DILONGIESHA 03
We kukulupila abiamba Bible?
Mu Bible mui milailo na malango ebungi. Pangi we na lukalo lua kuka malongiesha e muanka, anka weyipusha su nga binyibinyi. We mulombene kukulupila milailo na malango e mu uno mukanda wa kala su? We mulombene kukumina akiamba Bible pabitale kuikala na nshalelo a muloo kubanga binobino na mafuku aafiki? Bantu midiyo abakumina bino. Atukutekie bodia kuiyitaluula obe nabene.
1. Mianda i mu Bible ngia binyibinyi su ngia mpuandikishi?
Bible nabene akula’shi ena ‘bishima bia binyibinyi.’ (Mulungudi 12:10) Akula mianda ya binyibinyi itale bantu ba binyinbinyi. (Badika Luka 1:3; 3:1, 2.) Bantu bebungi balongie na abakimbulaa mianda ya kala mbatushe bishinkamisho bia binyibinyi pabitale bingi bipungo, bantu, ma mbalo, na ingi mianda i mu Bible.
2. Buakinyi atuamba’shi Bible kii nka na muulo?
Bible akulaa mianda ishibaadi ibande kuukibua kumpala kua’shi bamufunde. Bu kileshesho, akula mianda ya siyanse nka biayidi. Pababafundile Bible, bantu bebungi tababadi abakumina mianda ibadi akula pabitale siyanse. Anka mu ano etu mafuku, siyanse ashinkamisha’shi abiakula Bible mbia binyibinyi. Mianda i mwanka ‘ngya kukulupila kubanga binobino mpa na ku ikalaika.’—Misambo 111:8, EEM.
3. Buakinyi abitungu tukulupile abiakula Bible pabitale mafuku e kumpala?
Bible e na matemukia aakula kumpala ‘mianda ishabandjile kukitshika.’ (Yeeshaya 46:10) Badi mutemukie mianda ibungi ya kala kumpala kua’shi ikitshikie. Kuete kulesha dingi kalolo mianda ikuete kukitshika lelo. Mu dino dilongiesha, atukiebe kutaluula angi a ku matemuki a mu Bible. Pangi okakanya pa kumona biakula mianda ya binyibinyi!
TUKIMBUULE BOSO
Tutaluule ingi mianda ya siyanse ayakula Bible, na angi matemuki a mu Bible aamueneka patooka.
4. Siyanse muipushene na abiamba Bible
Mu mafuku a kala, bantu bebungi abadi abakumina’shi nsenga ngishale pa kintu kampanda. Tala VIDEO.
Tutale bibaabadi bafunde mu mukanda wa Yoobo takudi bipua bifikie ku 3 500. Badika Yoobo 26:7, akupu nuisambile luno lukonko alulondo:
Buakinyi abitukanyisha pa kuuka akiamba Bible’shi, nsenga ibaadi imikue “pashi kintu”?
Mu bipua 1 800 mmubabadi baukie abikaminaa mema muiyilu bu milemba na kunoka bu mpeshi pa nsenga. Aku namu Bible tabadi mupue kuakula ino mianda takudi bipua binunu. Badika Yoobo 36:27, 28, akupu nuisambile ino nkonko ayilondo:
Nkinyi akikukanyisha pabitale bino bibalesha Bible?
Ma verse abatukatuka mu kubadika abanyingisha lukulupilo lobe mu mianda i mu Bible su?
5. Bible mmutemukie mianda i na muulo
Badika Yeeshaya 44:27–45:2, akupu nuisambile luno lukonko alulondo:
Bible badi mutemukie mianda kinyi bipua 200 kumpala kua kabutu ka Babilone?
Kui mianda ya kala ayishinkamisha’shi Mfumu Siruse, a mu Perse na basalayi baaye babaadi babutule Babilone mu 539 K.B.B.b Babadi balalule muela ubadi aukaluila lupata. Na babatuelele mu kibundi ku kiibi kibadi kishale muasa abo nkukuata kiakia kibundi kushi kulua ngoshi. Lelo uno, takudi bipua bikile pa 2 500 kasha Babilone ashala bu kikulu. Tutale bibadi Bible mupue kuibilesha.
Badika Yeeshaya 13:19, 20, akupu nuisambile luno lukonko alulondo:
Mushindo kinyi ubadi ukumbane buno butemuki?
Kikulu kia Babilone ki mu Iraq mu ano etu mafuku
6. Bible mmutemukie mianda ikuete kukumbana lelo uno
Bible kuete kuitamina kino kietu kipungo, bu “mafuku a ku nfudiilo.” (2 Timote 3:1) Tutale kibadi kitemukie Bible pabitale kino kipungo.
Badika Mateo 24:6, 7, akupu nuisambile luno lukonko alulondo:
Mianda kinyi ibadi ileshe Bible’shi aikakitshika mu mafuku a ku nfudiilo?
Badika 2 Timote 3:1-5, akupu nuisambile ino nkonko ailondo:
Bible alesha’shi bantu bebungi ba mu mafuku a ku nfudiilo abekala na mwikelo wi naminyi?
Mmuikelo kinyi wa ku yanka okuete kumona kui bantu?
BANGI ABAMBA’SHI: “Bible mmukanda wa miele na mianda ya mpuandikishi.”
Mu kobe kumona, nkinyi akikushinkamisha’shi Bible nga kukulupila?
MU KIKOSO
Mianda ya kala, siyanse na matemuki, bioso abilesha’shi we mulombene kukulupila Bible.
Kuambuula
Bible mmukanda wa mianda ya mpuandikishi su ngua mianda ya binyibinyi?
Mianda kinyi ayilesha’shi siyanse muipushene na abiamba Bible?
Mu kobe kumona, Bible mulombene kutemuka mianda aifiki kumpala? Buakinyi wakula biabia?
TALUULA DINGI
Mu Bible mui bilema pabitale mianda ya siyanse su?
“Siyanse mmwipushene na abyamba Bible?” (Muisambo wi mu Internete)
Mianda kinyi ya binyibinyi pabitale “mafuku a ku nfudiilo”?
“Matemu 6 a mu Bible okuete kumona kulombana kwao” (Kitenta kia Mulami, 1/5/2011)
Tala bibadi bilombane matemuki pabitale Ampire a bena Greke.
Tala bibadi matemuki ashintuule mueneno a ungi muntu pabitale Bible.
“Ntshinadi nakumina’shi Efile Mukulu e kwanka nya” (Kitenta kia Mulami No. 5 2017)
a Butemuki, mmukandu aufiki kui Efile Mukulu awakuila pabitale mianda aifiki kumpala.
b K.B.B. alesha “Kumpala kua bipungo bietu,” na B.B. alesha “Bino bietu bipungo.”