Mu mafuku a munanga, Yehowa balunguile Eliya’shi: ‘Ebue wende ku Sarepta. Mukashi kilele akakupa bidiibua kuakua.’ Ku kituelelo kia kibundi, Eliya bamuene mukashi kilele mulanda asangula nteete. Aye nkumuteka ekopo dia mema. Pabaadi ende mu kumutuadila, Eliya nkumulungula dingi’shi: ‘Ntuadile namu kipese kia mukate.’ Yawa mukashi bamulunguile’shi: ‘Ntshi na kintu su nkimune kilumbuule nya. Ne’nka penda na tu bukula tupeela na ndambo a muimu buandia kuteekiela muana’nde n’ami nabeene.’ Eliya nkumulungula’shi: ‘Yehowa amba’shi: Elondo dia bukula t’adipu, kiasa kia muimu t’akikama mpaa na kuifuku adikanoko mpeshi.’

Mukashi kilele bayile, aye nkukitshiina mutemuki a Yehowa mukate. Anka bu bibaadi Yehowa mulee, mukashi kilele na muan’aye abaadi’nka na bidiibua mu mafuku ooso a munanga. Elondo diaye na kiasa kia muimu bibaadi’nka biwule.

Kubaadi kukitshikie muanda wa kukaanya kunyima. Ka nsongualume ka mukashi kilele kabakumbile ako nkufua. Yawa muana mukashi nkuiyayila Eliya bua’shi abuushe muana aye. Eliya bamuatshile mu maboko, enda naaye ku kadimbo ka kuiyilu. Bamuladiishe pa lusala aye nkuteka’shi: ‘Yehowa, muuwa wa uno muana walukie namu munda muaye.’ Ouku buakinyi bibadia kuikala muanda wa kukaanya bua Yehowa kumusangusha? Muanda takubaadi muntu mubande kusanguka kubanga kala nya. Akupu uno mukashi kilele na ka nsongualume kaaye tababaadi sunga bena Isalele nya.

Ka nsongualume nkualukiila na muwa! Eliya nkulungula mukashi kilele’shi: ‘Tala! Muan’obe balukiila na muwa.’ Baadi na muloo ukata, aye nkulungula Eliya’shi: ‘Mbinyibinyi, we mutemuki a Efile Mukulu. Muanda wakula’nka abikulungula Yehowa.’

Aye kuididishi diaye, Akabe Nfumu a mu Isalele baadi bia kumona efuba dia nfinyo dia Nabote. Akabe baadi na lukalo na diadia efuba, bakimbile bia kuidiula kui Nabote. Anka Nabote bapelele kuidiudisha muanda tabibaadi bipusheene na Muiya wa Yehowa wa kupela kuudisha mbalo ya bupianyi. Akabe baadi munemekie Nabote bua kulonda muiya wa Yehowa su? Nya. Akabe baadi mufiite munda bikata. Aye nkuinyongola bikile, apela kudia sunga nkutuuka mu kadimbo kaaye ka kulaala.

Mukashi a Akabe, Nfumu mukashi ebubi Yezabele nkumulungula’shi: ‘Obe nyi nfumu a Isalele. We kupeta kioso kiokumiina. Nakuatshila diadia efuba.’ Yezabele bafundile mukanda kui bakulu ba kibundi, ebalungula bua kufunda Nabote shi musaabuule Efile Mukulu, abitungu bamuase mabue buadia kufua. Bakulu ba kibundi abakitshiine bibaadi Yezabele muibalungule, akupu Yezabele nkulungula Akabe’shi: ‘Nabote baapu kufua! Efuba dia nfinyo ndiobe.’

Nabote tabaadi penda bupenka ku bantu bashii basoole babaadi Yezabele muipayishe nya. Baadi muipayishe bantu bebungi babaadi bafule Yehowa. Baadi alangwila ma nkishi na kukita ingi mianda ibubi. Yehowa baadi amono bioso bibaadi abikitshi Yezabele. Yehowa baadia kukita naaye kinyi?

Kunyima kua lufu lua Akabe, muan’aye Yehorame bafikile nfumu. Yehowa batumine Yehu bua kunyooka Yezabele na kifuko kiaye.

Yehu bayiile n’etempu diaye ku Izreele kubaadi kushalele Yezabele. Yehorame nkufika n’etempu mu kufumankana na Yehu, amuipusha’shi: ‘Kui kufukama pankatshi peetu su?’ Yehu nkumualuula’shi: ‘Ta kuikala kufukama p’ekale nyinoobe Yezabele akitshi mianda ibubi.’ Yehorame bakimbile bia kuifunyisha etempu diaye bua kusuuka. Anka Yehu nkumuasa mukietue, aye nkufua.

Akupu Yehu nkuenda kubaadi Yezabele mushale. Yezabele pabapushiishe shi Yehu kuete kufika, baadi muipente, alumbuula nyene, aye nkubanga kumutengiela kuididishi diaye dia kuiyilu. Pabafikile Yehu, baadi mumuimune kushi bukalanga. Yehu nkusamina bafubi ba Yezabele babaadi bemane kunyima kuaye’shi: ‘Mueleeyi paashi!’ Abaadi basukume Yezabele kuididishi, aye nkupona mu nsenga, akupu bafuile.

Kunyima kua biabia, Yehu baadi muipee bana 70 ba Akabe aye nkusuula nsenga pa kukatusha lulanguilo lua Baale. Bomono’shi Yehowa auku mianda yoso na’shi anyookaa baaba abakitshi bibubi mu nsaa yakumiina su?