Bombeela mu kifulo ky’Efile Mukulu

1, 2. Mbalo kinyi yatudi balombeene kupeta kifwamino kibuwa lelo uno?

BANDA kwela binangu bu’be kwete kwenda mwishinda mwifuku di kipapi kikata. Eyilu dibafiitshi nka fututu. Mpeshi babanga kubadima na kukungula, akupu babanga kunoka. Bobanga kusuuka lubilo, na kukimba mbalo ya kufwamina. Akupu, bomono ku lupese lw’eshinda mbalo ibuwa ya kufwamina. Mbalo imune ikata, twe mulombeene kutopa mwanka nya. Wekala na muloo ukile!

² Twi mu mafuku a kipapi ki bukopo. Myanda ya uno ndumbulwilo ikwete kwenda na kulwila ngofu. Kadi kwi mbalo ya kufwamina, mbalo ilombeene kwitukalwila ku masaku e kwanka lelo uno. Yaaya nyi mbalo kinyi? Pusha abilongyesha Bible: “Namba pabitale Yehowa shi: ‘Aye nyi nkifwamino kyande, kisuukilo kyande, Efile Mukulu ande, naakulupila koodi.’”​—Misambo 91:2.

3. Twi balombeene kukita kinyi bwashi Yehowa ekale kifwamino kyetu?

³ Banda kunangushena! Yehowa, Mupangi na Nfumu mukile bukata a eyilu na nsenga, mukumbeene kwikala bu kifwamino kyetu. Mukumbeene kwitukalwila, mwanda e na bukome bukile bantu booso balombeene kufika mu kwitulwisha. Sunga betukyengyesha, Yehowa mukumbeene kupudisha bubi booso bwabadi betufwishile. Twi balombeene kukita kinyi bwashi Yehowa ekale kifwamino kyetu? Abitungu tutuule lukulupilo mwadi. Na dingi, Eyi dy’Efile Mukulu aditulungula shi: “Bombeelayi mu kifulo ky’Efile Mukulu.” (Yuude 21, Kilombeno kipya 2009) Binyibinyi abitungu tubombeele mu kifulo ky’Efile Mukulu, na kulama kipwano kyetu na Nshetu a mwiyilu. Akupu twi bakumbeene kushinkamisha shi aye nyi nkifwamino kyetu. Kadi mushindo kinyi watudi balombeene kukita kyakya kipwano?

TUKUMIINE KIFULO KY’EFILE MUKULU NA MISHINDO YAADI MWIKILESHE

4, 5. Yehowa mwituleshe kifulo kyaye mu mishindo kinyi?

⁴ Bwa kubombeela mu kifulo ky’Efile Mukulu, abitungu tusangeele mishindo yaadi mwituleshe kifulo. Banda kwela binangu pabitale angi malongyesha a mu Bible oodi mulongye ku bukwashi bwa uno mukanda. Bu byadi Mupangi, Yehowa mwitupe nsenga bu mbalo yatudya kushaala na muloo. Mwi muushe byakudya bi bungi na mema, bupeta, nyema na ma mbalo ebuwa kumona. Bu bi Bible mmukanda waye, Efile Mukulu mwitufumbwile eshina dyaaye na nyikashi yaaye. Na dingi, Eyi dyaaye aditulesha shi batumine Mwan’aaye a kifulo pa nsenga, akumiina bwashi Yesu akyengye na etufwile. (Yowano 3:16) Kyakya kya buntu akilesha kinyi? Akitupa lukulupilo bwa mafuku e kumpala.

