Ouku Batemwe ba Yehowa bungi kinyi? Bangi ba kwatudi mbekungishene noobe, mbeena mudimo noobe sunga shi mbeena kalasa noobe. Pangi tababesambile noobe myanda ya mu Bible. Twi bantu ba mushindo kinyi na bwakinyi tukwete kulungula mbantu ba mbalo yooso pabitale lukumino lwetu?

Twi bantu nka bi bantu booso. Atufiki ku mpese ilekene na twi na nshalelo mwilekene. Bangi bakwatudi abaadi mu bingi bipwilo, bangi namu tababaadi abakumiina Efile Mukulu nya. Byabya kumpala kwa kwikala bu Batemwe, atwe booso tubaadi baate nsaa ya kutaluula kalolo malongyesha e mu Bible. (Bikitshino 17:11) Tubakuminyine myanda ibatulongyele, na tweatshila kitshibilo kya kulangwila Yehowa Efile Mukulu.

Kulonga kwa Bible kukwete kwitukwasha. Anka bu bangi bantu booso, atufumankanaa na nkalakasho ibungi na dingi tukwete kulwa na kubofula kwetu kwa bu muntu. Kadi patutompo kulonda miiya ya mu Bible mu nshalelo etu a mafuku ooso, tukwete kumona shi mwikeelo wetu ukwete kwenda na kulumbuluka. (Misambo 128:1, 2) Nyi bwakinyi tukwete kulungula bangi myanda ibuwa yatudi balongye mu Bible.

Atulondo binangu by’Efile Mukulu mu nshalelo etu. Anka bu abyamba Bible, bino binangu abitukwasha bwa kwikala bibuwa na kunemeka bangi, na kwikala na bululame na kalolo. Abitukwasha bwa kwikala na mbidi bukome na kwikala bantu be na muulo na abakwasha bakwabo mbalo yabadi bashale. Abibungu bifuko na kukwasha bantu bwashi bekale na nyikashi ibuwa. Bu byatwiuku shi “Efile Mukulu te na ntoondo,” twi munkatshi mwa bakwetu ba nsenga ishima be mu buumune na be na lukumiino lumune, basha batala ekoba sunga myanda y’eumbo kampanda. Sunga mbyabidi shi ooso a kwatudi mmuntu bi bangi bantu, atwe twi bobeshe kwikala bu mwilo wilekeene na bingi bisamba.​—Bikitshino 4:13; 10:34, 35.

• Myanda kinyi ayilesha shi Batemwe ba Yehowa mbantu nka bi bantu booso?

• Mu kulonga kwa Bible Batemwe ba Yehowa mbalongye myanda kinyi?

Bantu bebungi abapwandikishaa shi Batemwe ba Yehowa, mbeena kipwilo kituukye ano mafuku. Aku namu, takudi bipwa bikile pa 2 700 abaadi betanyine bafubi b’Efile Mukulu umune a binyibinyi bu “tumonyi twaye” sunga shi Batemwe. (Yeeshaya 43:10-12) Mpa na mu kipwa kya 1931, abaadi abetuwuku mwishina dya bu Balondji ba Bible. Bwakinyi twi baate eshina dya bu Batemwe ba Yehowa?

Eshina dyetu adilesha Efile etu. Mu ma maniskri a kala a Bible, eshina dy’Efile Mukulu, Yehowa, adisanganyibwa misusa binunu. Mu angi ma Bible, mbafunde miasu bu Mwanana sunga bu Efile Mukulu. Aku namu, Efile Mukulu a binyibinyi baadi mwileeshe kwi Moyiise mwishina dyaaye dya bu Yehowa aye nkwamba shi: “Dino nyi eshina dyande bwa looso.” (Efilu 3:15, NWT) Pabakitshine byabya, baadi muleshe shi mwilekene na b’efile ba madimi. Twi na muloo wa kutwala eshina diselele dy’Efile Mukulu.

Adilesha mufubo wetu. Mu mafuku a kala, mulongo wa bantu bebungi, kubanga na Abele, muntu mululame, abalesheshe bukamonyi mu lukumiino lwabo kwi Yehowa. Munda mwa bipwa nkama, Nowa, Abrahame, Sara, Moyiise, Daavide na bangi bantu abaadi besangye mu ‘kisaka kikata kya tumonyi.’ (Beena-Ebreeyi 11:4–12:1) Anka bilombeene muntu kutuula bukamonyi ku tumilaadi bwa kwakwila muntu shii musoole, atwe namu twi na kitshibilo kya kuukisha bantu bya binyibinyi pabitale Efile Mukulu etu.

Tukwete kulonda kileshesho kya Yesu. Mu Bible abamwitamina bu “kamonyi ka kishima na ka binyibinyi.” (Bifumbulwe 3:14) Yesu aye nabeene bakwile shi ‘muleshe bantu eshina dy’Efile Mukulu’ nashi baadi mutungunukye na ‘kuleesha bukamonyi ku bya binyibinyi’ pabitale Efile Mukulu. (Yowano 17:26; 18:37, Kilombeno kipya) Nyi bwakinyi, abitungu shi balondji ba binyibinyi ba Kidishitu batwale eshina dya Yehowa na kwidiukisha kwi bantu. Byabya nyi bikwete kwitatshisha Batemwe ba Yehowa.

• Bwakinyi Balondji ba Bible mbaate eshina dya bu Batemwe ba Yehowa?

• Takudi bipwa bungi kinyi kasha Yehowa ekala na batemwe pa nsenga?

• Kamonyi kakata ka Yehowa nanyi?

