Yonatane muana a kumpala a Nfumu Saule baadi kilobo kia ngoshi. Davide bambile’shi e lubilo nka bu mumba na bukome nka bu ntambue. Dingi efuku Yonatane bamuene basalayi 20 ba beena Filistine ku muengie. Aye nkulungula musalayi aaye’shi: ‘Atulu nabo nka su Yehowa betupa kitunduilo. Su bena Filistine abetulungula bua kukaamina kuabadi, paapa atumono bia kulua nabo.’ Bena Filistine nkuibeela musaase’shi: ‘Kaminaayi buatudia kulua ngoshi!’ Abo nkukamina bubidi buabo nkuibatshokola.

Bu bibaadi Yonatane bu muana a kumpala a Saule, baadi na kia kuikala muntu a kabidi mu mulongo wa ba nfumu. Kadi Yonatane baadi auku’shi Yehowa baadi musangule Davide bua kuikala nfumu a kabidi mu Isalele, Yonatane tabaadi mumukuatshile kiutu nya. Aye na Davide abafikile ba kuuku. Abaadi belayisheene bua kulama na kukaluila umune na mukuabo. Yonatane bapeele Davide kikotshi kiaye, lupete luaye na kumuinamina bu kitunduilo kia bu kuuku buabo.

Pabaadi Davide asuuku nfumu Saule, Yonatane bayile kuadi amulungula’shi: ‘Kankamana onyingie’eshimba. Yehowa mmukusangule bua kuikala bu nfumu. Sunga nshami auku biabia.’ Okumiina kuikala na kuuku e buwa bu Yonatane su?

Misusa ibungi, Yonatane batudile muwa waaye mu masaku bua kukuasha kuuku aye. Baadi muukie’shi Saule akimbi kuipaa Davide. Nyi aye nkulungula nshaye’shi: ‘Abiikala muluiisho ukata su boyipaa Davide; ta mukite kintu kii bubi nya.’ Saule nkufiitshila Yonatane munda. Kunyima kua bipua, Saule na Yonatane abafuile ku ngoshi.

Kunyima kua lufu lua Yonatane, Davide bakimbile Mefiboshete muana a Yonatane. Pabaadi Davide mumupete, bamulunguile’shi: ‘Pa muanda wa bibaadi nshobe bu kuuku’ande a p’eshimba, abitungu nkupasukile muanda mua mafuku oso wekala na muwa. Wekala pamune nami na kudia naami pa mesa ande.’ Davide tabaadi mulube kuuku’aye Yonatane nya.

Pabafuile Saule, Davide bekele bu nfumu. Baadi na bipua 30. Bipua bipeela kunyima kuaye kuikala bu nfumu, bamuene ungi muana mukashi e buwa ku kiolua pabaadi ku kisasa kia nshibo. Davide nkushinguula shi baadi Bate-sheba, mukashi abaabadi bebakile kui ungi musalayi abetamina bu Uriya. Davide nkuitamisha Bate-sheba kuaye. Abo nkutambuka lusandi aye nkupeta eyimi. Davide nkutompa kufuamisha bibaadi mukite. Aye nkulungula mukata a basalayi buadia kutuula Uriya ku mulongo wa kumpala wa ngoshi na kumutadiila. Abayipayile Uriya ku ngoshi, Davide nkuibakila Bate-sheba.

Anka Yehowa bamuene bubi booso bubaadi bukidikie. Badia kukita kinyi? Yehowa batumine mutemuki Natane kui Davide. Natane nkumulungula’shi: ‘Kui mpeta baadi na mikooko ibungi, mulanda baadi penda na ka mukooko kakakashi kabaadi mufule bikata. Yawa mpeta baatshile mulanda ka mukooko kaaye.’ Davide baafiitshile munda aye nkumulungula shi: ‘Yawa muntu mmukumbeene lufu!’ Nyi Natane nkulungula Davide’shi: ‘Yawa muntu nnobe!’ Davide nkuinyongola bikata kuishimba aye nkulungula Natane’shi: ‘Nakitshiina Yehowa muluisho.’ Uno muluisho ubaadi utushiishe Davide nkalakashi ibungi na kifuko kiaye. Yehowa nkunyooka Davide, kadi amuleka na muwa muanda baadi mululame na muiyishe.

Davide baadi na lukalo lua kuibakila Yehowa ntempelo, kadi Yehowa nkusangula Salomone muana a Davide bua kuibaka ntempelo. Davide babangile kulumbuluila Salomone bintu p’aye kuakula’shi: ‘Abitungu ntempelo a Yehowa ekale ebuwa. Kadi Salomone kii mukinga, anka namukuasha bua kumulumbuluila bintu.’ Davide baadi mutuushe nfualanga yaaye ibungi bua midimo ya luibako. Aye nkukimba bafubi ba midimo ya bu nsendue. Abunga oolo na kiamo kiebakanyi na mitshi ibuwa ya mu Tire na ya mu Sidone. Kumpala kua kufua, Davide baadi mupe Salomone kifuatulo akilesha bipidi bia kipaso kia kuibaka ntempelo. Aye nkuakula’shi: ‘Yehowa banfudila bino boobe. Yehowa akiebe nkukuasha. Topushanga moo nya. Ikala munyingie wepaane ku mudimo.’