Nkinyongua kikata kia kufuisha

“Tubaadi beyibakishene na sophiaa munda mua bipua 39 mpa na bibakumbile mukumbo wibukopo aye nkufua. Napetele bukuashi buibungi bua bakuetu, naadi dingi na bibungi bia kukita. Anka munda mua kipua kishima, naadi mupushe kinyongua kikile bukopo. Binaadi nepusha muishimba bibaadi abishintuluka nsaa yooso. Mpa na binobino kunyima kua bipua bisatu kasha afua, ingi nsaa napushaa kenyongoshi ke bukopo muishimba, na misango ibungi akefuilaa.”​—Kostas.

Tobofuishishe muntu oodi mufule su? Su mbiabia, okuete kupusha nka abipusha Kostas. Mianda ipeela nyi ayikalakashaa mu binangu sunga mukumbo w’eshimba kukila lufu lua muina dibaka noobe, muina kifuko, sunga kuuku a p’eshimba. Baasha binangu balongie kenyongoshi akatuukila mu kufuisha abashinkamisha uno muanda. Ungi muisambo wabadi batuushe mu jurnale a The American Journal of Psychiatry aulesha’shi: “Lufu nyi nkushimisha kumune akushalaa muishimba kushii kupua bukidi.” Muntu apusha kinyongua ki bino mmulombeene kuiyipusha’shi: ‘Bino biampusha abipu mafuku bungi kinyi? Nekala dingi na muloo su? Mmushindo kinyi wandia kupeta bukuashi?’

Ngaluulo ya ku ino nkonko ayisanganyibua mu uno nimero a Pasukayi! Muisambo aulondo aulesha kiodia kuuka’shi akikukitshikila su oyikalanga mupete maalo mafuku ashaale. Miisambo ayilondo ayilesha mishindo ikumbeene nkukuasha bua kupeelesha bukopo bua kenyongoshi koobe.

Atukulupila binyibinyi’shi miisambo ayilondo ayinyingisha na kutuusha bukuashi bulombane kui muntu ooso muinyongole bua kufuisha.