Mishindo ya kutamisha mudimo oobe

PABAKUMBEENE nsaa ya’shi Yesu atume balondji baaye mu mudimo wa kulungula mukandu wa Bufumu, bebalungwile’shi: “Biakuumbula bi bungi, anka kwi bafubi bapeela.” Kubaadi mudimo ukata ubaadi autungu kukita, ndjo aye nkwamba dingi’shi: “Sendelayi Nfumu a biumbulwanga biadia kutuma bafubi mwibala [efuba] dyaaye.” (Mat. 9:37, 38, Kilombeno kipya 2009) Yesu baadi mulongyeshe balondji baaye mushindo wabadya kulombasha mudimo waabo. Bishima byaaye bibaadi abilesha’shi abitungu kwiukita kushii kunyengakana, bambile’shi: “Tanukapudisha kwifunya mu bibalo bia Isalele Mwana a muntu ta mufikye.”​—Mat. 10:23, Kilombeno kipya 2009.

² Mpaa na lelo uno, kwi bibungi abitungu kukita mu mudimo wa bulungudi. Abitungu kubanda kulungula uno mukandu wibuwa wa Bufumu kumpala kwa’shi nfudiilo ifikye na nsaa ikwete kwenda lubilo! (Mak. 13:10) Bu byabidi’shi efuba nyi mbantu, twi kumpala kwa bantu bebungi bukile bwa baaba babaabadi balongyeshe kwi Yesu na balondji baaye. Bungi bwetu mbupeela p’atwibupwandikisha na midiyala ya bantu be mu nsenga ishima, anka twi na kya kushinkamisha’shi Yehowa akyebe kwitukwasha. Mukandu wibuwa wa Bufumu aukyebe kulungulwa mu nsenga ishima, na pa nsaa ayikalombasha Yehowa, nfudiilo ayikafiki. Atukyebe kutuula Bufumu bw’Efile Mukulu pa mbalo ya kumpala mu muwa wetu bwa kulombasha mudimo wetu su? Mpángo kinyi ya teokrasi yatudi bakumbeene kulonda bwa kwiwulombasha?

³ Pabaadi akula akitekye Yehowa kwi bantu belambule kwadi, Yesu bakwile’shi: ‘Ofule Yehowa Efile Mukulu oobe n’eshimba dyoobe dyooso, na kikudi kyoobe kyooso, na kinangu kyoobe kyooso, mpaa na bukome boobe booso.’ (Mak 12:30) Abitungu twipaane ngofu mu mudimo w’Efile Mukulu. Bino abilesha bi bukata bwa lukumiino lwetu na akushinkamisha kwilambula kwetu nsaa y’atwipaana mu mudimo wa Yehowa. (2 Tim. 2:15) Ooso a kwatudi e na mishindo ibungi ya kukita mudimo, muyiile bukome na nshalelo yaadi nayo. Banda kutala ingi ya ku yaaya mishindo, na osangule imune ya ku mpángo ya teokrasi yokumiina kwata bwa kulombasha mudimo oobe.

KWIKALA BU MULUNGUDI MU KAKONGYE

⁴ Booso abatambula bya binyibinyi be na kineemo kya kulungula mukandu wibuwa. Uno nyi mudimo ukata ubaadi Yesu mupe balongi baaye bwa’shi bakite. (Mat. 24:14; 28:19, 20) Mulongi a Yesu abangaa kulungula bangi mukandu wibuwa nka’ye ky’eupusha. Byabya ndjo bibakitshine Andre, Fidipe, Korneye na bangi. (Yo. 1:40, 41, 43-45; Bik. 10:1, 2, 24; 16:14, 15, 25-34) Bino abilesha’shi muntu mmulombeene kulungula mukandu wibuwa kumpala kwadya kubatshishibwa su? Oolo! Nsaa ayilombasha muntu myanda itekibwe bwa kwikala bu mulungudi shabandile kubatshishibwa, bapete mushindo wa kubanga kwenda mu bulungudi bwa ku nshibo na nshibo. Na dingi, muyiile bukome na myanda yaadi nayo mmulombeene kukita ingi mishindo ya mudimo wa bulungudi.

