Babaadi batuushe biabia bibaabadi nabio bibuwa

Nsaa ibapuile Ngoshi ya Kabidi ya nsenga ishima mu 1945, Allemagne mushima baadi muluishibue ngofu. Bibundji bibaadi biluishibue, tulasa tubaadi bisumanga, mpitaalo tayibaadi kuanka mbalo yoso, kubaadi ma bombe ashibaadi abande kutanyika. Dingi bu biabidi’shi bidibua bibaadi bipeela, muulo wabio ubakamiine ngofu. Kileshesho, pabaabadi abaudisha bintu ku lupese, muulo wa beurre ubaadi wa efuto dia mbingo isamombo!

Mu bantu babaadi bakiengie pa muanda wa ngoshi mubaadi ba Temue ba Yehowa nkama babaabadi beele mu nkano munda mua bipua na mu ma camp a bena lukano pa muanda wa lukumino luabo. Mu 1945 babaadi bebatuushe mu lukano na penda bilamba biabo bia buina lukano bibaabadi bafuale. Bangi ba Temue babaadi bashimishe bintu biabo mpa na bioso bibaabadi nabio. Bangi abaadi na nsala ibaadi ayibaponesha kipuuka munkatshi mua bisangilo bia bena Kidishitu.

Ba Temue ba mu angi maumbo abatumu bukuashi bukidi bukidi

Ba Temue ba Yehowa ba mu angi maumbo babaadi batume bukuashi bukidi bukidi bua bidibua na bilamba. Bakuetu ba ku biro bietu bikata bia nsenga ishima babatekiele betele a mu Suisse, ku Berne, buashi akuashe bakuetu ba mu Allemagne. Nathan Knorr, baadi alesha mpala ya biro bietu bikata, bayile mu Europe bua kukunkusha kutuusha kua bukuashi bukidi bukidi.

Ba Temue ba mu Suisse abaadi batuushe bidibua, bilamba, na makuta na kalolo kooso. Kia kumpala abatumine bia buntu biabo ku Berne, kuakua abebisangula abebianya kumpala kua kuibituma mu Allemagne. Ba Temue ba mu Suède, mu Canada, mu États-Unis na mu angi maumbo babaadi dingi batume buabo bukuashi, bino tabibaadi penda bikuashe ba Temue ba mu Allemagne, bibakuashile mpa na ba mu angi maumbo a mu Europe na mu asie abaadi mu ngoshi.

Kalolo ka kukanya

Munda mua mieshi ipeela, betele a mu Suisse batumine kafe, mabeele, nsukaadi, ntete ya kudia, bimuma, bisakisaki na miita ya mu makopo mpa na mishipa. Babatumine dingi mpa na makuta.

Kukatusha biabia ba Temue ba mu Suisse babatumine ma tone a bilamba, makotshi a mashika, bilamba bia bakashi, na makotshi a balume. Kitenta kya Mulami kia mu 15/01/1946 kibaadi akiamba’shi: “Bakuetu balume na bakashi tababaadi batuushe bilamba bia kala, babaadi batuushe biabia bibaabadi nabio bibuwa. Babaadi besumine miloo ibungi bua kukuasha bakuabo ba mu Allemagne.”

Ba Temue ba mu Suisse baabadi batushe mikoolo ya bilato pepi na 1 000, kumpala kua kuibituma babaadi abebitaluula su bibuwa. Bakuetu balume na bakashi ba mu Wiesbaden, mu Allemagne, babaadi bakanye pabitale buwa bua bilamba bilekene na bilato bibaabapetele mu mabofu. Mungi Temue bafundile’shi: “Ntampuandikisha’shi kui makashinyi mu Allemagne e na bilato na bilamba bi buwa bui bino nya.”

Bukuashi bubatungunukile mpa na mu mueshi wa Muanda 1948. Mu bioso, bakuetu ba mu Suisse babatumine tushete 444 tua bintu, nyi nkuamba’shi ma tone 25 kui bakuabo ba mu Allemagne. Nka bu bibatukatuka mu kuakula, ba Temue ba mu Suisse ta mpenda abo babaadi batume bukuashi nya. Abaadi kasaka kapeela muanda mu aa mafuku mu Suisse mubaadi penda ba Temue 1 600.

“Ikalayi na kifulo munkatshi muenu”

Yesu Kidishitu bambile’shi: “Ku bino booso abakashinguula’shi nwi balongi bande, su nwi na kifulo munkatshi mwenu.” (Yowano 13:34, 35, Kilombeno kipya 2014) Kifulo kibatakuile ba Temue bua kutuusha bintu bikile buwa kushii bintu biabashibaadi nabio lukalo dingi. (2 Bena-Kodinda 8:1-4) Mukanda ubaadi aufiki mu Zurich ubaadi awamba’shi: “bakuetu bebungi bashibaadi na bintu kadi abaadi abakumiina kutuusha bukuashi abatushile ma karte aabo abataa nao bintu mpa na makuta.”

Ba Temue ba Yehowa ba mu Allemagne mbapetuule bukome musango umune abo abatuuku mu kubinguabingua na kafutakanyi ka ngoshi. Nyi nku bukuashi bua bintu bibaabadi bebatumine na kalolo kooso na biabadi balumbuule kalolo kui bakuabo balume na bakashi babaadi bebaleshe kifulo kibukopo.