Moyise na Alona abaayile bakalungula Faraone mukandu wa Yehowa shi: ‘Su tokumiina kuleka muilo wande wenda, nantumu bibuwa mu nsenga yooso.’ Bibuwa bibungi nkuula mu mashibo a bena Ejipitu, ba mpeta na balanda. Eumbo dioso nkuwula na bibuwa. Kadi muiumbo dia Goshene mubaadi bena Isalele tamubaadi bibuwa nya. Kubangila’nka pa kipupa kia kananka, bipupa bioso bibaadi abikiengesha nkapenda bena Ejipitu. Faraone nkuibasendeela shi: ‘Tekaayi namu Yehowa bua shi akatushe kula bino bibuwa. Muilo wenu ngulombeene kuenda.’ Anka Yehowa pabakatuishe bibuwa kula, Faraone baadi mualuule binangu biaye. Kui dilongiesha dibapetele su?

Yehowa bakuile shi: ‘Su Faraone apele’nka kuleka muilo wande wenda, nyema yooso i mu lupata lua Ejipitu ayikumbu kipupa na kufua.’ Efuku dibalondele, nyema nkubanga kufwa. Kadi nyema ya bena Isalele tayibaadi ifwe nya. Faraone baadi’nka kiayididiila na kupapisha eshimba diaye kushii kuibalekiela.

Akupu Yehowa balunguiile Moyise bua kualuka dingi kui Faraone na kuata buto bua shi ebuele mu lupapi. Buabua buto nkupalakana muiumbo dishima dia Ejipitu na bubaadi abupono pa mbidi ya bantu. Buabua buto pabubaadi abukumu pa mbidi ya bena Ejipitu mpa na nyema yabo, bubaadi abuibatuusha mapote e busungu bukile. Sunga mbiabia, Faraone baadi’nka mupapishe eshimba bua kutadiila bena Isalele.

Yehowa nkualusha dimo Moyise kua Faraone na uno mukandu shi: ‘Okiotungunuka’nka na kupela kufungula muilo wenda? Malooba, mpeshi a mabue anoko muiumbo dioso.’ Butokie, Yehowa nkutuma tupanda-panda na mpeshi a mabue, na kaalo. Kubaadi tupanda-panda tuisangie na mpeshi a mabue biabashamuene kasha mu Ejipitu mooso. Mitshi yooso na mafuba ooso bibaadi biluishibue, kadi mu Goshene ta mubaadi mukitshikie kintu nya. Faraone nkuakula shi: ‘Esendeeleyi kui Yehowa bua shi su ayimika namu mpeshi! Kunyima nui kuenda booso.’ Kapindi kapeela kunyima mpeshi a mabue baadi mutshibikie, Faraone baluluile binangu biaye.

Akupu Moyise nkuamba shi: ‘Binobino mpasu ayidi mitshi yooso ayimene na bintu biooso bisheele ku mpeshi a mabue.’ Midiyo ya mpasu nkudia bintu biooso bibashadile mu mafuba na mitshi yooso. Faraone nkuidila shi: ‘Esendeeleyi kui Yehowa bua shi akatushe ino mpasu pano.’ Kadi sunga mbibaadi Yehowa muimikie mpasu, Faraone baadi nk’abiandula.

Yehowa balunguile Moyise shi: ‘Wol’eyaasa diobe muiyilu.’ Musango umune, eyilu nkufiita diooso nka buii na mufito. Munda mua mafuku asatu bena Ejipitu t’abaadi na biakumona kintu sunga muntu nya. Nkapenda bena Isalele nyi abaadi na etaata mu mashibo aabo.’

Faraone nkulungula Moyise shi: ‘Ndayi. Anka nulekie nyema yenu pano.’ Moyise namu shi: ‘Abitungu tuaate nyema yatudi balombeene kulambula Efile Mukulu eetu milambu.’ Faraone baadi mufite munda bikata. Nkulungula Moyise na kapesha kooso shi: ‘Katuka! Su nakumono dingi kumpala kuande, nakuipaa.’

Moyise balayile Faraone’shi t’afiki dingi mukumunona nya. Kadi kumpala kua’shi ende, balunguile Faraone shi: ‘Munkatshi a bufuku, bana ba kumpala booso ba mu Ejipitu, bana boobe, na bana ba ba mpika, abafu.’

Yehowa nkulungula bena Isalele buabadia kudia kidibua kipabuakio. Bambile’shi: ‘Tshindiayi muana a mukooko ulume wa kipua kimune sunga mbushi, nushingie mase ku ntempa ya biibi. Nuekiele muita, nuiudie na mukate ushi na kitatusho. Nuikale bafuale, sandale ku mikoolo yeenu nuilumbule bua luendo. Buno bufuku anuikala mbulungantu.’ Banda kunangusheena bibaadi muloo wa bena Isalele!

Munkatshi’abufuku, muikeyilu a Yehowa bakidile ku nshibo yoso mu Ejipitu. Ku nshibo yoso ishibaadi ishingie mase ku ntempa ya kiibi, bana boso ba kumpala abafuile. Anka muikeyilu bakidile’nyi ku mashibo abaadi na bitunduiilo bia mase. Bifuko biooso bia bena Ejipitu, ba mpeta na balanda abaadi bashimishe bana baabo. Kadi ta nkufue muana a bena Isalele su ngumune.

Mpa na muana a Faraone bafuile. Faraone tabaadi na kia kukita su nkimune nya. Musango umune balunguile Moyise na Alona’shi: ‘Ebueyi. Katukaayi pano. Endaayi nukafubile Efile Mukulu eenu. Ataayi nyema yenu nuende!’

Munkatshi a bufuku mu mueshi, bena Isalele nkutuuka mu Ejipitu, belongie mbifuko na bisamba. Boso buabo abaadi 600 000 balume kushii kubadika bakashi na bana. Na dingi bangi bantu bebungi abayile nabo bua’shi bamone n’abo namu bia kulanguila Yehowa. Bena Isalele abaadi mbulungantu bua loso!

Bua kutentekiesha bibaadi Yehowa muibapaashe, abaadi na kia kuikala abadi kiakia kidiibua ku kipua kioso. Abaadi abekiitamina bu kidiibua kia Lukilo.