⁵ Mulungudi su baapu kubatshishibwa, kushii mpaka e na lukalo lwa kukita mwaye mooso bwa kukwasha bangi bwa’shi balongye bya binyibinyi. Balume na bakashi be na kineemo kii mumune kya kwipaana mu mudimo wa bulungudi. Twi na mwabi wa kwikala sunga na kapindji kapeela ka kukwasha bwa’shi myanda ya Bufumu bw’Efile Mukulu yende kumpala. Eyendo, muntu ooso mukumbeene kutamisha mudimo waaye mu kukita ingi mishindo ya uno mudimo, ekala na muloo.

KWENDA MU KUFUBA MBALO I LUKALO LWA BALUNGUDI BEBUNGI

⁶ Mbilombeene kwikala’shi mu teritware enu mwi balungudi bebungi na mukandu wibuwa ukwete kulungulwa kalolo mwanka. Su mbyabya, we mukumbeene kupusha’shi mbilombane bwa’shi wende mu kufuba mbalo yabadi na lukalo lwa balungudi bebungi bwa kutamisha mudimo oobe. (Bik. 16:9) Binobino su we mukulu sunga mufubi a midimo, nkulombeene kwikala kakongye ke na lukalo na bukwashi boobe. Mukunkushi a kifunda kyenu mukumbeene nkulesha akitungu bwa’shi wende mu kukwasha mu kangi kakongye ka mu kifunda kyenu. Su bokumiina kwenda mu kukwasha mu ingi mbalo ya mwiumbo dyenu, biro bya filiale mbilombeene nkukwasha bwa kuuka myanda ibungi itale yaaya mbalo.

⁷ Okumiina kwenda mu kufuba mu dingi eumbo su? Su mbyabya, abitungu otaluule lwalwa lwendo kalolo. Bwakinyi twe mulombeene kwisamba na bakulu ba mu kakongye kenu? Kwakwa kutentuluka nkulombeene kwikala na bukitshishi koodi sunga kwi muntu wende naaye. (Luk. 14:28) Anka, su omono’shi t’okitshi bipwa bibungi mu dyadya eumbo, mbilombeene kwikala buwa bwa’shi ofubile mwiumbo dyenu.

⁸ Mu angi maumbo, bakwetu balume babadi batuule pa mbalo ya kukunkusha bakii na bipwa bipeela mu bya binyibinyi. Bakwetu beyishe ba mu dyadya eumbo mbalombeene kumona’shi, bibuwa balekyele bakwetu abaafiki abauku myanda ibungi bwa’shi bakunkushe kakongye. Su we mukulu mu kakongye na okyebe kwenda mu kukwasha mu dyadya eumbo, dimuka bwa’shi lukalo loobe talwikalanga lwa kufuba pa mbalo ya bakwetu balume ba mu dyadya eumbo. Anka, fuba nabo. Ebanyingishe bwa’shi bakimbe bya kutwala mashito mu kakongye. (1 Tim. 3:1) Ikala na lwishinko su bomono’shi ingi myanda ikwete kukitshika mu mushindo wilekeene na wanukitaa mwiumbo dyenu. Tumika na kapatupatu koobe bu byodi mukulu bwa kukwasha bakwetu balume ngofu. Kunyima, su bomono’shi abitungu walukiile mwiumbo dyenu, bakwetu ba mu dyadya eumbo abashaala bakumbane bwa kulama kakongye.

⁹ Kumpala kwa’shi biro bya filiale bikupe mashina a tukongye twi na lukalo lwa bukwashi boobe, Komite a mudimo a kakongye kenu akyebe kutuma mukanda aulesha’shi we mukumbane bwa kwenda mu kukwasha. Uno mukanda benao lukalo sunga wekala mukulu, mufubi a midimo, mbala-mashinda, sunga mulungudi. Komite a mudimo akyebe kutuma mukanda aulesha’shi we mukumbane pamune na mukanda oobe ku biro bya filiale ookyebe kwenda mu kukwasha.