⁵ Lukulupilo lwetu bwa mafuku e kumpala lwi mu kingi kintu kyabadi bakite kwi Efile Mukulu. Yehowa mutuule guvernema a mwiyilu, Bufumu bwa Mesiya. Kubashala mafuku apela bwashi bupudishe makyenga na kwaluula nsenga bu mpaladiiso. Banda kutala wawa mwanda! Twi balombeene kwimushala mu kufukama na muloo bwa looso. (Misambo 37:29) Kadi bwa ano mafuku, Efile Mukulu mwitupe miiya ayitukwasha bwa kumona mushindo wa kwikala na nshalelo ebuwa binobino. Mwitupe dingi kya buntu kya luteko, mushindo wibuwa watudi balombeene kwisamba naaye nsaa yooso na mbalo yooso. Ino nyi mpenda myanda ipeela ayilesha mishindo ileshe Yehowa kifulo kyaaye kwi bantu booso mpa na koodi obe.

6. Nkinyi kyodi mukumbeene kukita bwa kifulo kyabadi bakuleeshe kwi Yehowa?

⁶ Lukonko lwa kinemo loodi mulombene kwiyipusha nyi nduno: Abitungu nkite kinyi pabitale mushindo wabadi banfule kwi Yehowa? Ooso muntu mmulombeene kwamba shi: “Abitungu mmufule naamu.” Nyi byopwandikishaa su? Yesu bambile shi uno nyi mwiya ukile miiya yooso, aye nkwamba shi: “Ofule Yehowa Efile Mukulu oobe n’eshimba dyoobe dyooso, na kikudi kyoobe kyooso, mpaa na kinangu kyoobe kyooso.” (Mateo 22:37) We na myanda ibungi ilombeene nkutakula mu kufula Yehowa Efile Mukulu. Kadi nkapenda kupusha shi we na kyakya kifulo nyi akulesha’shi we mufule Yehowa n’eshimba dyoobe dyooso, kikudi kyoobe kyooso, na binangu byoobe byooso su?

7. Penda kupusha mwishimba dyoobe shi we mufule Efile Mukulu akulesha kalolo mushindo oodi mumufule su? Patuula.

⁷ Anka bu abilesha Bible, penda kupusha mwishimba dyoobe shi we mufule Efile Mukulu ta nkupwa kwa mwanda nya. Byabya, sunga bibuwa kupusha shi we mufule Yehowa, kupusha kwi byabya nyi mpenda mbangilo a kifulo kya binyibinyi bwaye. Bwa kupeta mutshi wa bikuba, abitungu kwikala na lutete lwao. Byabya, su wekala na lukalo lwa kikuba, we mulombeene kusanka su bakupa penda lutete lwa kyakya kikuba su? Nya! Bi mumune na kupusha mwishimba shi we mufule Yehowa Efile Mukulu, nyi mpenda mbangilo a kyakya kifulo. Bible alesha shi: “Kifulo ky’Efile Mukulu kii bino: tulame miiya yaaye. Na iinyi miiya yaaye ta mbushito bwitutentekwe nya.” (1 Yowano 5:3) Bwashi kifulo kyatudi bafule Efile Mukulu kikale kya binyibinyi, abitungu kituushe bikuba bibuwa. Abitungu kimwenekyele ku bikitshino.​—Badika Mateo 7:16-20.

8, 9. Mushindo kinyi watudi balombeene kulesha kifulo kyetu na lutumbu kwi Efile Mukulu?

⁸ Atulesha kifulo kyetu kwi Efile Mukulu nsaa yatulondo miiya yaaye na kutumikila malango aaye. Ta bii bukopo bwa kwibikita nya. Pamutwe wa kwikala bu bushito bwitutentekwe, miiya ya Yehowa i kwanka bwa kwitukwasha bwashi twikale na nshalelo ebuwa, na a muloo. (Yeeshaya 48:17, 18) Patudi na nshalelo mwipushene na miiya ya Yehowa, atulesha Nshetu e mwiyilu shi twi na lutumbu lukata kwadi bwa byooso byadi mwitukitshine. Bi malwa, mwanda lelo uno mpenda bantu bapeela bakwete kumulesha lwalwa lutumbu. Tabitungu shi tukutwe lutumbu bu bibakitshine bangi bantu ba mu mafuku abaadi Yesu pa nsenga nya. Yesu bapashishe bantu ekumi abaadi na nsudi, nkapenda muntu umune ndjo balukiile kwadi bwa kumutumbula. (Luuka 17:12-17) Binyibinyi, abitungu twikale bu yawa muntu sha lutumbu, tatwikalanga bu baaba bantu kitema!

