Kunyima kua bena Isalele kukatuka ku Muengie wa Sinayi na kukila kabaaka ka Parane, abafikile pa mbalo yabetanyina bu Kadeshe. Kuakua, Yehowa balunguile Moyise shi: ‘Tuma bana balume 12, muntu umune mu kisamba kioso, bende bu ba mpuupa mu Kanaana, nsenga yankapa bena Isalele.’ Moyise nkusangula bana balume 12 aye nkuibalungula shi: ‘Ndaayi mu Kanaana nukatale su eumbo di na nsenga ibuuwa ya bia-kudia. Nutale kalolo su muilo wi muanka wi bukome su ngubofule na kutala su wi mu bishaleelo bia bisumanga sunga mbalo ilamiibue. Ba mpuupa 12 abakatukile mu Kanaana mpa na Yoshua na Kalebe.

Kunyima kua mafuku 40, ba mpuupa nkualukiila na tukuba tua nfinyo, na bingi bikuba bibuwa. Ba mpuupa nkutuala mukandu shi: ‘Nyi nsenga ibuwa, kadi bantu be muanka be bukome, na kibundi kiabo nkiifunyishue na midimba i bula.’ Akupu Kalebe bambile shi: ‘Tui balombeene kuibatshokola. Tuendeyi mu kulua nabo!’ Ouku buakinyi Kalebe mbambile biabia su? Muanda aye na Yoshua abaadi bakulupile mui Yehowa. Kadi bangi ba mpuupa abaambile shi: ‘Nya!’ Mui balume ba bipambe be bula bukile! Atuikala’nka bu mpasu kuabadi.’

Bena Isalele nkubofula kuishimba. Abo nkubanga kuidila na kuilungusheena shi: ‘Tukimbeyi ungi mukunkushi buatudia kualukiila mu Ejipitu. Buakinyi kuenda yaaya mbalo buabadia kuituipaa?’ Yoshua na Kalebe abambile’shi: ‘Tanutombokielanga Yehowa buanudia kupusha moo. Yehowa etukaluila.’ Kadi bena Isalele tababaadi abapusha nya. Abakimbile mpa na kuipaa Yoshua na Kalebe!

Yehowa bakitshiine kinyi? Balunguile Moyise shi: ‘Sunga biekala shi nakitshiina bena Isalele bintu bibungi, bakuete’nka kupela kunkookiela. Biabia, abashaala mu kabaaka munda mua bipwa 40 muabakiebe kufuila. Nka penda bana baabo na Yoshua na Kalebe nyi abakapiana nsenga yandi mulee bua kuibapa.’

Mafuku apeela kunyima pabaadi beena Isaleele mu kabaaka, Kora, Datane na Abirame na bangi beena Isaleele 250 abaadi batombokiele Moyise. Abamulunguile shi: ‘Nubaapu kuitukookiesha! Buakinyi’nk’obe nyi e kuikala mukunkushi eetu na Alona bu tshiite muakuidi mukata e panundu? Yehowa e neetu booso, kushii penda obe na Alona.’ Tabibaadi bisangashe Yehowa nya. Bebimuene bu abamutombokiela!

Moyise nkulungula Kora na abamukuatshishenanga’shi: ‘Nufikie malooba ku tabernakele, nutuale tueso tua bishiikuanga tuwule na kabanda. Yehowa etuleesha muntu aadi musangule.’

Butookie, Kora na bantu 250 abayiile kui Moyise ku tabernakele. Abo nkushiika milambu kuanka nka bu batshiite muakuidi. Yehowa nkulungula Moyise na Alona shi: ‘Elamuneeyi munkatshi mua Kora na bantu baaye.’

Sunga byekala shi Kora bapuile kukatuka kui Moyise ku tabernakele, Datane, Abirame na bifuko biabo babapelele kukatuka. Yehowa nkulungula bena Isaleele buabadia kuisesela kula na tushibo tua mapema tua Kora, Datane na Abirame. Bena Isaleele nkukatuka musango umune. Datane, Abirame na bifuko biabo nkutuuka paasha pa tushibo tuabo tua mapema. Nsenga ibeelele mitanta musango umune ayo nkuibamina! Kaalo kabayikile muiyilu ku tabernakele, ako nkushiika Kora na bantu baaye 250.

Yehowa nkulungula Moyise shi: ‘Ata mukombo wa mukata a kisamba kioso ofunde eshina dia oso a kuabadi ku mukombo waye. Kadi ku mukombo wa Leevi, ofunde eshina dia Alona. Weyituule munda mua tabernakele, mukombo wa muntu ankiebe kusangula, aumene bilongo.’

Pa bubatokiele Moyise batushiishe mikombo yoso eyileesha bakunkushi. Mukombo wa Alona ubabangile kumena na kutuusha bilongo, na bikuba bia amande bimongie. Mu kiakia kipaso, Yehowa nkuleesha patooka shi naaye basanguile Alona bua kuikala bu tshiite muakuidi mukata e panundu.