Moyise bashaleele mu Madiane munda mua bipua 40. Aye nkuibakila na nkutanda bana. Dingi efuku pabaadi adiisha mikooko yaaye peepi na Muengie wa Sinayi, baadi mumone kilengieleshi. Ebuula dia mutshi dina ndimi ya kaalo, anka tadibaadi adipi nya! Moyise baadi akimbi’shi akamone kibaadi akikitshika, bapushiishe eyi aditukila muibuula adiamba’shi: ‘Moyise! Tuefubuilanga peepi na dino ebuula. Fuula sandale yoobe muanda pano poodi muimane nyi pa mbalo ya kishila.’ Yehowa nyi baadi esamba naaye ku bukuashi bua muikeyilu.

Moyise bapushishe moo, aye nkuishikiila kilamba ku meso. Eyi dibambile’shi: ‘Namono makienda a bena Isaleele.’ Nakiebe kuibapososha ku matalua a beena Ejipitu na kuibalusha muiumbo dibuwa. Nnoobe akakunkusha muilo wande bua kuiutusha mu Ejipitu.’ Ouku’shi bibaadi bikaanyishe Moyise?

Moyise bamuipuishe’shi: ‘Ne kukita kinyi ‘su baangipusha shi: Nnanyi, bakutumu? Nkinyi kia nebalungula? Efile Mukulu balunguile dimo Moyise’shi wakula bino: Yehowa, Efile a Abalahama, Efile Mukulu a Isaake Efile Mukulu a Yakobo, nyi bakutumu.’ Moyise nkualuula dingi’shi: ‘A su muiilo tangumpushishe?’ Yehowa nkupa Moyise bishinkamisho’shi Akamukuasha. Aye nkulungula Moyise shi: Asumbule mukombo ubaadi nao mu nsenga. Wawa mukombo nkualuluka bu nyoka! Nsaa ibakumine dingi Moyise nyoka ku mukila kuaye, nyoka balulukile dingi bu mukombo. Yehowa nkuamba shi: ‘Su bolombasha nka kino kitunduilo, akibashinkamisha shi Nnami bakutumu.’

Moyise nkuamba shi: ‘Ami ntangakulaa kalolo nya.’ Yehowa nkumulaa’shi: ‘Nankulambukisha biodia kuisamba, na nankatumu mukuenu Aarone bua’shi akukuashe.’ Bu bibaadi Moyise ashinkamisha’shi Yehowa e naaye, baadi muate mukashi aaye na bana baaye abo nkuenda ku Ejipitu.

Bena Isalele abaadi abebafubisha midimo ibukopo bu ba mpika. Yehowa nkutuma Moyise na Alona kua Faraone na mukandu’shi: ‘Leka muilo wande wende bua kunfubila mu kabaaka.’ Faraone nkualuula na kapeesha kooso’shi: ‘Nta ntemesha abiakula Yehowa, na ntanfungula bena Isalele nya.’ Akupu Faraone nkunyiisha kuibafubisha kukila kumpala. Yehowa baadi adidi kupa Faraone dilongiesha. Weuku bibakitshine? Baadi mutume Bipupa ekumi mu Ejipitu. Yehowa balunguile Moyise’shi: ‘Faraone ta mumpushiishe. Ku namashika, eekala ku Muela wa Nile. Enda kuadi, omulungule’shi bu biash’akiebe kuleka muilo wande wenda, meema oso a Muela wa Nile aaluluka mase.’ Moyise baadi mukookiele aye nkuenda kui Faraone. Faraone nkumona kubaadi Alona mukupile mukombo mu meema, ao namu nkualuluka mase. Muela nkubanga kununka eshiko, mishipa nkufua, takubaadi dingi meema e buuwa kutoma mu Nile nya. Anka, Faraone baadi kiatungunuka na kupela kuleka muilo buashi wende.

Kunyima kua mafuku musambo, Yehowa batumine Moyise kui Faraone na ungi mukandu’shi: ‘Su tokiebe kutuma muilo wande, mu Ejipitu mooso amuulu na nsobia.’ Alona nkuela mukombo muiyilu, akupu nsobia kubanga kusoboka mbalo yooso. Bantu nkubanga kumona nsobia mu mashibo aabo, ku nsala yaabo na mu malonga aabo. Nsobia ibaadi mbalo yooso! Faraone nkulungula Moyise buadia kuteka Yehowa bua’shi emikie kiakia kipupa. Faraone nkumulaa’shi apoosola Bena Isalele buabadia kuenda. Yehowa nkuimika kiakia kipupa, akupu Bena Ejipitu nkubunga nsobia ifue mituuto mituuto. Eumbo dioso nkubanga kunuunka. Faraone nkupela dingi kupoosola Bena Isalele buabadia kuenda.

Akupu, Yehowa balunguile Moyise’shi: ‘Abitungu’shi Alona akupile mukombo waye mu nsenga lufuinkinyi lualulukie bu tumue, sungua tuiishi tuilekeene atusumanaa.’ Musango umune tumue tubafuimine mbalo yooso. Bangi bantu ba ku lupese lua Faraone nkumulungula shi: ‘Efile Mukulu nyi batumu kino kipupa.’ Kadi Faraone baadi’nka apele kuleka Bena Isalele buabadia kuenda.