KULUNGULA MUKANDU WIBUWA MU LUNGI LUDIMI

¹⁰ Bwa kutamisha mudimo oobe, we mulombeene kwikala na lukalo lwa kulonga lungi ludimi, sunga ludimi lwa tumaama. Su we na mpángo ya kulonga lungi ludimi, bwakinyi twe mulombeene kwisamba na bakulu sunga na mukunkushi a kifunda? Mbalombeene nkupa binangu na nkunyingisha mu kipaso kilombane. Ku bukunkushi bwa biro bya filiale, bingi bifunda mbilumbuule tulasa twa kulonga ndjimi bwa kulongyesha balungudi banyingye na ba mbala-mashinda bwabadya kulongyesha mu lungi ludimi.

MUDIMO WA BU MBALA-MASHINDA

¹¹ Balungudi booso abitungu beubidishene na myanda yooso itekibwe bwa kwikala mbala-mashinda mukwashi, a myeshi yooso, na a nsaa yooso mpaa na ingi mishindo ya mudimo wa nsaa yooso. Mbala-mashinda abitungu ekale mwina Kidishitu mupwe kubatshishibwa e na kileshesho kibuwa, e na nshaleelo amukwasha bwa’shi alombashe nsaa itshibibwe mu kulungula kwa mukandu wibuwa. Komite a mudimo a kakongye ndjo eele kyala kwisaki dya kuteka mudimo wa bu mbala-mashinda mukwashi na mbala-mashinda a myeshi yooso, kadi biro bya filiale ndjo abitumaa ba mbala-mashinda ba nsaa yooso.

¹² Ba mbala-mashinda bakwashi mbalombeene kutudibwa bwa mweshi umune, myeshi ibungi ilondeene, sunga bwa kutungunuka kushii kwimika muyiile bukome bwabadi nabo. Balungudi ba mukandu wibuwa bebungi abasangelaa kukita mudimo wa bu mbala-mashinda mukwashi mu bipungo kampanda bi pabwabyo, bu mu kipungo kya Kitentekyesho sunga mu mweshi aufiki mukunkushi a kifunda mu kutala kakongye. Bangi abakuminaa kwiukita mu myeshi yabadi mu konje. Balungudi bapwe kubatshishibwa bakii ku kalasa abakuminaa kwata mudimo wa bu mbala-mashinda mukwashi mu mafuku abadi mu konje. Balungudi mbalombeene kukumiina kukita mudimo wa bu mbala-mashinda mukwashi bwa kutuusha bungi bwa nsaa itekibwe yabadi bapeeleshe mu mweshi wa Kasatu na wa Kananka ooso na mu mweshi aufiki mukunkushi a kifunda. Sunga wekala na myanda kinyi mu nshalelo oobe, poodi na mwikeelo wibuwa na byubishi bibuwa, we kubofusha kulombasha nsaa itshibibwe, na kukulupila’shi we kufuba bu mbala-mashinda mukwashi munda mwa mweshi umune sunga ibungi. Bakulu abekala na muloo wa kutaluula esaki dyobe dya kuteka uno mudimo.

¹³ Bwa kwikala mbala-mashinda a myeshi yooso, abitungu otale su we na mushindo wa kulombasha nsaa itshibibwe ku kipwa. Su we mbala-mashinda, abitungu ofube nsaa yooso na kakongye kenu. Ba mbala-mashinda baasha katshintshi nyi mwabi ukata bwa kakongye, abatuusha muloo bwa mudimo wa bulungudi mpaa na kunyingisha bangi bwabadya kwata uno mudimo. Anka, kumpala kwa’shi wekale mbala-mashinda a myeshi yooso, abitungu wekale mulungudi atuusha kileshesho kibuwa na mupwe kubatshishibwa takudi myeshi isamombo.

