Kunyima kua Salomone kuikala nfumu a Isalele, Yehowa bamutekiele’shi: ‘Nkinyi Kiodi nakio lukalo kiandia nkupa.’ Salomone bamulunguile’shi: ‘Ami nkii nsongualume ntangukile’nka bia kumunana nya. Abitungu ompe namu kinangu bua kukunkusha muilo oobe.’ Yehowa nkumulungula’shi: ‘Bu bibontekie kuikala na binangu, nakuikasha na kushinguula kua mianda bishekeele na ungi muntu pa nsenga. Nakupa bupeta buibungi. Akupu su bonkookiela, nakuikasha na mafuku e bungi pa nsenga na muwa.’

Salomone nkubanga kuibaka ntempelo. Baadi mufube na ôlo e buwa na kiamo kia arja, mabaaya, na mabue. Bantu binunu abauku midimo ya bu nsendue abaadi bafube ku ntempelo. Kunyima kua bipua musambo, ntempelo baadi mulombane bua kumulambula Yehowa. Baadi na kitapilo, muabaadi abalambuila milambu. Salomone bakunamine kumpala kua kilambuilo ateka’shi: ‘Yehowa, bukata sunga buwa bua uno ntempelo ta mbukulombanyiine nya, anka, kumiina namu kuteemesha lulanguilo luetu na kupusha nteko yetu.’ Yehowa bapushiishe naminyi bua ntempelo na luteko lubeelele Salomone? Musango umune kunyima kua’ye kupudisha luteko luaye, kaalo kabayikile muiyilu, ako nkushiika mulambu ubaadi pa kitapilo. Yehowa baadi mukumiine ntempelo. Pabamuene bena Isalele biabia, abapushishe muloo ukile.

Abaadi abauku Nfumu Salomone bua kinangu kiaye mu Isalele mpa na mu ma mbalo e kula. Bantu babaadi abafiki kui Salomone bua kupeta bukuashi ku mianda yabo. Mpa na nfumu mukashi a mu Sheba bafikile mu kumutompa na nkonko ibukopo. Pabapushiishe bibaadi mumualuule, bambile’shi: ‘Ntshinaadi mukumiine bibaadi abiakula bantu pabikutale, bua binobino nemuena’shi we na kinangu kikile na biabakulanga. Efile Mukulu oobe, Yehowa mmukuelele miabi.’ Bena Isalele abaadi na nshalelo ebuwa na bantu booso abaadi na muloo. Kadi mianda ibaadi ishintulukie.

Kubaadi butaale mu Isalele munda mua mafuku oso abaadi Salomone alanguila Yehowa. Anka Salomone baadi muibakile bakashi bebungi ba mu angi maumbo, abaadi abalanguila ma nkishi. Ku kapeela kapeela, Salomone baadi mushintulukie, abanga kulanguila naye namu ma nkishi. Yehowa baadi mufiite munda. Aye nkumulungula’shi: ‘Isalele akatshibuulua ku kifuko kiobe, akeabuula mu bipindi bibidi. Kipindi kikata nakekipa umune a ku bafubi bobe, anka kifuko kiobe akimunana kapindi kapeela.’

Yehowa baadi mupatuule kitshibilo kiaye mu ungi mushinido. Umune a ku bafubi ba Solomone Yeroboame, baadi ende muishinda, aye nkufumankana na mutemuki Abiya. Abiya nkusaana nkandio aaye mu tupese 12, aye nkulungula Yeroboame’shi: ‘Yehowa akakatusha bufumu bua Isalele mu kifuko kia Salomone na kuibuabuula pabidi. Ata bipindi ekumi, muanda nnobe akekala nfumu mu bisamba ekumi.’ Nfumu Salomone pabaadi mupushe uno muanda, bakimbile bia kuipaa Yeroboame! Yeroboame nkusuuka, nkuenda mu Ejipitu. Salomone bafuile, kadi muana aaye Roboame nkumupiana bu nfumu. Akupu Yeroboame nkupusha’shi bibaadi na muulo buadia kualukiila mu Isalele.

Bakulu ba mu Isalele abaadi balungule Roboame’shi: ‘Su okunkusha bantu bibuwa, abakukookiela.’ Kadi ba kuuku baaye ba nsongualume nkumulungula’shi: ‘Abitungu kuikala n’eyiso dibukopo kui muilo! Ebafubishe bibukopo!’ Roboame nkukookiela elango dya ba kuuku baaye. Baadi na bukielo kui muilo, ao nkumutombokiela. Abaatuudile Yeroboame bu nfumu a bisamba ekumi, abaadi abebuwuku bu bufumu bua Isalele. Bino bingi bisamba bibidi abaadi abebiwuku bu bufumu bua Yunda, bibaadi bishaale na lulamato kui Roboame. Bisamba 12 bia Isalele bibaadi biabuule.

Yeroboame tabaadi akumiina’shi muilo waye ukalanguile ku Yelusalema kubaadi bufumu bua Roboame nya. Weuku shi mbuakinyi? Yeroboame baadi atshinyi’shi tala muilo waye wamupela bua kukuatshishena Roboame. Bakitshiine tuana tua ngombe tua ôlo tubidi alungula muilo’shi: ‘Yelusalema ee kula kukile. Nui kulanguila pano.’ Muilo nkubanga kulanguila tuatua tuana tua ngombe abo nkuyiluankana dingi Yehowa.