Mu ndumbulwilo etu tatwi na bakata ba kipwilo babafutaa makuta nya. Kadi, anka bu bya bibaadi mu mafuku ababangile kakongye ka beena Kidishitu, bakulu banyingye mu kikudi mbasangulwe bwa “kulama kipwilo [kakongye, NWT] ky’Efile Mukulu.” (Bikitshino 20:28) Bakulu nyi mbalume banyingye mu kikudi abakunkusha na kulama kakongye, “kushi na kukamika, anka na muloo ooso; bu abikyebe Efile Mukulu . . . kushi na lwabi, anka na kwilambula.” (1 Mpyeele 5:1-3) Bakwete kwitukitshina mudimo kinyi?

Bakwete kwitukalwila na kwitulama. Bakulu bakwete kukunkusha kakongye ku bukwashi bwa Bifundwe na kukwasha beena kakongye bwashi bekale pepi na Yehowa. Bu byabauku shi Efile Mukulu mmwibape uno mudimo ukata, bakulu tabakitaa bu abamunu kakongye nya, sunga mbyabya, bakwete kwitatshisha bwa buuwa bwetu na bwashi twikale na muloo. (2 Beena-Kodinto 1:24) Anka bi mulami etatshishaa bwa kulama mukooko ooso, bakulu abetatshishaa bwa kuuka mwina kakongye ooso.​—Myeele 27:23.

Bakwete kwitulongyesha mushindo wa kukita akikyeb’Efile Mukulu. Ku lubingo looso, bakulu abakunkushaa bisangilo bya kakongye bwa kunyingisha lukumino lwetu. (Bikitshino 15:32) Bano balume bepaane mu mudimo wabo bakwete kukunkusha mudimo wa kulungula mukandu wibuwa, bakwete kutumika pamune n’etu na kwitulongyesha mishindo yooso ya bulungudi.

Bakwete kunyingisha ooso a kwatudi. Bwa kwitukwasha bwashi tunyingishe kipwano kyetu na Yehowa, bakulu ba mu tukongye twetu abafikaa mu kwitutala ku mashibo etu sunga patudi ku Nshibo ya Bufumu bwa kwitukwasha na kwitunyingisha ku bukwashi bwa Bifundwe.​—Jaake 5:14, 15.

Kukaasha midimo yabadi nayo mu kakongye, bakulu bebungi be na ingi mifubo na mashito a mu kifuko abibataa nsaa ibungi. Bano bakwetu balume abafubaa ngofu twi balombeene kwibapa kinemo.​—1 Beena-Tesalonika 5:12, 13.

• Bakulu abakitaa mudimo kinyi mu kakongye?

• Mushindo kinyi auleshaa bakulu shi abetatshisha bwa ooso a kwatudi?

Mu Bible abakula pabitale bisaka bibidi bya balume be na mashito mu kakongye​—“bakulu na bafubi.” (Beena-Fidipe 1:1, NWT) Misusa ibungi akwikalaa bakulu na bafubi ba midimo bebungi mu tukongye. Bafubi ba midimo abetukitshinaa midimo kinyi?

Abakwashaa kasaka ka bakulu mu kakongye. Bafubi ba midimo, mbansongwalume sunga bantu bakulu, be na kipwano kibuwa na Yehowa na mbantu bakukulupila na bepaane mu mudimo wabakitshi. Abakitaa midimo y’efuku n’efuku itale kulumbuula kwa myanda na kwa bintu mu kakongye. Bino abikwasha bakulu bwashi bepane mu midimo ya kulongyesha na kulama beena kakongye.

Abakitaa midimo ayitukwashaa ngofu. Bangi bafubi ba midimo be na mudimo wa kukukila bantu abafiki mu bisangilo. Bangi abalumbuula myanda itale bikolo, kwabila mikanda, kutala myanda ya makuta a mu kakongye, na pabitale kwabila kwa beena kakongye ma teritware abadya kulambukisha. Abakwashaa dingi mu kulumbuula na kulama kwa Nshibo ya Bufumu bwashi ikale bibuwa. Bakulu mbalombeene kwibateka bwashi bekale abakwasha bantu banunu be mu kakongye. Sunga bebapa midimo kinyi, bafubi ba midimo abeyikita n’eshimba dimune nyi bwakinyi twi na kya kwibapa kinemo.​—1 Timotee 3:13.