¹⁴ Ba mbala-mashinda ba nsaa yooso abebasangulaa munkatshi mwa ba mbala-mashinda ba myeshi yooso baleshe shi bakwete kutuusha bipeta bibuwa mu bulungudi. Abitungu bekale na mushindo wa kufuba mbalo yooso yabebatumu kwi biro bya filiale. Misusa ibungi abebatumaa mu ma mbalo e kula abadi balombeene kupeta bantu abateemesha, na kukita tukongye tupya. Ingi nsaa, abaatumaa ba mbala-mashinda ba nsaa yooso mu tukongye twi na lukalo lwa bukwashi bwa kulungula mu teritware aabo ooso. Bangi ba mbala-mashinda ba nsaa yooso bakulu mu kakongye abebatumaa bwa kwenda mu kukwasha mu tukongye tupeela, sunga byekala’shi mu yaaya mbalo tabe na lukalo lwa balungudi bebungi. Ba mbala-mashinda ba nsaa yooso abapetaa ndambo y’ekuta bwa kupudisha nkalo yaabo. Bangi ba mbala-mashinda ba nsaa yooso abebatumaa bwa kapindji.

MUDIMO WA BU MISIONERE

¹⁵ Komite a mudimo a Kasaka ka Bakunkushi-Bakulu asangulaa ba misionere. Akupu Komite a filiale a mwiumbo dyabebatumu ebatumu mu ma mbalo e bantu bebungi. Ba misionere bakwete kukwasha ngofu bwa kunyingisha bulungudi na midimo ya kakongye. Misango ibungi, ba misionere be mu bulungudi mbalongyeshibwe mu Kalasa ka balungudi ba Bufumu. Abebapeya mbalo ya kushaala na ndambo y’ekuta dya kupudisha nkalo yabadi nayo.

MUDIMO WA BU MUKUNKUSHI A KIFUNDA

¹⁶ Baaba babadi basangule kwi Kasaka ka Bakunkushi-Bakulu bwa kwikala bankunkushi ba bifunda abebalongyeshaa mudimo na bya kufuba, ababandaa kufuba bu bakunkushi ba bifunda bakwashi bwa kuuka ingi myanda. Bano bakwetu balume mbafule mudimo wa bulungudi na beena Kidishitu nabo. Mba mbala-mashinda basha katshintshi, mbantu abelongyelaa Bible ngofu, mbesambi na mbalongyeshi bebuwa. Abamweneka mu mushindo wabo wa kulesha kikuba kya kikudi, na be na nkatshinkatshi, kipopeelo, na kapatupatu. Su mukwetu mmwibakile, mukashi aaye mbala-mashinda nyi mukashi atuusha kileshesho kibuwa pabitale mwikeelo waaye na mushindo wakitshina bangi myanda. Mmulungudi a mukandu wibuwa munyingye. Ashinguula dingi mudimo waaye wa bu mukashi mwina Kidishitu sha kukookyela, shy’akula pa mbalo ya mulume aaye sunga kwikala penda’ye e ne’yi nsaa ya kwete kwisamba na bangi. Bakunkushi ba bifunda na bakashi baabo be na programe e bukopo, nyi bwakinyi baaba abakimbi bya kwikala bakunkushi ba bifunda abitungu bekale na mbidi bukome. Ba mbala-mashinda t’abafundaa mukanda wa kuteka mudimo wa kukunkusha kifunda nya. Anka, abalungulaa mukunkushi a kifunda lukalo lwabo lwa kufuba mu kifunda, aye naamu ebapa binangu.

TULASA TWA TEOKRASI

¹⁷ Kalasa ka balungudi ba Bufumu: Kwi lukalo lwa balungudi ba Bufumu bebungi bwa kukwasha mu ma teritware abashy’abakambaa kulungula na kukwasha tukongye. Byabya, bakwetu balume na bakashi bashii bebakile, na balume na bakashi beyibakishene mbalombeene kupeta malongyesha a pabwao mu Kalasa ka balungudi ba Bufumu. Kunyima kwa kalasa, baaba abatuuku mwanka abebatumu mu kufuba bu ba mbala-mashinda ba myeshi yooso mu ma mbalo abadi na lukalo lwa balungudi mu teritware a mwiumbo dyaabo. Anka, baaba abakumiina kwenda kooso kwabebatumu mbalombeene kwibapa ungi mudimo mwiumbo dyaabo sunga mu dingi eumbo. Bapeela ba kwabadi mbalombeene kwibatuma bu ba mbala-mashinda ba nsaa yooso sunga bu ba mbala-mashinda ba nsaa yooso bwa kapindji. Ba mbala-mashinda abakumiina kutwela mu kano kalasa mbalombeene kuuka myanda itekibwe mu kisangilo kyabakitshi ku kikongeno kya mafuku asatu.