⁹ Kadi, miiya kinyi ya Yehowa ayitungu shi tukokyele? Tatupwile kumona ingi miiya ibungi mu uno mukanda, kadi tubande kutaluula ingi miiya ipela. Kukokyela miiya y’Efile Mukulu akukyebe kwitukwasha bwa kubombeela mu kifulo ky’Efile Mukulu.

TUNGUNUKA NA KWIFUBWILA PEPI NA YEHOWA

10. Tuusha kileshesho akilesha bwakinyi abitungu kutungunuka na kupeta kiukilo kya myanda itale Yehowa Efile Mukulu.

¹⁰ Etabula dikata aditungu kwela bwa kwifubwila pepi na Yehowa nyi nkulonga kwa myanda imutale. Nyi mmwanda autungu kutungunuka na kukita, tabitungu kwimika nya. Su wekala pasha okwete koota kaalo bufuku mu nsaa ya mashika ebukopo, we mukumbeene kutadiila bwashi kaalo katshimbe akupu kashime su? Nya. We mukumbeene kutunguka na kwela nteete bwashi kaalo katungunukye na kutemba bi bukopo. Bwashi opushe bibuwa abitungu otungunukye na kushisakanya nteete bwashi kaalo katungunukye na kutemba. Anka abikalaa nteete ayitembesha kaalo, ‘kuwuka kw’Efile Mukulu’ akwitukwasha bwashi kifulo kyatudi nakyo bwa Yehowa kikale kii bukopo.​—Myeele 2:1-5.

11. Malongyesha a Yesu abaadi na bukome kinyi kwi balondji baaye?

¹¹ Yesu baadi akumiina bwashi balondji baaye balame kifulo kyabo bwa Yehowa na bwa Eyi Dyaaye dya binyibinyi bwashi kishale akitembe ngofu. Kunyima kwa kusanguka kwaye, Yesu balungwile balongi baaye babidi pabitale angi matemuki a mu Bifundwe bya kina Ebreeyi abaadi alombane kwadi. Nkinyi kibaadi kikitshikye? Kunyima babakwile shi: “Mashimba eetu taaekalanga bu aatembe kaalo munda mwetu, peekalanga eesamba neetu mwishinda, naa peetupushishanga Bifundwe?”​—Luuka 24:32.

12, 13. (a) Bantu bebungi lelo uno bakwete kukita kinyi pabitale kufula Efile Mukulu mpa na Bible? (b) Nkinyi kyatudi balombeene kukita bwashi kifulo kyetu takipeelanga?

¹² Mususa wa kumpala ubolongyele myanda ayilongyesha Bible, toboodi mumone shi eshimba dyoobe dibabangile kukutemba na muloo ooso, na katshintshi bwa kulungula bantu myanda itale Efile Mukulu su? Nyi biboodi mupushe. Bantu bebungi abaadi bapushe nka byabya. Mwanda ukata binobino nyi nkulama kyakya kifulo bwashi kitungunukye na kwikala bukopo. Tabitungu shi tulonde mushindo wi nshalelo a kwifuku dyooso mu uno ndumbulwilo nya. Yesu batemukile shi: “Kifulo akikapeele munkatshy’a bantu.” (Mateo 24:12) Mushindo kinyi oodi mukumbeene kukita bwashi kifulo kyoobe bwa Yehowa na bwa bya binyibinyi bya mu Bible takipeelanga?

