi. Omupa nsenga na nyema. Tompa’nka kumuata bianka otale kuapele nkulanguila.’ Yehowa nkumulungula’ shi: ‘We mulombeene kumutompa. Kadi tue mupeebue matalua a kumuipaa.’ Buakinyi Yehowa baadi mutadiile’shi Satana atompe Yobo? Baadi ashinkamisha’shi Yobo t’aluluka nya.

Satana nkubanga kutompa Yobo na masaku akile bungi. Kumpala, batumine bantu babetanyina bu bena-Sabeya buabadia kuiba ngombe na mpunda ya Yobo. Akupu, kaalo kabashiikile mikooko yaaye yoso. Kingi kisaka kia bena-Kaldeya nkufika mu kuiba tumelo tuaye. Bafubi baye abaadi abalama yaaya nyema abaadi bebayipee. Kubafikile dingi masaku akata. Bana baaye boso nkufua pabaadi nshibo ibaponene ku musangeelo wabo. Yobo baadi mutapikie kuishimba bikata anka tabaadi mulekie kulanguila Yehowa nya.

Satana baadi akimbi’ shi Yobo ankienge kukila paapa, nyi buakinyi baadi mumutuushe yoso pa mbidi yoso, aye nkukienga bikata. Yobo tabaadi auku kibaadi akifuisha yaaya mianda nya. Sunga mbiabia, baadi nka mushaale alanguila Yehowa. Efile Mukulu baadi amono biabia bioso na baadi musangale na Yobo bikata.

Satana batumine dingi bantu basatu bua kutompa Yobo. Abo nkumulungula’shi: ‘We kuikala mukite muluisho, otompa kuiufuamisha. Efile Mukulu kuete nkunyooka.’ Yobo nkuakula’shi: ‘Ntshi mukite kintu kibubi sunga nkimune.’ Akupu babangile kunangusheena nka paapa’shi Yehowa nyi baadi amufuishisha yaaya mianda, na kuakula’shi Efile Mukulu t’amumono dingi bu mululame nya.

Nsongualume abetanyina bu Eliwu baadi muteemeshe kalolo muisambo wabo. Aye nkuamba’shi: ‘Bioso bianubakula bibubi. Tatui balombeene kupusha bi bukata bua Yehowa nya. Ta mukumbeene kukita kintu ki bubi. Kuete kumona mianda yooso na kukuasha bafubi baye ku mianda yabo.’

Akupu Yehowa nkuisamba na Yobo. Aye nkumuipusha’shi: ‘Bodi kunyi panapangile eyilu na nsenga? Buakinyi wakula’shi ntshi mululame? Okuete kuakula, anka touku buakinyi mbikufuile nya.’ Yobo nkukumiina bilubilo biaye na nkuakula’shi: ‘Nedimbanga. Nakupushishanga ku bula kadi binobino nemuena na meso. Ta kui kintu kikukabile nya. Nfuile namu lusa bua mayi ande.’

Pabapuile kutompibua, Yehowa baadi mualushe Yobo na mbidi bukome, na kumualuisha bintu biaye kukila bia kumpala. Yobo baadi mupue mafuku ebungi na muloo mu muwa waye. Yehowa baadi muelele Yobo miabi pa kumupushiisha sunga mu nkalakashi. We kuambula Yobo pa kutungunuka’nka na kulanguila Yehowa, sunga biekala naminyi su?

Abaadi abauku kifuko kia Yakobo mu Ejipitu bu bena Isalele. Kunyima kua lufu lua Yakobo na Yosefe, ungi Faraone mupia babangile kumunana. Badi atshiinyi’shi tala bena Isalele bakila bena Ejipitu bukome. Aye nkuikasha bena Isalele bu bapika. Na nkubanga kuibabudisha matafuadi na kuibafubisha midimo ibukopo ya mafuba. Pabaadi apende bena Isalele na kufuima, bena Ejipitu abaadi abanyinsha kuibafubisha midimo ibukopo. Muanda Faraone tabaadi akumiina bua’shi beekale bebungi nya, aye nkutuusha muiya buabadia kuipaa bana balume boso baabatanda kui bena Isalele. Banda kupuandikisha moo ubaadi nao bena Isalele bua uno muanda!

Ungi muana mukashi muina Isalele abetamina bu Yokebede baadi na muana tooka mulume e buwa. Bua kumukaluila, aye nkumuela mu kisaku kia malengie akamutuula ku bukunkula bua Muela wa Nile. Miriame taata aye na yawa muana tooka, nkushaala bua kumulama.

Pabafikile nsonguakashi a Faraone mu kuitumpa ku muela, bamuene kisaku. Apeta muana tooka adidi muanka, aye kumupusha lusa. Miriame nkumuipusha’shi: ‘Ne kukukimbila muana mukashi mulombeene nkukushiisha uno muana?’ Pabaadi pakumiine nsonguakashi a Faraone, Miriame bakaatshile nyin’aye Yokebede. Nsonguakashi a Faraone nkumulungula’shi: ‘Ata uno muana, omunkushiishe, nakakupa buedi.’

Pabakudile muana kapindi, Yokebede baadi mumutuadile nsonguakashi a Faraone, amukusha bu muana aaye na kumuudika bu Moyise. Moyise bakudile bu muana a nfumu, badia kukita kioso kiakumiina. Anka Moyise tabaadi mulube Yehowa nya. Baukanga’shi baadi muina Isalele kushi bu muina Ejipitu. Aye nkusangula bua kufubila Yehowa.

Pabaadi mulombashe bipua 40, Moyise batshile kitshibilo kia kukuasha bakuabo. Pabamuene muina Ejipitu akupila mpika muina Isalele, Moyise baadi mukupile muina Egiipitu ngofu aye nkufua. Aye nkushiika kitanda kiaye mu lufuinkinyi. Pabaukile Faraone, bakimbile bia kuipaa Moyise. Anka Moyise basuukile mu nsenga ya Madiane. Kuakua, Yehowa baadi mumukaluile.