¹⁸ Kalasa ka Galaade ka Watchtower: Bakwetu balume na bakashi bashii bebakile, na baaba beyibakishene baabasangula bwa kutwela mu kano kalasa abauku kwakula Anglais na bakwete kufuba mu mudimo wa nsaa yooso. Abamweneka’shi be na ngobesha ya kunyingisha ma teritware sunga ndumbulwilo a ma filiale. Mbapwe kulesha’shi be na muloo wa kukwasha bakwabo na mbakumbeene kukwasha bangi na kalolo kooso bwabadya kulonga Bifundwe na kulamata ku bukunkushi bwa teokrasi. Komite a filiale a mwiumbo dyabo, ayitamina baaba balombane bwa kutwela mu kano kalasa bwabadya kuusha mukanda wa kuteka bwa kwimutwela. Baaba abatuuku mu kano kalasa abebatumu bwa kufuba mu teritware sunga mu biro bya filiale bya mu dingi eumbo sunga bya mu eumbo dyaabo.

MUDIMO WA KU BETELE

¹⁹ Kufuba ku Betele nkineemo kikata. Eshina, Betele adipatuula’shi, “Nshibo y’Efile Mukulu,” na mbilombane binyibinyi bwa’shi ino mbalo ayikitshikila midimo ya teokrasi ikale n’eshina di byabya. Bakwetu balume na bakashi bakwete kufuba ku Betele bakwete kukita mudimo wibuwa pabitale kutuusha, kwaluula, na kwabila mikanda ayipatuula Bible. Mudimo wabo wi na muulo ukata ku meso kwa Kasaka ka Bakunkushi-Bakulu, kakwete kukunkusha na kutuusha mayi a kulonda bwa tukongye twa mu nsenga ishima. Bena Betele bebungi bakwete kwaluula mikanda mbashaleele mu teritware a filiale aabo mwabesamba ludimi lwabakwete kwaluula. Bino abibakwasha bwa’shi bekale abapusha kwabesamba lwalwa ludimi efuku dyooso. Mbalombeene mpaa na kwimwena su bantu bakwete kupusha kalolo byabadi baluule mu mikanda.

²⁰ Midimo ibungi ya ku Betele ayitekye bukome bwa mbidi. Nyi bwakinyi, kya kumpala baaba babetamina ku Betele abitungu bekale bakwetu balume belambule, babatshishibwe bansongwa, be na mbidi bukome, na banyingye. Su kwi lukalo mu filiale atala eumbo dyenu, na su okumiina kwenda mu kufuba ku Betele, we mukumbeene kwipusha bakulu ba mu kakongye kenu bwa’shi bakulungule myanda itekibwe bwa kwenda kwanka.

MUDIMO WA KWIBAKA

²¹ Kwibaka kwa mashibo a teokrasi ngumune wa ku midimo ya kishila, wi mumune na bibaadi mudimo wa kwibaka kwa ntempelo a Salomone. (1 Bf. 8:13-18) Bakwetu balume na bakashi bebungi bakwete kulesha katshintshi kakata p’abepaana na nsaa na bintu byabo bwa kukwasha mu uno mudimo.

²² Okumiina kukwasha su? Su we mulungudi mupwe kubatshishibwa, bakwetu abakunkusha mudimo wa kwibaka mwiumbo dyenu abakyebe kusangeela bukwashi boobe na abakumiina nkulongyesha mudimo sunga byekala’shi, twewiuku kalolo. Tokumiina namu kulungula bakulu ba mu kakongye kenu lukalo loobe lwa kukwasha su? Bangi balungudi bapwe kubatshishibwa balombashe myanda itekibwe mbapete mpaa na mushindo wa kukwasha mu kwibaka kwa mashibo a teokrasi mu angi maumbo.