Mu Bible abaadi baleshe shi kunyima kwa lufu lwa Kidishitu, balambukishi ba madimi abakyebe kutuuka munkatshi mwa beena Kidishitu bwa kulwisha malongyesha a binyibinyi a mu Bible. (Bikitshino 20:29, 30) Byabya ndjo bibakitshikile kunyima kwa mafuku. Ababangile kusanga malongyesha a Yesu na nangunangu ya ba mpangano, abyo nkutuusha bwina Kidishitu bwa madimi. (2 Timotee 4:3, 4) Mushindo kinyi watuuku lelo uno shi twi na mpushisho ebuwa a akilongyesha Bible binyibinyi?

Nguba bakumbeene bwashi Yehowa aleshe bya binyibinyi. Yehowa baadi muleshe shi ‘ku kipungo kya nfudiilo kuuka kwa binyibinyi akukatama.’ (Danyele 12:4) Mu 1870, kasaka kapela ka bantu abaadi abakimbi bya binyibinyi bya mu Bible kabamwene shi malongyesha a bipwilo bibungi tangepushene na Bifundwe nya. Byabya, abo nkubanga kukimba mpushisho ebuwa a malongyesha a mu Bible na Yehowa baadi mwibakwashe bwashi bapushe Bifundwe kalolo.

Bantu basha mashimba atooka abalongyele Bible kalolo. Baaba Balondji ba Bible ba kishima, bano batudi balonde, abaadi na mayele a kulonga Bifundwe atukwete kutungunuka na kulonda lelo uno. Abaadi abataluula mutwe wa mwanda wi mu Bible akupu abakidi ku ungi. Pabafiki mbalo i verse a mu Bible abasha bapusha kalolo, abaadi abatala angi maverse bwa kumupatuula kalolo. Nsaa yabafiki ku nfudiilo a myanda ipusheene na bingi Bifundwe, abebifundu. Pababaadi abalekye Bible bwashi epatuule aye nabeene, abafumbwile bya binyibinyi pabitale eshina dy’Efile Mukulu na Bufumu bwaye, mpango yaaye pabitale bantu na nsenga, pabitale bafwe na lukulupilo lwa kusanguka. Kukimbuula kwabo nkwibakwashe bwa kutuuka mu bupika bwa ndambukisho na bipikwa bya madimi.​—Yowano 8:31, 32.

Kubanga mu 1879 Balondji ba Bible abaadi bamone shi nguba balombana akuukisha bantu bya binyibinyi. Mu kyakya kipwa, ababangile kutuusha julunale atukwete kutungunuka na kutusha lelo uno, Kitenta kya Mulami Akilungula Bufumu bwa Yehowa. Binobino tukwete kulungula bantu bya binyibinyi mu maumbo 240 na mu ndimi 750. Kasha takwekeele kiukilo kya bya binyibinyi kikata bino!

• Kunyima kwa lufu lwa Kidishitu, nkinyi kibakitshikile pabitale bya binyibinyi bi mu Bible?

• Nkinyi kitukwashe bwa kufumbula bya binyibinyi pabitale Eyi dy’Efile Mukulu?

Munda mwa bipwa makumi, Batemwe ba Yehowa abaadi batumikye na angi ma Bible a mishindo ilekeene, na dingi mbeatuushe mu byamo byabo, na kwiabila bantu. Akupu twibamone shi bibuwa kutuusha Bible mupya mukumbeene kukwasha bantu bwashi bapete ‘kiukilo kya binyibinyi,’ muyile akikyebe eshimba dy’Efile Mukulu. (1 Timotee 2:3, 4) Byabya, mu 1950 twi babangye kutuusha bipindji bya Bible etu mu ngakwilo a ano mafuku, Traduction du monde nouveau mu Anglais. Uno Bible mbamwalule kalolo na bululame booso mu ndimi ikile pa 130.

Bibaadi abitungu kwikala na Bible e na ngakwilo mubofule. Ndimi ikwete kwenda na kushintuluka na angi ma Bible e na ngakwilo a kala e bukopo. Na dingi, mbafumbule ma maniskri a binyibinyi a kala e pepi na aa a kumpala aakwasha bwa kupeta mpushisho ebuwa a Bible a mu kina Ebreeyi, kina Arameya na mu kina Greke.

Bibaadi abitungu kwikala na Bible anemeka eyi dy’Efile Mukulu. Sunga mbashintule nfundjilo a eyi dy’Efile Mukulu, abitungu shi bano abaluula Bible balonde nka abyamba bifundwe bya kumpala. Sunga mbyabya, mu ma Bible ebungi, eshina dy’Efile Mukulu, Yehowa tadi mu Bifundwe Biselele nya.

Bibaadi abitungu kwikala na Bible alusha nkumo yooso kwi Efile Mukulu. (2 Samwele 23:2) Mu Bible a Traduction du monde nouveau, eshina dya Yehowa mbedyalushe na adisanganyibwa mwanka misusa ikile pa 7 000 mu maniskri a kala a Bible bu byabadi baleshe mu kino kifwatulo ki kuushi kw’esaki. (Misambo 83:18) Bu kipeta kya kukimbuula kwa mu bipwa bibungi, uno Bible e buwa kubadika mwanda kwete kulesha binangu by’Efile Mukulu kalolo. Sunga wekala na Bible a Traduction du monde nouveau ata shi twe naaye, atukunyingisha bwashi wekale na kiubishi kibuwa kya kubadikanga Eyi dya Yehowa efuku dyooso.​—Yooshwa 1:8; Misambo 1:2, 3.

• Bwakinyi tubaadi baate kitshibilo kya kutuusha Bible mupya?

• Muntu ooso akumina kulonga akikyeb’Efile Mukulu abitungu ekale na kiubishi kya kukita kinyi?