¹³ Tungunuka na kupeta kiukilo kya Yehowa Efile Mukulu na Yesu Kidishitu. (Yowano 17:3) Nangushena ngofu ku myanda yoodi mulongye mu Eyi dy’Efile Mukulu, weyipushe shi: ‘Ino myanda ayindongyesha kinyi pabitale Yehowa Efile Mukulu? Nkintu kinyi dingi kyandi mulongye akintakula bwa kumufula n’eshimba dyande dyooso, binangu byande byooso na kikudi kyande kyooso?’ (Badika 1 Timotee 4:15.) Su onangushena mu wawa mushindo, we mulombeene kulama kifulo kyoobe bwa Yehowa bwashi kikale akitembe.

14. Luteko ndulombeene kwitukwasha naminyi bwa kunyingisha kifulo kyetu bwa Yehowa?

¹⁴ Ungi mushindo wa kulama kifulo kyoobe bwa Yehowa bwashi kitembe ngofu nyi kusambila efuku dyooso. (1 Beena-Tesalonika 5:17) Mu Shapitre 17 a uno mukanda, atwikalanga balongye shi luteko nyi nkya buntu kya muulo ukata kyabadi betupe kwi Efile Mukulu. Anka abinyingaa kipwano kya bantu nsaa yabelungushena myanda patooka efuku dyooso, kipwano kyetu na Yehowa akinyingi nsaa yatwele nteko kwadi efuku dyooso. Ta bibuwa bwashi twekalanga atwambuula myanda imune imune ishy’ayituukila mu mashimba eetu nsaa yatwele luteko nya. Abitungu twisambe na Yehowa nka abikalaa mwana esamba na nshaaye a kifulo. Byabya, abitungu twisambe naaye na kanemo kooso, kadi tumupatulwile myanda yooso patooka, na bululame booso, na kwakula myanda yooso n’eshimba dimune. (Misambo 62:9) Binyibinyi, kwilongyela Bible na kwela nteko n’eshimba dimune kwi na muulo mu lulangwilo lwetu na a kwitukwasha bwa kubombeela mu kifulo ky’Efile Mukulu.

IKALA NA MULOO MU LULANGWILO LOOBE

15, 16. Bwakinyi twi balombeene kumona kulungula kwa mukandu wi buwa wa Bufumu bu kinemo kikata kyatudi nakyo na bu kintu kya muulo ukata?

¹⁵ Kwilongyela Bible na kwela nteko nyi myanda ya mu lulangwilo lwetu yatudi balombeene kukita pa bupenka bwetu. Kadi binobino, tubande kutaluula ingi myanda ya mu lulangwilo lwetu yatukitaa kumpala kwa bantu bebungi bu: Kulungula bantu pabitale myanda yatudi bakumine. Twesambile na bantu pabitale ingi myanda yoodi mulongye mu Bible su? Su we mukite byabya, nyi mwanda wibuwa bukile. (Luuka 1:74) Nsaa yatulungula bangi myanda ya binyibinyi yatudi balongye pabitale Yehowa Efile Mukulu, tukwete kukita mudimo wa muulo ukata wabadi bape beena Kidishitu booso: Kulungula mukandu wibuwa wa Bufumu bw’Efile Mukulu.​—Badika Mateo 24:14; 28:19, 20.

¹⁶ Mpoolo mutumibwa baadi amono mudimo waaye bu kintu kya muulo ukata. (2 Beena-Kodinto 4:7) Kulungula bantu pabitale Yehowa Efile Mukulu na pabitale mpango yaaye nyi mudimo wibuwa oodi mukumbeene kukita. Atufubu mudimo wa Nfumu mukile ba nfumu booso, na atukyebe kupeta efuto dikile bukata. Nsaa yokitshi uno mudimo, okwete kukwasha basha mashimba afukame bwashi befubwile pepi na Nshetu e mwiyilu na bwashi batwele mwishinda dya muwa wa looso. Mudimo kinyi ungi ukumbeene kukila uno winyi? Na dingi, kutuusha bukamonyi pabitale Yehowa na Eyi dyaaye akutamisha lukumiino loobe na kunyingisha kifulo kyoobe bwaye. Mushindo ooso okwete kwitatshisha bwa kukita uno mudimo Yehowa kwete kwiwata na muulo ukata. (Beena-Ebreeyi 6:10) Kwikala na bibungi bya kukita mu uno mudimo akukyebe nkukwasha bwa kubombeela mu kifulo ky’Efile Mukulu.​—Badika 1 Beena-Kodinto 15:58.

