Kifuko kya bakwetu balume na bakashi be mu buumune

MUNDA mwa bipwa peepi 1 500, Yehowa Efile Mukulu baadi aata mwilo wa Isaleele bu mwilo utwale eshina dyaaye. Akupu, Yehowa ‘mmusangule bangi bantu ba mu bingi bisamba bwa kwikala mwilo bwa kineemo ky’eshina dyaye.’ (Bik. 15:14) Mwilo bwa kineemo ky’eshina dya Yehowa awikala tumonyi twaye, twi mu buumune mu bwikashi na mu binangu sunga twekala bashale mu ma mbalo elekeene-lekeene. Kubunga mwilo bw’eshina dy’Efile Mukulu nyi ngumune wa ku mifubo ibaadi Yesu mupe balondji baaye. Bebalungwile’shi: “Ndaayi: ku miilo yooso nwibeekashe bu balondji bande, nwibabatshishe mwishina dya Yaaya na dya Mwana na dya kikudi kiselele.”​—Mat. 28:19, 20.

² Nsaa ywelambula kwi Yehowa na kubatshishibwa, wekala mulongi a Yesu Kidishitu. We munkatshi mwa bakwetu beena Kidishitu, bashy’abakumiina’shi kifulo kya bwin’eumbo, kisamba, sunga kwikala na nshalelo mwilekene pabitale kwikala na makuta kwibabuule. (Mis. 133:1) Pa mwanda wa byabya, we mufule na okwete kuneemeka bakwenu beena Kidishitu be mu kakongye. Bangi ba kwabadi mbalombeene kwikala b’ekoba, b’ewumbo, ba myanda ilelekeene na yoobe. Sunga’shi, abaadi bantu be na nshalelo shibaadi akusankisha kumpala. We nabo kifulo na kipwano kya bwina muntu kikile bingi byooso; byabikala kipwano kya bantu bashaale pamune, abalangwila pamune, sunga be mu kifuko kimune.​—Mak. 10:29, 30; Kol. 3:14; 1 Mp. 1:22.

TUSHINTUULE NGYELELO EETU A BINANGU

³ Su bangi abakambilwa bwa kukatusha binangu bibubi byabakwete kwelela bangi pabitale ekoba, myanda ya politike, myanda ya mu nshalelo, sunga bingi binangu bipwe kumena mishi mu mashimba aabo, abitungu batentekyeshe kileshesho kya beena Kidishitu ba kwibedi babaadi beena Yuuda. Bano bakwetu babaadi na kya kuleka kwelela bantu ba bingi bisamba binangu bibubi mu myanda ya lulangwilo. Pabaabadi batume Mpyeele ku nshibo ya Korneyi mukata a basalayi ba beena Looma, Yehowa baadi mulambukishe Mpyeele kya kukita na kalolo kooso.​—Bikitshino, shapitre 10.

⁴ Mu kimonwa, abaadi balungule Mpyeele bwa kwipaa na kudya nyema kampanda ibaabadi abamono kwi beena Yuuda’shi, i butete. Mpyeele pabaadi mutune, bapushiishe eyi adikatukila mwiyilu adimulungula’shi: “Kitoshiibwe kwi Efile Mukulu twekyambanga’shi nkibi.” (Bik. 10:15) Bibaadi abitungu bukwashi bw’Efile Mukulu bwa’shi Mpyeele ashintuuule binangu byaye bwa kukita mufubo ubaadi peepi na kupebwa, wa kwenda kwi muntu a mu bingi bisamba. Kunyima kwa kukokyela bukunkushi bwa Yehowa, Mpyeele balungwile bantu abaadi bamwifunyishe’shi: ‘Bu byanuwuku, nkilubilo kikata kwi mwina Yuuda bwa kwiwukeena sunga nkwinyi kwipusheena na muntu mwenyi. Ami namu, Efile Mukulu bandesha’shi ta bibuwa kumona muntu su ngumune bu shii-buwa sunga bu e butete nya. Ngi mwanda kinyi pontekyele, nemufikye kushi kunyengakana.’ (Bik. 10:28, 29) Nka paapa, Mpyeele nkwimweena aye nabeene’shi, Yehowa mmukumiine Korneyi na kifuko kyaye.