Mbalume beena Kidishitu abatuusha kileshesho kibuwa. Bafubi ba midimo mbebasangule mwanda wa nyikashi yabo ya mu kikudi ibuwa. Pabakitshi miisambo mu kakongye, abanyingisha lukumino lwetu. Pabakunkusha mudimo wa kulungula mukandu wibuwa, bakwete kwitukwasha bwashi twikale na kishima mu bulungudi. Pa bakwete kukita myanda ayibatekye bakulu mu kakongye, bakwete kukwasha bwashi beena kakongye bekale na muloo na shi bekale mu buumune. (Beena-Efeeze 4:16) Kunyima, abo namu mbalombeene kulombasha myanda itekibwe bwa kwikala bakulu mu kakongye.

• Bafubi ba midimo mbantu ba mushindo kinyi?

• Mushindo kinyi wabakwashaa kakongye bwashi katambukye kalolo?

Mu Bifundwe bya bwina Kidishitu bya kina Greke abesambila misango ibungi pabitale Barnabee na Mpoolo mutumibwa. Bano balume abaadi bakunkushi abaadi abende na kutambuka, bwa kutala tukongye twa beena Kidishitu ba kumpala. Bwakinyi? Abaadi abetatshisha ngofu bwashi bakwabo beena Kidishitu bekale bibuwa. Mpoolo bambile shi baadi na lukalo lwa ‘kwaluka mu kutala bakwabo’ bwa kumona su be bibuwa. Baadi akumina kutambuka nkama ya bilometre bwa kwenda mu kwibanyingisha. (Bikitshino 15:36, Kilombeno kipya) Bakunkushi abenda na kutambuka ba ano mafuku namu be na lwalwa lukalo.

Abafikaa mu kwitunyingisha. Mukunkushi a kifunda ooso efunyaa mu tukongye 20 sunga kukila misango ibidi ku kipwa, na akishaa lubingo lushima mu kakongye kooso. Bano bakwetu balume abauku mudimo kalolo na bakashi baabo, su mbayibakile, mbakumbeene kwitukwasha ngofu. Bakwete kwitatshisha bwa kuuka muntu ooso, mukinga sunga mukulu, na be na lukalo lukata lwa kwitushindikila mu mudimo wa bulungudi na mu kulonga Bible na bantu. Bano bakunkushi abendaa na bakulu ba mu kakongye mu kutembela bangi beena kakongye, na abakitaa miisambo ayitunyingisha ku bisangilo na ku bikongeno.​—Bikitshino 15:35.

Abetatshishaa bwa muntu ooso. Bakunkushi ba bifunda abetatshishaa ngofu bwashi tukongye twikale tunyingye mu kikudi. Abebungaa na bakulu ba tukongye na bafubi ba midimo bwa kutaluula myanda yabadi balumbuule na kwibapa malango pabitale mushindo wa kukumbasha midimo yaabo. Abakwasha ba mbala-mashinda bwa kobesha mudimo wabo, na be na muloo wa kuuka bantu bapya bafikye mu kakongye na kuuka mushindo wabakwete kukula mu kikudi. Ooso a ku bano bakwetu mwipane bu ‘mwinetu afubu n’etu pamune pa mwanda wetu.’ (2 Beena-Kodinto 8:23) Abitungu tulonde kileshesho kyabo kya kwilambula kwi Efile Mukulu.​—Beena-Ebreeyi 13:7.

• Bwakinyi bakunkushi ba kifunda abendaa mu kutala tukongye?

• Kufika kwabo mu kakongye akwitukwasha mushindo kinyi?

Apakitshika masaku kampanda, Batemwe ba Yehowa abelumbuulaa musango umune bwa kukwasha bakwabo abápete malwa. Mushindo wabetatshishaa aulesha shi mbefulene kifulo kya binyibinyi. (Yowano 13:34, 35; 1 Yowano 3:17, 18) Mushindo kinyi watwibakwashaa?

Atutushaa makuta. Pabatukile nsala mu Yudea, beena Kidishitu ba kumpala mu Antyoshe abatumiine bakwabo beena Kidishitu bukwashi bwa makuta. (Bikitshino 11:27-30) Bi mumune na’twe namu lelo uno, su tubapusha shi bakwetu be mbalo kampanda be mu malwa, atwibatuminaa bya buntu byetu pa kukidila ku kakongye keetu.​—2 Beena-Kodinto 8:13-15.

