Kipindji Kya 7

Kubanga pa kusanguka kwa Yesu mpa na pa kwedibwa kwa Mpoolo mu lukano

Mwifuku dya kasatu kunyima kwa lufu lwaye, Yesu basangukile. Dyaby’efuku baadi mutukile balondji baaye misango itano. Yesu batungunukile na kwibamwekyela munda mwa mafuku 40. Paapa, ku meso kwa bangi balondji baaye, Yesu bakamiine mwiyilu. Kunyima kwa mafuku ekumi, Efile Mukulu bayishishe kikudi kiselele kwi balondji ba Yesu babaadi abatengyela mu Yeelusaleme.

Kunyima kwa byabya, beshikwanyi n’Efile Mukulu abelele batumibwa mu lukano, kadi mwikeyilu bebatushishe mwanka. Beshikwanyi abaadi baase mungi mulondji ayitanyinwaa bu Etshyene mabwe abo nkumwipa. Kadi atukyebe kumona mushindo ubaadi Yesu musangule ungi a ku bano bantu abaadi abakyengyesha balondji baaye bwashi ekale mufubi aaye mukata, na aye nkufika Mpoolo mutumibwa. Akupu, bipwa bisatu na ndambo kunyima kwa lufu lwa Yesu, Efile Mukulu batumine Mpyeele mutumibwa bwa kulungula mukandu wibuwa kwi Korneye, muntu shibaadi mwina Yuuda na kifuko kyaye.

Kunyima kwa bipwa pepi na 13 Mpoolo babangile lwendo lwaye lwa kumpala bwa nkalungula mukandu wibuwa. Mu lwendo lwaye lwa kabidi, Timote bayile na Mpoolo. Atukyebe kumona mushindo ubaadi Mpoolo na beenaye ba mu lwendo bafumankane na myanda ibungi ibuwa mu mudimo w’Efile Mukulu. Akupu, Mpoolo baadi mwedibwe mu lukano ku Looma. Kunyima kwa bipwa bibidi abaadi bamuposole, kadi abaadi bamwele dingi mu lukano abo nkumwipa. Myanda yabetulondela mu kino KIPINDJI KYA MUSAMBOBIDI ngikitshikye munda mwa bipwa pepi na 32.