Yehowa balunguile Samuele’shi: ‘Enda mu nshibo ya Yesee. Umune a ku bana baaye ekala nfumu a kabidi mu Isalele.’ Samuele bayile mu nshibo ya Yesee. Nsaa ibamuene muana mbedi a Yesee, belele kinangu’shi: ‘Uno nsongualume nyi’ye uno.’ Kadi Yehowa balunguile Samuele’shi: Ta ngiawa nya. Yehowa bakuile’shi: ‘Natalaa eshimba dia muntu, kushii biamueneka.’

Yesee batushishe dingi bana baye basamombo. Samuele bakuile’shi: ‘Yehowa tamusangule su ngumune a ku banka nya. Tue na bangi bana? Yesee bambile’shi: ‘Kukii kushaale mukile bukinga ku boso, Davide. Ee mu kudiisha lombe lua nyema.’ Pabaadi Davide mualukie, Yehowa balunguile Samuele’shi: ‘Nnaye yawa!’ Samuele nkupongoola muimu ku mutue wa Davide, aye nkumusangula bua’shi akekale nfumu mu Isalele.

Kunyima kua mafuku, bena Isalele abaadi mu ngoshi na bena Filistine, bena Filistine abaadi na kilobo kiabayitamina bu Goliate buadia kuibaluila ngoshi. Efuku dioso, Goliate baadi’nka asepe bena Isalele. Baadi muele musase’shi: ‘Ntumineyi muntu afikie alue nami. Su bantshokola atuikala bapika benu. Anka su namutshokola anuikala bapika beetu.’

Davide baafikile ku lupese lua bena Isalele mu kupa ba tuutu baaye abaadi basalayi bia kudia. Pabapushiishe Goliate, akula biabia, Davide bambile’shi: ‘Nalu naaye!’ Nfumu Saule nkumulungula’shi: ‘Okii muana mukinga.’ Davide nkumualula’shi: ‘Yehowa ankuasha.’

Saule bakimbile’shi Davide afubishe bina ngoshi biaye, kadi Davide nkumulungula’shi: ‘Ta ngobesha kulua nabio nya.’ Davide baatshile ndundo yaaye nkualaala ku muela. Aye nkusangula minoono itaano nkuiyela mu kampaaya. Akupu bayile kui Goliate. Kiakia kilobo nkuela musaase’shi: ‘Fika pano muan’abe. Bua’shi mpe toonyi tua muiyilu na nyema ya mapia muita oobe.’ Davide tabaadi na moo nya. Aye namu nkuela waye musaase’shi: ‘Ofiki kuandi na muele wa ngoshi na mulumbu ukata na upeela, kadi ami nafiki kodi muishina dia Yehowa. T’oolu neetu nya; Efile Mukulu oolu naye. Bantu boso bebungie pano abakauku’shi Yehowa t’apashaa na lupete lua ngoshi sunga na mulumbu, akenupaana anue boso mu maasa muetu.’

Davide nkuela munoono mu ndundo yaaye, aye nkuiyifunyisha na bukome buaye booso. Ku bukuashi bua Yehowa, munoono ubaatukile awo nkuasa Goliate mu mpala. Kilobo kia balume nkuikupila mu nsenga akio nkufua. Bena Filistine nkusuuka booso. Okuete kukulupila mui Yehowa bu bibakitshine Davide su?

Kunyima kua Davide kuipaa Goliate, Nfumu Saule bamutudile bu nfumu a kiluilo kiaye. Davide baadi mutshokole ngoshi misango ibungi, aye nkuenda nkumo. Pabaadi Davide mualukile mu kulua ngoshi, bana bakashi abafikile na kusha na kuyimba na kuakula’shi: ‘Saule bayipaa binunu, Davide namu binunu makumi!’ Saule baadi mukuatshile Davide kiutu abanga kukimba bia kumuipaa.

Davide baadi ayimbi na luseese kalolo. Dingi efuku pabaadi ayimbila Saule, Nfumu belele Davide mulumbu. Anka Davide baadi muepe, ao nkukashimata ku mudimba. Kubanga’nka paapa, Saule bakimbile bipaso bibungi bua kuipaa Davide. Davide basuukile aye nkafuama mu kabaaka.

Saule baatshile kiluilo kia bantu 3 000 bua kukimba Davide. Saule batuelele mu lubuebue mubaadi Davide na bantu baaye bafuame. Bantu ba Davide nkumulungula’shi: ‘Nyi efuku dilombeene shi oyipaa Saule dino.’ Davide nkuenda bipeelabipeela kui Saule, aye nkutshiba luembe lua kikotshi kia nfumu. Saule tabaadi muukie nya. Akupu, Davide bapushiishe bibubi’shi tamuleeshe kanemo kui nfumu muediibue muimu a Yehowa nya. Davide tabaadi mutadiile bantu baaye buabadia kulua na Saule nya. Baadi mpa na muitanyine Saule, amulungula’shi badia kumuipaa pa kuikeele mushindo. Saule baadi mushintuule binangu biaye pabitale Davide su?

Nya. Baadi’nka akimbi kuipaa Davide. Dingi efuku bufuku, Davide na muipua aaye Abishai abatuelele bipeela bipeela pa mbalo ibaadi Saule. Mpa nka na Abnere mulami a Saule baadi mulaale. Abishai nkuamba’shi: ‘Mmuabi wetu uno! Ntadiile muipee.’ Davide nkumualuula’shi: ‘Yehowa nabeene amuipaa. Ata nka penda mulumbu waye na kasupa kaye ka mema tuende.’

Davide nkukaamina pa buipi na muengie bua kuilamina mbalo ibaadi Saule. Belele musaase’shi: ‘Abnere, buakinyi tue mulame nfumu oobe? Mulumbu wa Saule na kasupa kaaye ka mema bikunyi?’ Saule batunduile eyi dia Davide aye nkuakula’shi: ‘Bodia kungipaa, anka tue mungipee nya. Neuku’shi nnobe ayikala nfumu mu Isalele.’ Saule baadi mualukie ku nshibo yaaye. Ta mbena kifuko kioso kia Saule babaadi bashikue Davide nya.