²³ Kwi mishindo ibungi ya kukwasha ku mudimo wa lwibako. Balungudi bapwe kubatshishibwa be na mwikelo wibuwa na abawuku ndambo mushindo wa kwibaka bakumbeene kukwasha mu kwibaka mu ma mbalo e peepi na kwabo abebetamina bu Bantu abakwasha ku lwibako lwa mwiumbo. Bangi be na mushindo wa kwenda kula mu kukwasha ku lwibako bwa mafuku apeela, mbebatume kwi biro bya filiale bwa kufuba bu bantu abakwasha ku lwibako munda mwa mbingo ibidi sunga myeshi isatu. Baaba babadi batuule bwa kufuba munda mwa bipwa bibungi abebetamina bu bafubi ba ku lwibako. Mufubi a ku lwibako abadi batume mu kufuba mu dingi eumbo abamwitamina’shi; mufubi a ku lwibako e mu dingi eumbo. Kisaka kya lwibako ki na bafubi ba ku lwibako na bantu abakwasha ku lwibako, akikunkusha mudimo ooso wa kwibaka na abekikwatshishena kwi Bantu abakwasha ku Lwibako lwa Mwiumbo mpaa na beena tukongye abafiki mu kukwasha ku lwalwa lwibako. Bisaka bya lwibako abyendaa na kwibaka mu teritware a filiale aabo.

WE NA BIPATSHILA KINYI BYA MU KIKUDI?

²⁴ Su we mulambule muwa oobe kwi Yehowa, lukalo loobe ndwa kufubila Yehowa bwa losoo. Kadi we na bipatshila kinyi bya mu kikudi? Kwikala na bipatshila bya mu kikudi akukyebe nkukwasha bwa kutumika na bukome mpaa na bintu byoobe kalolo. (1 Kod. 9:26) Byabya bipatshila abikukwasha bwa kukula mu kikudi na kutuula binangu byoobe ku myanda i na muulo ukile bukata nsaa yokwete kukimba bya kufuba ingi midimo ya teokrasi.​—Fid. 1:10; 1 Tim. 4:15, 16.

²⁵ Mpoolo mutumibwa mmwitulekyele kileshesho kibuwa kyatudya kulonda mu mudimo wetu watufubila Efile Mukulu. (1 Kod. 11:1) Mpoolo baadi mwipaane ngofu mu mudimo wa Yehowa. Baadi awuku’shi Yehowa mmumupe mishindo ibungi. Baadi mufundjile bakwetu ba mu Kodinto’shi: “Kubanfungwilwa kibelo kikata akifisha ku mudimo.” Bino ta bi byabya ano mafuku etu su? Oolo, twi na mishindo ibungi ya kufubila Yehowa pamune na kakongye, bikishekishe mu mudimo wa kulungula mukandu wibuwa wa Bufumu. Kadi, anka bu Mpoolo, p’atutwele ku kyakya “kibelo kikata” atufumankana na “beshikwanyi bebungi.” (1 Kod. 16:9, NWT) Mpoolo baadi akumiina kwikanda. Pusha bibambile: “Naafwambusha mbidi yande na kwiyitonta.” (1 Kod. 9:24-27) Twi na binangu bi byabya su?

²⁶ Ooso a kwatudi mmunyingishibwe bwa kwitatshisha bwa kulombasha mpángo ya teokrasi muyile mushindo wadi nao mu nshalelo aaye. Bebungi be mu ingi mishindo ya mudimo wa nsaa yooso lelo uno mwanda babaadi na mpángo ya teokrasi kubanga kala mu muwa waabo. Sunga pababaadi bakii bakinga, abaadi bebanyingishe kwi baledi baabo sunga kwi bangi bantu bwa kwikala na yaaya mpángo. Byabya mbapete muloo wa kukisha bipwa bibungi mu mudimo wa Yehowa kushii kwinyongola. (Nki. 10:22) Ingi mpángo ya muulo ngya kwipaana mu mudimo wa bulungudi ku lubingo looso, kubanga kulonga Bible na bantu ku mashibo aabo, sunga kwata nsaa ibungi bwa kulumbuula bisangilo. Kintu ki na muulo nkya’shi tushaale banyingye na abalombasha kalolo mudimo wetu. Su tubakitshi byabya, atukyebe kutumbisha Yehowa na kulombasha kepatshila ketu ka nfudiilo, ka kumufubila bwa losoo.​—Luk. 13:24; 1 Tim. 4:7b, 8.