Bino nyi bibaadi abikyeb’Efile Mukulu su?
BADIKA julunale kampanda. Tala televizio, sunga kuteemesha kisashi. Okyebe kupusha myanda ibungi ya buntomboshi, ya ngoshi na ya terorisme! Banda kwela binangu pabitale nkalakasho yokwete kupeta. Pangi mmaladi sunga lufu lwa muntu oodi mufule bikwete nkushidisha eshimba. Wekupusha nka bibapushishe Yoobo muntu ebuwa bambile shi: “Buufu bwi naami, nemukolwe mpombo.”—Yoobo 10:15.
Banda kwiyipusha bino:
Bino nyi bibaadi abikumina Efile Mukulu bwande’mi na bwa bangi bantu su?
Nkunyi kwandy’a kupeta bukwashi bwa kukambila nkalakasho?
Twi n’efuku dyatukapete kufukama pa nsenga su?
Mu Bible mwi myalulo ibungi ibuwa ku ino nkonko.
BIBLE ALONGYESHA SHI EFILE MUKULU AKASHINTUULA INO MYANDA PA NSENGA.
“Akumuna mpolo yooso ku meeso aabo, na lufu taa lwikala kwanka dimo. Takwikala dimo sunga maalo, sunga kwidila, sunga mukumbo.”—Bifumbulwe 21:4
“Mulemane aketumbu bu ngulungu.”—Yeeshaya 35:6, NWT
“Meso a bampofu aakamono.”—Yeeshaya 35:5, NWT
“Booso balaale mu nyembo, abemutuuku.”—Yowano 5:28, 29
“Mwimushale [mwiumbo] sunga umune tamba dimo’shi: ‘Nee na mukumbo.’”—Yeeshaya 33:24
“Akukekala ntete ibungi pa nsenga.”—Misambo 72:16, NWT
PETA BUKWASHI BWA AKILONGYESHA BIBLE
Topwandikishanga mususa umune shi bino bifundjibwe mu masaki abashaala mbya madimi. Efile Mukulu mmulee shi akyebe kulombasha ino myanda yooso, na Bible apatuula mushindo wakyebe kwibikita.
Bible etupatulwila byanka mu mishindo ibungi. Kwete kulesha mushindo oodi mulombeene kupeta muloo wa binyibinyi kubanga binobino. Banda kwela binangu pabitale binyongwa na nkalakasho yokwete kupeta. Ngilombeene kwikala ya kukutwa kwa makuta, ya mu kifuko, kukutwa kwa mbidi bukome sunga lufu lwa muntu oodi mufule. Bible mmulombeene nkukwasha lelo uno bwa kupudisha nkalakasho yoodi nayo, na dingi Bible mmukumbeene nkukwasha bwa kunyinga sunga opeta yaaya nkalakasho mwanda kwete kwalula ku ino nkonko:
Bwakinyi tukwete kukyenga?
Nkinyi kyatudya kukita bwa kupudisha binyongwa?
Mushindo kinyi watudya kwikala na muloo mu kifuko?
Nkinyi akikitshikaa kunyima kwa lufu?
Atukemonena dingi na bakwetu bafwe su?
Atuuku naminyi shi Efile Mukulu akalombasha milayilo yaaye bwa mafuku e kumpala?
Bu byokwete kubadika uno mukanda, abilesha shi we na lukalo lwa kuuka akilongyeha Bible. Uno mukanda aukyebe nkukwasha. Uka shi ma paragrafe ngepushene na nkonko i kuushi kw’esaki. Midiyo ya bantu, mbapete muloo wa kulonga Bible na Batemwe ba Yehowa ku bukwashi bwa nkonko na myalulo. Atukulupila shi noobe naamu okyebe kusangala. Efile Mukulu akwelele mwabi binobino pokwete kusangeela uno mushindo wibuwa aupa bantu muloo, wa kulonga akilongyesha namu Bible!