Bufumu bua bisamba ekumi bua beena Isalele bubaadi na ba nfumu b’ebubi, anka, Akabe baadi mukilekile bubi. Baadi muibakile mukashi mubi baadi alanguila Baale. Diaye mbu Yezabele. Akabe na Yezabele abaushiishe eumbo na lulanguilo lua Baale abo nkuipayisha batemuki ba Yehowa. Yehowa bakitshiine naminyi? Baadi mutume mutemuki Eliya na mukandu kui Akabe.

Eliya balunguile Nfumu Akabe’shi, pa muanda wa bubi buaye, takubaadi na kia kunoka mpeshi mu Isalele nya. Munda mua bipua bikile ku bisatu, takubaadi mitshi ayikulu, bantu nkukienga na nsala. Kunyima Yehowa batumine Eliya bua kualukiila kui Akabe. Nfumu nkumulungula’shi: ‘Nnobe mutuadile Isalele malua! Bino bioso abikitshika nkilema kiobe.’ Eliya nkumualuula’shi: ‘Ta naami mufuishe uno munanga nya. Nui beufuishe pa kulanguila Baale. Abitungu tuitompene bua kuuka. Bunga muilo oso na batemuki ba Baale ku Muengie wa Karmele.’

Muilo ubeebungile ku muengie. Eliya bambile’shi: ‘Sangulayi kianudia kukita. Su Yehowa nyi Efile Mukulu a binyibinyi, mulondeyi. Su nyi Baale, mulondeyi. Atukitshi uno muanda, abitungu batemuki ba Baale 450 balumbuule mulambu, akupu betamine efile aabo, ami namu nalumbuula mulambu n’etamine Yehowa. Yawa atuusha lualuulo na kaalo, nyi Efile Mukulu a binyibinyi.’ Muilo nkukumiina.

Batemuki ba Baale nkulumbuula mulambu. Abo nkuitamina efile aabo’shi: ‘Oo Baale etualuule!’ Pabaadi Baale mukutue kualuula, Eliya babangile kuibasesamisha. Bambile’shi: ‘Muitamineyi n’eyi dibukopo pangi enualuula. Pangi e mu tulo, abitungu muntu a kumubuusha.’ Batemuki ba Baale abaadi bayididiile na kuitamina mpa na kukiolua. Anka tabaadi muibaluule nya.

Eliya nkutuula waye mulambu ku kilambuilo, abo nkuiupongoluela mema. Akupu aye nkuteka’shi: ‘Oo Yehowa, bakuukie shi noobe Efile Mukulu a binyibinyi.’ Yehowa batumine musango umune kaalo muiyilu kabashikile mulambu. Bantu nkusama’shi: ‘Yehowa nyi Efile Mukulu a binyibinyi!’ Eliya nkuakula shi: ‘Tanupashanga mutemuki su ngumune a Baale!’ Abo nkuipaa batemuki 450 ba Baale mu diadia efuku.

Pabamuekiele kakumbi kapeela ka mpeshi dia ku muela, Eliya balunguile Akabe shi: ‘Kui kipapi kikata kia mpeshi. Ata etempu diobe walukile ku nshibo.’ Eyilu nkufiita na makumbi, kipapi nkupuka, mpeshi e bungi nkupongoloka. Nfudiilo a bioso munanga ubapuile. Akabe nkuata etempu diaye nkuenda lubilo luaye looso. Ku bukuashi bua Yehowa, Eliya basuukile lubilo kukila lua etempu! Kadi mianda ya Eliya, ibaadi ifudiile nka paapa su? Tubande kutala.

Yezabele bapushiishe bibaadi bikitshikile batemuki ba Baale, aye nkufiita munda bikata. Aye nkutuma mukandu kui Eliya’shi: ‘Malooba, abakuipaa namu nka bu batemuki ba Baale.’ Eliya nkupusha moo, aye nkusuuka mu kabaaka. Aye nkuteka’shi: ‘Yehowa ntshi na kuandia kuenda dingi nya. Ntadiile nfue.’ Na kukooka kooso, Eliya balaadile tulo muushi mua mutshi.

Muikeyilu bamubushishe, amulungula na kalolo koso’shi: ‘Buuka odie.’ Eliya bamuene mukate ushiikue pa mabue apie kaalo na kalondo ka mema. Aye nkudia na kutoma, akupu nkualukila dingi mu tulo. Muikeyilu nkumubuusha dingi amulungula’shi: ‘Dia. Abitungu opete bukome bua luendo.’ Eliya nkudia dingi. Akupu aye nkutambuka munda mua mafuku 40 bufuku na kaanya, mpa na bibakafikile ku muengie wa Horebe. Kuakua, Eliya baladile mu lubuebue. Kadi Yehowa baadi muisambe naye. Amuipusha shi: ‘Okuete kukita kinyi paapa Eliya?’ Eliya nkumualuula’shi: ‘Bena Isalele abakutua kulombasha mulayilo wabo. Abaluisha kilambuilo na kuipaa batemuki boobe. Binobino tabakimbi na kungipaa dingi.’

Yehowa nkumulungula’shi: ‘Enda okemane ku muengie.’ Kia kumpala, kubeelele kipapi kikata kibakiebele kutanya mbuebue. Akupu kubaadi kutshinka kua nsenga na kaalo. Ku nfudiilo, Eliya bapushiishe kapapi kapeela, n’eyi ditaale. Aye nkubuikila mpala yaaye na kilamba, aye nkuimana paasha pa lubuebue. Yehowa nkumuipusha buakinyi baadi asuuku. Eliya nkuakula’shi: ‘Nashala nka bupenka.’ Kadi Yehowa nkumulungula shi: ‘Tue bupenka nya. Kukii bantu 7 000 mu Isalele bakia bandanguila. Enda osangule Elisha bu mutemuki pa mbalo yoobe.’ Eliya nkuenda musango umune mu kukita bibamulunguile Yehowa. Omono’shi Yehowa e nkukuasha namu p’okimbi kukita biakumiina su? Oolo, e nkukuasha. Tubande kutala pabitale muanda ubaadi ukitshikie mu munanga.