Kipindji kya 4

Kubanga pa Nfumu a kwibedi mu Isaleele mpa na pa kwenda mu bupika mu Babilone

Saule bafikile bu nfumu a kwibedi mu Isaleele. Kadi Yehowa baadi mumupele, aye nkusangula Daavide bwashi ashale ku bufumu pa mbalo yaaye. Atukyebe kulonga myanda ibungi pabitale Daavide. Pabaadi kii nsongwalume, balwile na Golyate, mulume a kipambe. Kunyima kwa mafuku basuukile Nfumu Saule baadi mumukwatshile kyutu. Akupu Abigaile mukashi ebuwa baadi mumwimikye bwashi takitanga kintu kibubi.

Atukyebe dingi kulonga myanda ibungi pabitale Salomone mwana a Daavide, baadi mupyane pa mbalo ya Daavide bu nfumu a Isaleele. Ooso a ku banfumu basatu ba kumpala mu Isaleele, bashalele mu bufumu munda mwa bipwa 40. Kunyima kwa lufu lwa Salomone, bufumu bwa Isaleele bubaadi bwiabuule mu bipindji bibidi, bwa kunundu na bwa kuushi.

Bufumu bwa kunundu bubaadi na bisamba 10 na bubaadi bukite bipwa 257 kumpala kwa kubutudibwa na beena Aasiriya. Kunyima kwa bipwa 133, abaadi babutule bufumu bwa kuushi bubaadi na bisamba bibidi. Paapa beena Isaleele abayile mu bupika mu Babilone. Byabya kino Kipindji kya KANANKA akisambila myanda ikitshikye munda mwa bipwa 510, munda mwa byabya bipwa mukidikye myanda ibungi ya kukanya.