17. Bwakinyi abitungu kukita mudimo wa kulungula mukandu wibuwa lelo uno kushi kunyengakana?

¹⁷ Bibuwa kutentekyesha shi abitungu kukita mudimo wa kulungula mukandu wibuwa kushi kunyengakana. Bible amba shi: ‘Nyiisha nka na kulungula mukandu w’Efile Mukulu.’ (2 Timotee 4:2, Kilombeno kipya) Bwakinyi abitungu kunyiisha kukita uno mudimo lelo uno? Eyi dy’Efile Mukulu aditulungula shi: “Tadidi peepi. Efuku dikata dya Yehowa; dii peepi, adifiki bukidi bibi.” (Sofonii 1:14) Binyibinyi, kipungo kikwete kwifubwila pepi ngofu, nsaa ayikyebe Yehowa kufudiisha uno ndumbulwilo a myanda ya pano. Abitungu kudimusha bantu! Abitungu baukye shi kino ndjo kipungo kyabadi balombeene kusangula Yehowa bu Nfumu aabo. Nfudiilo ‘tayikwete kunyengakana nya.’​—Abakuke 2:3.

18. Bwakinyi abitungu tulangwile Yehowa pamune na beena Kidishitu ba binyibinyi?

¹⁸ Yehowa akumina shi tumulangwile pamune na beena Kidishitu ba binyibinyi. Nyi bwakinyi Eyi dyaaye adyamba shi: “Twikwasheneeyi ku muntu na muntu, bwa kwinyingisheena mu kifulo na mu mifubo iibuuwa. Tatupungilanga kufika mu biikongeeno byeetu, bu bibaabanga bangi kyaakya kyuubishi, anka twinyingisheeneeyi ku mashimba nkibinkibi pano panumono’shi efuku dya Mwanana dibeeseelela peepi.” (Beena-Ebreeyi 10:24, 25) Nsaa yatwibungu pamune na bakwetu beena Kidishitu mu bisangilo, twi na mwabi ukata wa kutumbisha na kulangwila Efile Mukulu atudi bafule. Atwinyingishena na kwikankamishena.

19. Mushindo kinyi watudi balombeene kunyingisha kifulo mu kakongye ka beena Kidishitu?

¹⁹ Nsaa yatwibungu pamune na bangi balangwidi ba Yehowa, atunyingisha kifulo na bukuuku bwetu mu kakongye. Bibuwa twikale atukimbi myanda ibuwa i mwi bakwetu, anka abikitaa Yehowa kwatudi. Tabitungu shi twikale atukimbi shi bakwetu bekale bapwidikye nya. Bibuwa tushinguule shi bantu booso ta mbanyingye mu kikudi mushindo umune nya na’shi atwe booso atukitaa milwisho. (Badika Beena-Kolose 3:13.) Kita moobe mooso bwa kudy bukuuku na baaba bafule Yehowa ngofu, na okyebe kumona’shi onyingi mu kikudi. Binyibinyi, kulangwila Yehowa pamune na bakwenu balume na bakashi akukyebe nkukwasha bwa kubombeela mu kifulo ky’Efile Mukulu. Mushindo kinyi aufutaa Yehowa baaba abamulangwila na bulamate booso na ababombeela mu kifulo kyaaye?

KIMBA “MUWA WA BINYIBINYI”

20, 21. “Muwa wa binyibinyi,” nkinyi, na bwakinyi ndukulupilo lwi buwa?

