Yehowa baadi mulungule Moyise’shi: ‘Kaamina kuandi ku muengie. Bua shi nkupe mabue a mayi na Miya biandi mufunde.’ Moyise nkukaamina ku muengie, aye nkushaala kuanka munda mua mafuku 40. Pabaadi kuakua, Yehowa bafundile Miya ekumi ku mabue abidi eyipa Moyise.

Kunyima kua mafuku, bena Isalele abamuene’shi Moyise baapu kuibasuuka. Abo nkulungula Alona shi: ‘Atukimbi muntu a kuitukunkusha. Etukitshiine efile!’ Alona nkuakula shi: ‘Katushaayi tudibu na bikano bia ôlo nuibintuadile.’ Aye nkuibisungulusha, nkukita nkishi a muana a ngombe. Bena Isalele nkuakula’shi: ‘Uno muana a ngombe nyi Efile eetu muitutuushe mu Ejipitu!’ Abo nkubanga kulanguila muana a ngombe na kumutentekiesha. Abakitshiine bibubi su? Oolo, muanda abapuile kulaa bua kulanguila nka penda Yehowa. Kadi binobino abakutua kulombasha wawa mulayilo.

Yehowa bamuene bibaabadi bakite, aye nkulungula Moyise shi: ‘Alaala kui muilo. Abakutua kunkookiela p’abo kulanguila efile a madimi.’ Moyise nkuyika ku muengie mutuale muabue abidi a Miya.

Pabaadi Moyise muifubuile peepi nabo, bapushile bantu abayimbi. Aye nkuibamona abashi na kukunamina muana a ngombe. Moyise nkufiita munda bikata. Aye nkusumbula mabue abidi a Miya mu nsenga, awo nkutanyika tupesetupese. Moyise nkuluisha yawa nkishi. Akupu, aye nkuipusha Alona’shi: ‘Nkinyi kibakukitshi uno muilo boodia kuibatadiila shi bakite uno muanda wi bino?’ Alona kuakula shi: ‘Tokambanga kufiita munda. Owuku’be nabene bi uno muilo. Abakimbanga efile, ami nkuata biamo biabo bia oolo, ne biela mu kaalo, abio nkutuusha uno muana a ngombe!’ Alona tabaadia kukita biabia nya. Moyise nkualukiila ku muengie bua kuteka Yehowa bua shi afuile muilo waye lusa.

Yehowa nkufuila baaba booso babaadi bakumiine kumukookiela lusa. Bomono buakinyi bibaadi na muulo bua bena Isalele kulonda bukunkushi bua Moyise su?

Pabaadi Moyise ku Muengie wa Sinayi, Yehowa bamulunguile bua kuibaka nshibo y’epema yabeetanyina bu Tabernakele, mubaadi Bena Isalele na kia kumulanguila. Abaadia kuikala na ngobesha ya kutuala tabernakele nsaa yabatentuluka.

Yehowa bakuile shi: ‘Lungula muilo utuushe bintu bilombeene kukuasha bua kuibaka tabernakele.’ Bena Isalele abatushiishe Ôlo, kiaamo kia arja, munyinga, mabue a muulo na bikano. Abatushile dingi buanda, lin, misokia ya nyema na bingi bintu bibungi. Abaatushile n’eshimba dia kalolo na pabaadi Moyise muibalungule shi: ‘Bibakumbana! Tanutushanga dingi sunga nkapeela.’

Ba nsendue bebungi balume na bakashi abakuashile bikata mu kuibaka kua tabernakele. Yehowa bebapeele binangu bua kufuba. Abakitshine bilukuanga ku maasa sunga bilamba bi na maleenda na biabadi balengieshe. Bangi abakitshiine bintu bia kulongamisha nabio bia mabue a muulo sunga bia mitshi.

Muilo ubaadi wibakie tabernakele nka bu bibaadi Yehowa muibalungule. Abo nkutshibuula tabernakele pabidi na kilamba kibuwa, bua kuabuula Mbalo ya kishila na mbalo Ikile Kishila. Mu mbalo Ikile Kishila nyi mubaadi musheto wa kilombeeno ubaadi ukitshiibue na mifula na kiamo kiebakanyi. Mu Mbalo ya kishila mubaadi kituudilo kia bimunyi kia oolo na meesa, na kilambuilo kia kushiikila kabaanda. Mu lupango mubaadi elonga dia munyinga na kilambuilo. Musheto wa kilombeeno ubaadi autentekiesha bena Isalele mulayilo wabo wa kukookiela Yehowa. Ouku akileesha kilombeeno su? Nyi mmulayilo wi pabuao.

Yehowa basanguile Alona na bana baaye bua kufuba mu tabernakele bu ba tshiite muakuidi. Abaadi na kia kumulama na kulambula Yehowa milambu muanka. Nka penda Alona tshiite muakuidi mukata e panundu nyi baadi na matalua a kutuela mu mbalo Ikile Kishila. Baadi emutuele musango umune ku kipua bua kukita mulambu bua miluisho yaaye, ya kifuko kiaye na miluisho ya muilo oso wa bena Isalele.

Bena Isalele abapuile kuibaka tabernakele kunyima kua kipua n’abo kutuuka mu Ejipitu. Binobino babaadi na mbalo ya kulanguila Yehowa.

Yehowa baushile tabernakele na ntumbo yaaye n’ekumbi dibaadi dibuikile kunundu kuaye. Nsaa yooso ibaadi diadia ekumbi kunundu kua tabernakele, Bena Isalele abaadi abashala yaya mbalo. Kadi pabaadi apakatuka ekumbi, abaukanga shi be na kia kukatuka yaaya mbalo. Abaadi na kia kutuala tabernakele na kulonda mbalo ibaadi ekumbi.