Atutushaa bintu bikumbeene kwibakwasha. Bakulu be mu kibundji mubakitshika masaku abakitaa mwabo mooso bwa kuuka mbalo i mwina kakongye ooso na bwa kuuka su e bibuwa. Komite a bukwashi mukumbeene kukunkusha mushindo wa kwabila bya kudya, mema ebuwa a kutoma, bilamba, mbalo ya kulala, na kwibapa manga. Batemwe bebungi abauku ingi midimo yabadi bakumbeene kwikala nayo lukalo abafutaa makuta aabo bwa kwenda mu kukwasha mu kulumbuula kwa mashibo a bakwetu alwile na Mashibo a Bufumu. Kwikala kwetu kwa mu buumune na mayele atudi bapete mu kutumika mu kisaka akwete kwitukwasha bwa kubunga bukwashi na bantu ba kufuba mu nsaa ipeela pakudi lukalo lwabo. Sunga byekala shi atukwashaa ‘bakwetu mu lukumino,’ su kwi mushindo atukwashaa mpa na bangi bantu.​—Beena-Galate 6:10.

Ku bukwashi bwa Bifundwe atwibanyingishaa mu kikudi na ku mashimba. Bantu bapete masaku be na lukalo lwa kwibanyingisha ku mashima. Mu yaya nsaa, atupetaa bukome kwi Yehowa, “Efile Mukulu sha kusambana mu byooso.” (2 Beena-Kodinto 1:3, 4) Atulungula baaba be mu malwa milayilo i mu Bible, kwibapa lukulupilo shi Bufumu bw’Efile Mukulu abukyebe kupudisha ino myanda yooso ikwete kufwishila bantu malwa na makyenga.​—Bifumbuwe 21:4.

• Bwakinyi Batemwe ba Yehowa mbakumbeene kukwasha bantu bukidibuki su masaku abatuuku?

• Mbukwashi kinyi bwa mu kikudi bwatudi balombeene kutwadila baaba bapete masaku?

Mafuku apela kumpala kwa lufu lwaye, Yesu baadi mwisambe na balondji baaye bananka: Mpyeele, Jaake, Yowano na Andree. Pabaadi ebalungula pabitale kitundwilo kya kwikala kwaye mu mafuku a ku nfudiilo, bebelele lukonko lukata aye nkwibepusha shi: “A nnanyi e bu mpika a kishima na mudimukye [mupatulukye, NWT] abadi batuule kwi nfumwaye, bu mukata a bafubi ba mu nshibo yaaye, bwa kwibapa bidiibwa byabo ku kipindji kikumbane?” (Mateo 24:3, 45; Maako 13:3, 4, Kilombeno kipya 2009) Yesu baadi alungula balondji baaye shi bu byadi “nfumwabo,” akyebe kutuula bantu ba kupa balondji baaye bidibwa bya mu kikudi mu mafuku a ku nfudiilo. Mbalombeene kwikala bantu kinyi?

Nyi nkasaka kapeela ka balondji ba Yesu bashingwe mwimu. Uno “mpika” kwete kupa bakwabo balangwidi ba Yehowa bya kudya bya mu kikudi pa nsaa ilombane. Tukwete kudiila mu kikudi nka ku bukwashi bwa uno mpika kwete kutungunuka na kwitwabila “biakudia . . . pa saa ilombane.”​—Luuka 12:42, Kilombeno kipya 2009.

Kwete kukunkusha nshibo y’Efile Mukulu. (1 Timotee 3:15) Yesu baadi mupe mpika mudimo ukata wa kukunkusha mudimo wa kipindji kya ndumbulwilo a Yehowa pano pa nsenga​—kubamba bintu byooso, kukunkusha mudimo wa kulungula mukandu wibuwa, na kwitulongyesha ku bukwashi bwa tukongye twetu. Byabya, bwa kwitupa kyatudi nakyo lukalo nsaa ilombane, “mpika a kishima na mudimukye [mupatulukye]” kwete kwabila bya kudya bya mu kikudi ku bukwashi bwa mikanda yatukwete kufuba nayo mu mudimo wa kulungula bantu mukandu wibuwa, na ku bukwashi bwa myanda yabalongyeshaa mu bisangilo byetu na mu bikongeno.

Mpika e na kishima pabitale bya binyibinyi bya mu Bible na kukunkusha mudimo wa kulungula mukandu wibuwa, na mupatulukye pabitale mushindo wa kulama kalolo bintu bya Kidishitu bi pano pa nsenga. (Bikitshino 10:42) Yehowa kwete kumwelela mwabi ku mudimo waye, amupa bidibwa bya mu kikudi bibungi.​—Yeeshaya 60:22; 65:13.

