Bena Isalele abatapile dingi Yehowa mongo, babanga kulanguila b’efile ba madimi. Munda mua bipua musambo, bena Madiane abaadi bayibe nyema ya bena Isalele na kuluisha bikunuanga biaabo. Bua kusuuka bena Madiane, bena Isalele abakafuamine mu mbuebue, na ku miengie. Ababangile kuidila kui Yehowa buadia kuibapaasha. Nyi Yehowa nkutuma muikeyilu kui ungi nsongualume abetanyina bu Gideone. Muikeyilu bamulunguile shi: ‘Yehowa bakusangula bua kuikala kimankinda kia ngoshi.’ Gideone bamuipuishe shi: ‘Ne kupaasha Isalele naminyi? Ne mukile bukinga.’

Gideone baadia kuuka naminyi shi Yehowa nyi baadi mumusangule? Baadi muate kipese kia kilamba kia buanda ekiadisha mu nsenga alungula Yehowa shi: ‘Ku namashika, su lume luekala penda pa kilamba, dingi su nsenga yoso yashaala yuume, nauku shi okumiina buandia kupaasha Isalele.’ Butookie, kilamba kibaadi kibombe na lume kadi nsenga ibaadi yuume! Kadi Gideone batekiele dingi Yehowa’shi, malooba namashika nakiebe kilamba kikale kiume na nsenga ikale ibombe na lume. Pabibaadi bilombane, Gideone baadi mushinkamishe binyibinyi’shi Yehowa baadi mumusangule. Gideone babungile basalayi baye bua kulua na bena Madiane.

Yehowa balunguile Gideone’shi: ‘Naapa bena Isalele matalua a kutshokola. Kadi tomonanga’shi nui kutshokola ngoshi anue banabeene pa muanda wa basalayi bebungi nya. Lungula booso be na moo baalukiile ku mashibo aabo.’ Basalayi 22 000 nkualukiila, ako nkushaala penda 10 000. Akupu Yehowa nkulungula Gideone’shi: ‘Basalayi bakii bungi. Enda nabo ku mema webalungule bua kutoma mema. Olame nka penda baaba abashaala bapasukie bua kutala beshikuanyi nsaa yabatomo.’ Nkapenda bantu 300 nyi abashadile bapasukie p’abaadi abatomo mema. Yehowa bebalayile’shi baaba bantu bapela abakatshokola basalayi 135 000 ba bena Madiane.

Mu buabua bufuku, Yehowa nkulungula Gideone’shi: ‘Nsaa ya kulua na bena Madiane ibalombana!’ Gideone baadi mupe basalayi baaye mpungi na malondo e munda bisumanga pamune na biengie bia kaalo. Aye nkuibalungula’shi: ‘Talayi kuandi, bua’shi nukite kalolo nkabu’mi.’ Gideone nkuela mpungi, nkutanya elondo diaye na nkutembesha kiengie kiaye kia kaalo, aye nkusama’shi: ‘Lupete lua ngoshi lua Yehowa na lua Gideone!’ Bantu booso 300 abakitshiine nka biabia. Bena Madiane nkupusha moo ukata abo nkusuuka mu mpese yooso. Mu kaaka kafuutakanyi, ababangile kuitapeena abo banabeene. Yehowa bakuashishe dingi bena Isalele bua kutshokola beshikuanyi nabo.

Ungi muina Isalele abeetamina bu Elkana baadi na bakashi babidi, Aana na Penina, kadi baadi mufule Aana bikile. Penina baadi asepe Aana muanda tabaadi na muana kadi Penina baadi na bana bebungi. Kipua kioso, Elkana baadi aata kifuko kiaye bua nkalanguila ku Shilo mu tabernakele. P’abaadi kuakua, Elkana baadi mumone Aana mmuinyongole bikata. Aye nkumulungula shi: ‘Leka kudila Aana. We nami. Ne mukufule.’

Kunyima Aana bayile mu kusambila bupenka buaye. Tabaadi oobesha kuleka kudila pabaadi atekie Yehowa bua kumukuasha. Aye nkulaa’shi: ‘Yehowa, su napeta muana mulume, nakulambula anka buadia nkufubila mu muwa waye ooso.’

Tshiite muakuidi Mukata e panundu Eliya, baadi mumone Aana kuakuete kuwunawuna, aye nkumona’shi mmukolue. Aana bamualuluile shi: ‘Nya muanana, ntshi mutome malofu nya. Ne na muanda ukata, nyi wankuete kulungula Yehowa.’ Eliya batunduile shi baadi mumukokoshe kuishimba aye nkumulungula shi: ‘Efile Mukulu akupe kibomutekie.’ Aana bapushiishe muloo aye nkualukiila kuaye. Kumpala kua shi kipua kilombane, batandile muana amuudika bu Samuele. We kupuandikisha muloo ubaadi nao Aana su?

Aana tabaadi mulube mutshipo ubaadi mulee Yehowa nya. Kunyima nka kua’ye kutshiba Samuele kuibeele, baadi mumutuale ku tabernakele bua kufuba. Aana nkulungula Eliya’shi: ‘Nyi winyi muana anaadi neelela luteko. Namulambula Yehowa bua mafuku aaye oso.’ Elkana na Aana abaadi abende mu kutembela Samuele ku kipua kioso na kumutuadilanga bilamba bipia bia mufubo. Yehowa baadi mupe Aana bangi bana balume basatu na bana bakashi babidi.