⁵ Bibaadi abitungu’shi Saule a ku Tarse, aye balongyele tulasa tukata twa Bafadisee, eeyishe bwa kwibunga na bangi bantu babaadi amono bu be na nshalelo shibaadi amusangasha. Baadi mpaa na mupete bukunkushi kwabadi. (Bik. 4:13; Nga. 1:13-20; Fid. 3:4-11) Twi balombeene kupwandjikisha kushintuluka kubaadi akutungu mwi bano bantu bu Sergyuse Pauluse, Denii, Demarise, Filemone, Onezime na bangi abaadi bakumiine mukandu wibuwa na kufika bu balondji ba Yesu Kidishitu.​—Bik. 13:6-12; 17:22, 33, 34; Fil. 8-20.

TULAME BUUMUNE BWA KIFUKO KYETU KYA NSENGA ISHIMA

⁶ Kushi mpaka, nyi nkifulo kya bakwetu balume na bakashi be mu kakongye kibaadi kikutakule bwa kufika mu ndumbulwilo a Yehowa. Boodi mubandjile bukata bwa kyakya kifulo akilesha beena kidishitu ba binyibinyi ba Yesu Kidishitu, nka bu bibaadi mwakule’shi: “Nenupa mwiya upya: efuleneeyi kifulo. Bu byandi mwinufule, anwe naamu nwi na kya kwifuleena. Abakatundula’shi nwi balongi bande ku kifulo kyanwifuleena.” (Yo. 13:34, 35) We musankye na ndumbulwilo a Yehowa nsaa yoodi mutundule’shi kifulo kina bakwetu mu kakongye akilesha bi kifulo ki mu kifuko kya nsenga ishima kya bakwetu balume na bakashi. Okwete kulombasha mulayilo wa butemuki bwa mu Bible pabitale kubunga kwa bantu mu mafuku a ku nfudiilo bwa kulangwila Yehowa mu kufukama na mu buumune.​—Mik. 4:1-5.

⁷ Patutala myanda ibungi ikwete kwabuula bantu lelo uno, nnanyi baadi mulombeene kupwandjikisha’shi “Bantu ba mu maumbo ooso, bisamba, miilo na ndjimi yooso” be kushala mu buumune? (Kibaf. 7:9) Banda kutala bi kwilekeena kwa nshalelo pankatshi pa bantu bashale mu bibundji mukwete kwenda myanda ya siyanse kumpala ngofu na mwamwa mwi bantu bakii nka balamate ku bipikwa byaabo bya kala. Tala dingi mushikwa wi munkatshi mwa bantu b’ekoba dimune n’eumbo dimune kadi bena kipwilo kimune. Pa mwanda wa bwin’eumbo bukishekishe, bantu mbafikye mu kwiabuula ngofu mu myanda ya politike. Na su botala kwilekeena kwi pankatshi pa bantu mu myanda ya mapeta na ingi myanda ayabulushenaa, osangana’shi kubunga kwa bantu ba miilo yooso, bisaka, bisamba, ndjimi, na tubila mu kifulo kya bwina muntu na mu butaale bwabashy’a kulwiisha nyi nkilengyeleshi kyabadi bakumbeene kukita nkapenda kwi Yehowa.​—Sek. 4:6.

