Pabaayiile ba mpuupa ba Bena Isalele muiumbo dia Yeriko, abatuelele mu nshibo ya Rahabe. Nfumu a Bena Yeriko batumine basalayi ku nshibo ya Rahabe. Aye nkufia ba mpuupa babidi mu kisasa na kutuma basalayi ku lungi lupese. Balunguile ba mpuupa shi: ‘Nenukuasha muanda nauku shi Yehowa e neenu akenupa dino eumbo. Anka, tshipayi shi anukampaasha na kifuko kiande.’

Ba mpuupa abalunguile Rahabe’shi: ‘T’akui kintu su nkimune kibubi akikafikila ba mu nshibo yobe.’ Abamulunguile dingi shi: ‘Anya uno mooshi umonga kuididishi dia nshibo yoobe, Bena kifuko kiobe abakapanda.’

Rahabe nkutadiila ba mpuupa buabadia kuyika ku mooshi ubaadi muanye kuididishi diaye. Abayile ku myenge, abo nkufuama kuakua munda mua mafuku asatu kumpala kuabadia kualukiila kui Yoshua. Akupu Bena Isalele nkusabuka Muela wa Yoordano na kuilumbuula bua kuata nsenga. Yeriko baadi Kibundi kia kumpala kibaabadi batshokole. Yehowa nkuibalungula buabadia kuifuunya Kibundi musango umune kuifuku dioso munda mua mafuku asamombo. Muifuku dia musambo, abaadi beefuunye Kibundi misango musambo. Akupu ba tshiite muakuidi abeelele mpungi, basalayi namu abaadi basame na mayi e bukopo. Midimba ya Yeriko ibaaponene! Anka Rahabe na ba mushibo yaabo abaadi muanka abapandile. Rahabe na kifuko kiaye abapandile muanda baadi mukulupile mui Yehowa.

Mukandu wa kibundi kia Yeriko ubaadi upalakane mu bibundi bioso bia mu Kanaana. Ba nfumu baabio nkuata mpango ya kufika mu kuluisha bena Isalele ngoshi. Anka bena Gibeone abaatshile ingi mpango. Abafikile kui Yoshua bafuale bilamba bisanukie abo nkuakula shi: ‘Tubafiki kuiumbo di kula. Tuibapushe nkumo pabitale Yehowa na bioso biadi muinukitshiine mu Ejipitu na mu Moabe. Etuleyi namu’shi, t’anulu netu ngoshi atuikala bapika benu.’

Yoshua nkukumiina kukita nabo kilombeno bua kupela kuibaluisha ngoshi. Kunyima kua mafuku asatu, baadi muukie shi tabaabadi bafikie kula nya. Abaakatukile mu nsenga ya Kanaana. Yoshua nkuipusha bena Gibeone shi: ‘Buakinyi nubetudimbi?’ Abo nkualuula shi: ‘Atutshiinanga! Atuuku shi Yehowa Efile Mukulu eenu kuete kuinuluila. Tanuituipanga namu.’ Yoshua nkulama mulayilo waye, aye nkuibaleka na muwa.

Mu angi mafuku, ba nfumu batano ba mu Kanaana na basalayi baabo abakimbile nkatuuka bena Gibeone ngoshi. Yoshua na basalayi baaye abatambukile bufuku bushima bua kuibapaasha. Abaluile ngoshi bufuku bushima mpa na ku namashika. Bena Kanaana nkubanga kusuuka mu mpese yoso. Koso kubaabadi abasuukila, Yehowa baadi ebaponeesha mabue akata. Akupu Yoshua nkuteka Yehowa bua kuimika nguba mbalo imune. Buakinyi batekiele Yehowa bua kukita biabia, aku namu kasha tabiabandile kukitshika? Muanda Yoshua baadi mukulupile mui Yehowa. Nguba tabaadi musaane efuku dishima na pabapuile bena Isalele kutshokola ba nfumu ba bena Kanaana na basalayi baabo.