²⁰ Yehowa apeyaa bafubi baaye bamulamate efuto, kadi ebapeyaa efuto kinyi? Banda kutala, twe na muwa su? Booso bwetu atukumina shi twi na muwa. Bebungi ba kwatudi mbalombeene kwakula shi be na muwa mwanda bakwete kupuwa, kudya na kutoma. Binyibinyi twi na muwa. Na dingi nsaa yatudi na muloo, twi balombeene kwamba shi: “Binobino twi na muwa wa binyibinyi!” Kadi, Bible alesha shi lelo uno takwi muntu e na muwa wa binyibinyi nya.

²¹ Eyi dy’Efile Mukulu aditutekye bwashi ‘tutambule muwa wa binyibinyi.’ (1 Timotee 6:19) Bino bishima abilesha’shi “muwa wa binyibinyi” nyi nkintu kyatukulupila bwa kupeta mu mafuku e kumpala. Binyibinyi, nsaa yatwikala bapwidikye, atukyebe kwikala na muwa wa binyibinyi, mwanda atwikala na muwa mu mushindo umune na bibaadi mpàngo y’Efile Mukulu ku kibangilo. Dingi efuku mu mafuku e kumpala patwikala mu mpaladiiso pa nsenga na mbidi bukome, mu kufukama, na muloo; yaaya nsaa atukyebe kutambula “muwa wa binyibinyi”​—muwa wa looso. (1 Timotee 6:12) Lwalwa ta ndukulupilo lwi buwa su?

22. Mushindo kinyi oodi mukumbeene “kutambula muuwa wa binyibinyi”?

²² Mushindo kinyi watudi balombeene “kutambula muwa wa binyibinyi”? Pabitale uno mwanda Mpoolo balungwile beena Kidishitu bwashi ‘bakite bibuwa’ na’shi “bekale ba mpeta mu mifubo ibuwa.” (1 Timotee 6:18) Na dingi, byooso mbitale mushindo watutumikila myanda ya binyibinyi yatudi balongye mu Bible. Kadi Mpoolo baadi mwambe shi atupete “muwa wa binyibinyi” nkapenda mu kukita kwa mifubo ibuwa su? Nya, mwanda luno lukulupilo lwibuwa atwilupetela nka penda ku “buuntu bwa kalolo” k’Efile Mukulu. (Beena-Looma 5:15) Byabya, Yehowa e na muloo wa kupa baaba abamufubila na bulamate booso efuto. Akumina’shi wekale na “muwa wa binyinyi.” Baaba ababombeela mu kifulo ky’Efile Mukulu abakyebe kupeta uno muwa wa muloo, wa kufukama na wa looso.

23. Bwakinyi bibuwa kubombeela mu kifulo ky’Efile Mukulu?

²³ Abitungu ooso a kwatudi eyipushe shi: ‘Nkwete kulangwila Efile Mukulu muyiile byabadi baleshe mu Bible su?’ Su twetalula kwifuku n’efuku na twasangana’shi nshalelo eetu e byabya, yaaya nsaa twi kwamba shi twi mwishinda dibuwa. Twi balombeene kushinkamisha shi Yehowa nyi nkifwamino kyetu. Akyebe kukalwila bafubi baaye basha bulamate mu nkalakasho ya ano mafuku a ku nfudiilo a uno ndumbulwilo a myanda. Yehowa akyebe dingi kwitupasha bwashi tutwele mu ndumbulwilo mupya akyebe kufika binobino. Twi na muloo ukata wa kumona kyakya kipungo! Atukyebe dingi kwikala na muloo wa kwata bitshibilo bibuwa mu ano mafuku a ku nfudiilo. Su bwata byabya bitshibilo ano mafuku, okyebe kupeta “muwa wa binyibinyi,” muwa ubaadi Yehowa mwitulumbulwile kubanga kala.