⁸ Anka, bwabwa buumune nyi mmwanda wa binyibinyi. Na poodi mufikye bu Temwe a Yehowa mwilambule na mubatshishiibwe, we mutwele munkatshi mwa bantu be mu buumune. Bwa’shi bwabwa buumune bukukwashe, abitungu okite moobe mooso bwa kwibulama. We mulombeene kwibulama pakuteemesha elango dya Mpoolo mutumibwa di mu mukanda wa Beena-Ngalatea 6:10, adyamba bino: “Byabya, patukii na nguba, tukitshineeyi bantu booso myanda ibuwa, nkibinkibi bakwetu mu lukumiino.” Abitungu dingi tutumikile ano mayi: “Tanukitanga kintu su nkimune bwa kwipikeena, su nkimune bwa kwitatula-tatula, anka mu kwiyisha, ikalayi anumono bangi bu bekunundu kwenu. Muntu takimbanga bwa kwisangasha nkapenda aye nabeene, asangashe namu bangi.” (Fid. 2:3, 4) Patwikitshisha bwa kumona bakwetu bu abibamonaa Yehowa kushii byabamweneka ku mbidi, atutungunuka na kulama nshalelo a muloo na butaale mu kipwano kibuwa nabo.​—Ef. 4:23, 24.

KWIKWASHEENA KU MUNTU NA MUNTU

⁹ Nka bu bituleshe Mpoolo mutumibwa, kakongye ta nketshibuule, anka be mwanka bakwete kwikwasheena ku muntu na muntu. (1 Kod. 12:14-26) Twi balombeene kwikala pa mbalo i kula ngofu na bakwetu ba mu kifuko kya nsenga ishima, anka tatukutwaa kulesha’shi tukwete kwitatshisha bwaabo nya. Su bangi beena Kidishitu neetu bakwete kukyengyeshiibwa, atwe booso abitwinyongoshaa ku mashimba. Su bangi bakwete kukyenga sunga’shi be mu mbalo i kafutakanyi sunga ngoshi ya bisamba, atwe booso atupushaa na abitutakulaa bwa kukimba kipaso kya kwibakwasha mu kikudi sunga na bintu bya ku mbidi.​—2 Kod. 1:8-11.

¹⁰ Bibuwa ooso a kwatudi ekale atuulu bakwetu mu nteko efuku dyooso. Bangi bakwete kufumankana na bitompwanga bikumbeene kwibaponesha mu bubi. Bangi namu bakwete kufwambushiibwa na malwa awukiibwa pangi kwi bantu bebungi. Bangi namu bakwete kupeta bulwishi kwi beena mudimo nabo na kwi bakwabo beena kifuko. (Mat. 10:35, 36; 1 Tes. 2:14) Bino byooso ta mbilombeene kukutwa kwitukalakasha mwanda twi mu kifuko kya bakwetu balume na bakashi be mu buumune mu nsenga ishima. (1 Mp. 5:9) Munkatshi mwetu twi na bangi bakwetu bakwete kufuba ngofu mu mudimo wa Yehowa, bwa kukunkusha mudimo wa kulungula mukandu wibuwa na kukunkusha tukongye. Na dingi, kwi bangi be na bushito bwa kunkunkusha mudimo wa nsenga ishima. Booso be na lukalo na nteko yeetu, bwa kulesha byatukwete kwitatshisha bwaabo na kifulo kyooso, sunga byekala’shi ta twi na kingi kintu kyatudi balombeene kukita bwa kwibakwasha muntu pa bupenka.​—Ef. 1:16; 1 Tes. 1:2, 3; 5:25.

¹¹ Pa mwanda wa nkalakashi ikile bungi mu ano mafuku a ku nfudiilo, abitungu bafubi ba Yehowa bekale belumbuule bwa kwikwashena. Ingi nsaa apamweka kafutakanyi bu kutshinkatshinka kwa nsenga na mpeshi e bukopo mbilombeene kuteka’shi kwikale mpàngo ya kulumbuula bukwashi bukile bungi mpaa na kusangisha bintu bya ku mbidi bya kukwasha nabyo. Beena Kidishitu ba kumpala mbalekye kileshesho kibuwa mu uno mwanda. Bu bibaabadi abatentekyesha elango dya Yesu, balondji ba mu bingi bibundji babaadi na muloo wa kutuma bintu bya bukwashi kwi bakwabo beena Kidishitu ba mu Yuudeya babaadi abakyengye na nsala. (Bik. 11:27-30; 20:35) Mpoolo mutumibwa baadi mulumbuule bwa’shi bino bintu bya bukwashi bitushiibwe mu kipaso kiilondeene. (2 Kod. 9:1-15) Mu ano eetu mafuku, nsaa ayipete bakwetu malwa sunga yabadi na lukalo lwa bukwashi, ndumbulwilo na beena Kidishitu neetu abatushaa bukwashi bulombane bukidibukidi.

