Kunyima kua kukunkusha muilo wa Yehowa munda mua bipua bibungi, Yoshua bafuile na bipua 110. Bena Isalele abaadi abalanguila Yehowa pabaadi Yoshua na muwa. Kadi kunyima kua lufu lua Yoshua ababangile kulanguila ma nkishi, nka bu bena Kanaana. Yehowa baadi mutadiile nfumu Yabine muina Kanaana bua kuibakiengiesha muanda tababaadi abamutumikila nya. Muilo nkusendeela Yehowa buadia kuibakuasha. Yehowa nkuibapa Barake bu mukunkushi mupia. Baadi mulombeene kukuasha muilo bua kualukiila kui Yehowa.

Debora, mutemuki mukashi, baadi muitanyishe Barake. Baadi na mukandu umutale aufiki kui Yehowa ubaadi awamba’shi: ‘Ata balume 10 000, nwende nukafumankane na kiluilo kia Yabine ku muela wa Kishone. Kuakua, okatshokola Sisera, nfumu a kiluilo kia Yabine. Barake nkulungula Debora shi: ‘Su we naami, nende.’ Debora bamulunguile shi: ‘Nende nobe. Anka uuka shi ta nobe akiebe kuipaa Sisera. Yehowa mmupue kuakula shi muana mukashi nyi akamuipaa.’

Debora nkuenda na Barake na kiluilo kiaye ku muengie wa Tabore mu kuilumbuula bua ngoshi. Pabapushile Sisera uno muanda, babungile matempu aaye, nkuimana muibanda. Debora nkulungula Barake shi: ‘Lelo, Yehowa akupa nkumo.’ Barake na bantu baye 10 000 nkubanga kuika ku muengie bua kuakana na basalayi be bukome ba Sisera.

Yehowa nkuusha muela wa Kishone. Matempu a Sisera nkubanga kushinama mu matekie. Sisera nkuleka etempu diaye nkubanga kusuuka. Barake na basalayi baaye nkutshokola basalayi ba Sisera, kadi Sisera nkusuuka! Basuukile akafuama mu nshibo y’epema ya muana mukashi a betamina bu Yaele. Yaele nkumupa mabeele buadia kutoma, akupu aye nkumubuikila mulengietshi. Sisera nkulaala bu bibaadi mukookie. Akupu, Yaele kuenda bipelabipeela kuadi, aye nkumushimika kiluu ku mutue, Sisera nkufua.

Barake bafikile na kukimba Sisera. Yaele nkutuuka mu nshibo yaaye y’epema amulungula’shi: ‘Fika, na nankulesha muntu okuete kukimba.’ Barake nkutuela munda, aye nkusangana Sisera mulaale kitanda. Barake nkutumbisha Yehowa na loono bua kutshokuela bena Isalele ngoshi kui beshikuanyi nabo. Bena Isalele abaadi na butaale munda mua bingi bipua 40.

Mu mafuku abatuelele nsala mu Isalele, ungi muina Isalele abetanyina bu Naomi bakatukile kuabo enda ku Moabe na mulume aaye na bana baabo balume babidi. Kunyima kua mafuku mulume a Naomi bafuile. Bana baye nkuibakila Luuta na Orpa babaadi bena Moabe. Bana baaye babidi n’abo’nyi abafuile.

Pabapushiishe Naomi shi nsala ibaapu mu Isalele, baatshile kitshibilo kia kualukiila kuabo. Luuta na Orpa abayiile naye, p’abaabadi muishinda, Naomi bebalunguile shi: ‘Nuikeele bakashi bebuwa kui bana bande, nuibekale bakasha-muana bebuwa kuandi. Nakiebe’shi nutuele dingi ku malunda. Biabia, alukiilayi kuenu ku Moabe.’ Abo nkumulungula shi: ‘Tui noobe kifulo! Tatukumiina nkuleka nya.’ Naomi nkutungunuka na kuibalungula buabadia kualukiila. Orpa nkuwuka kualukiila, kadi Luuta bashadile. Naomi nkumulungula shi: ‘Orpa, baalukiila kui bakuabo na kui b’efile baaye. Alukiila naaye na wende ku kibundi kia nyinoobe.’ Kadi Luuta bamulunguile shi: ‘Ntankulekie’mi. Muilo oobe awikala muilo wande, na Efile Mukulu oobe ekala Efile Mukulu ande.’ Omono shi Naomi bapushile naminyi pa kupusha bibaambile Luuta?

Luuta na Naomi abafikile mu Isalele mu kipungo kia kuumbula. Dingi efuku Luuta nkuenda mu kupumbuula ntete muifuba dia muntu abetaanyina bu Boaze baadi muana a Rahabe. Bapushishe shi Luuta muina Moabe bashadile na lulamato kui Naomi. Aye nkulungula bena mufubo baaye buabadia kuleka ndambo ya ntete muifuba bua Luuta.

Kiakia kioolua, Naomi bayipuishe Luuta shi: ‘Mmuifuba dia nnanyi mubokafubila?’ Luuta nkumulungula shi: ‘Mmuifuba dia muntu abeetamina bu Boaze.’ Naomi nkumulungula shi: ‘Boaze ngumune a ku bena kifuko kia mulume ande. Tungunuka na kufuba muifuba diaye na bangi ba nsonguakashi. Kuadi nyi kokapetela bulami.’

Luuta nkutungunuka na kutumika muifuba dia Boaze mpa’nka na pabapuile kipungo kia kuwumbula. Boaze bamuene shi Luuta mmukashi e buwa afubu kalolo. Mu aa mafuku, su muana mulume baafu kushi kutanda muana mulume, mukuabo mulume baadi na kia kuibakila yawa mukashi kilele. Nyi buakinyi Boaze baadi muibakile Luuta. Abatandile Obede, aye bafikile kunyima bu nshaye kulu na Nfumu Davide. Ba loole ba Naomi abapushishe muloo ukata. Abo nkumulungula shi: ‘Kia kumpala, Yehowa mmukupe Luuta, baadi mukulamate bikata, binobino boopete muikulu. Yehowa atumbishibue.’