BASANGULWE BWA KUKITA AKIKYEBE YEHOWA

¹² Kifuko kya pa nsenga ishima kya bakwetu balume na bakashi ki mu buumune nkiilumbuule bwa kukita akikyebe Yehowa. Mu ano mafuku, Yehowa akyebe’shi mukandu wibuwa wa Bufumu ulungulwe pa nsenga ishima bu kamonyi kwi miilo yooso. (Mat. 24:14) Bu byatukwete kukita uno mudimo, Yehowa akumiina’shi bikitshino byetu bikale abipusheena na miiya yaaye ilulame. (1 Mp. 1:14-16) Abitungu tukumiine kwikookyeshena ku muntu na muntu na kukita bya’shi mudimo wa kulungula mukandu wibuwa wende kumpala. (Ef. 5:21) Uno ta nguba akukimba penda buwa bwetu ooo, kadi nyi nguba a kunyiisha kutuula Bufumu bw’Efile Mukulu pa mbalo ya kumpala mu muwa wetu. (Mat. 6:33) Kulama uno mwanda mu binangu byetu bu byatukwete kufuba pamune bwa kuyiisha mudimo wa kulungula mukandu wibuwa kumpala akwitutwadila masanka kubanga binobino na kwitufisha ku myabi ya ikalayika.

¹³ Bu byatudi ba Temwe ba Yehowa, twi basangulwe munkatshi mwa ingi miilo bu bantu batooshibwe, bwa kukita mudimo w’Efile Mukulu na katshintshi. (Tt. 2:14) Lulangwilo lwetu kwi Yehowa ndwitwikashe belekeene na bangi. Ta tukwete penda kufuba mu buumune na bakwetu booso be mu nsenga ishima nya. Anka, tukwete kwakula edimi dimune dya bya binyibinyi na kukita myanda ayikwateena na bya binyibinyi by’atwakula. Yehowa baadi mutemukye uno mwanda kwi mutemuki Sefanya: “Nakitshi’shi miilo ipete milomo [edimi] isampiibwe bwaidy’a kwidila ayo yooso eshina dya Yehowa, bwaidy’a kunfubila na katshintshi ka mumune.”​—Sef. 3:9.

¹⁴ Akupu, Yehowa nkulungula Sefanya ku bukwashi bwa kikudi kiselele bwa’shi afunde pabitale buumune bwa bakwetu balume na bakashi be mu nsenga ishima bwatumono lelo uno’shi: “Bashaale na muwa mu Isaleele tabakitshi dimo bubi nya; taabekala dimo na madimi, taabatusha dimo mukanwa mwabo myanda ya kudimba; ank’abeekala na kya kudya na kwikisha, kushii muntu akwibasusakasha.” (Sef. 3:13) Bu byatudi bapete mpushiisho ebuwa a Eyi dya Yehowa dya binyibinyi na kushintuula binangu byetu na nshalelo eetu bwa’shi bipusheena na miiya ya Yehowa, twi na mushindo wa kufuba mu buumune. Tukwete kulombasha byabya abimweneka bu bishii bipwandjikile kukitshika ku meso a bantu. Eyendo, twi mwilo wi pa bwawo, mwilo w’Efile Mukulu bwa kutumbisha eshina dyaye mu nsenga ishima.​—Mik. 2:12.