• Nnanyi ababadi basangule kwi Yesu bwa kupa balondji baaye bidibwa bya mu kikudi?

• Mushindo kinyi watudi balombeene kwamba shi mpika e na kishima na mmupatulukye?

Mu mafuku a batumibwa kubaadi mu Yeelusaleme, kasaka kapeela, ka “bakulu na batumibwa,” abaadi abafubu bu kasaka ka bakunkushi-bakulu bwa kwata bitshibilo bikata pa mbalo ya kakongye kashima ka bashingwe mwimu. (Bikitshino 15:2) Bwa kwata kitshibilo kyabakumina kwi booso, abaadi abatalula Bifundwe bwashi bibakunkushe ku bukwashi bwa kikudi ky’Efile Mukulu. (Bikitshino 15:25) Lelo uno Kasaka ka Bakunkushi-Bakulu kakwete kulonda kyakya kileshesho kyabo.

Efile Mukulu kwete kutumika nako bwashi kyakyebe kikitshikye. Bakwetu balume bashingwe mwimu abafubu mu Kasaka ka Bakunkushi-Bakulu bakwete kutuula binangu byabo byooso mu Eyi dy’Efile Mukulu na be na mayele ebungi pabitale mushindo wa kupudisha myanda itale tukongye. Ku lubingo looso akebungaa bwa kutalula myanda itale bakwetu be mu nsenga ishima. Anka bu byabibaadi mu mafuku a batumibwa, akatusha malango a mu Bible, ku bukwashi bwa mikanda yakatumina tukongye sunga ku bukwashi bwa bakunkushi ba bifunda na ba distrike na bangi booso. Bino abikwasha bafubi b’Efile Mukulu bwabadya kwikala na ngelelo a binangu umune na nfubilo umune. (Bikitshino 16:4, 5) Kasaka ka Bakunkushi-Bakulu akakunkusha kulumbuula kwa bya kudya bya mu kikudi, akanyingisha booso bwa badya kutuula mudimo wa kulungula mukandu wibuwa wa Bufumu pa mbalo ya kumpala, na kunkunkusha kusangula kwa bakwetu balume balombeene kutwala mashito kampanda mu kakongye.

Kakwete kulonda bukunkushi bwa kikudi ky’Efile Mukulu. Kasaka ka Bakunkushi-Bakulu akakimbaa bukunkushi bwa Nfumu a eyilu na nsenga, Yehowa, na bwa Yesu Nfumu a kakongye. (1 Beena-Kodinto 11:3; Beena-Efeeze 5:23) Bano be mu Kasaka ka Bakunkushi-Bakulu tabemonaa bu bakata ba bafubi b’Efile Mukulu nya. Abo pamune na bangi bashingwe mwimu booso, “abalondo Mukooko wana [Yesu] mbalo yooso yaawende.” (Bifumbulwe 14:4) Bakwetu be mu Kasaka ka Bakunkushi-Bakulu be na lutumbu bu bya tukwete kwibatuula na midimo yaabo mu nteko y’etu.

• Mbantu kinyi abaadi mu kasaka ka bakunkushi-bakulu ba mu mafuku a batumibwa?

• Kasaka ka Bakunkushi-Bakulu kakwete kukimba bukunkushi bw’Efile Mukulu naminyi?

Mu kina Ebreeyi kishima Betele akilesha “Nshibo y’Efile Mukulu.” (Kibangilo 28:17, 19) Nyi eshina dilombane adilesha mashibo abadi bebakye kwi Batemwe ba Yehowa bwa kunkunkusha mudimo wa kulambukisha mukandu wibuwa. Kasaka ka Bakunkushi-Bakulu akatumikilaa ku biro bikata bya Batemwe ba Yehowa bi ku New York, mu États-Unis, kwakwa nyi kwa kakwete kukunkusha ma Betele e mu nsenga ishima. Baaba abafubu ku yaya mbalo abebetaminaa bu beena kifuko kya Betele. Anka bu kifuko kimune, mbashaale pamune na bakwete kufuba pamune, abadi bya kudya pamune, na abalongo Bible pamune mu buumune.​—Misambo 133:1.

Be nka bu kifuko kya bantu bepaane bwa kukita mudimo umune. Mu ma Betele ooso, mwi balume na bakashi bepaane mu kukita kwa akikyeb’Efile Mukulu na kukita myanda yooso bwa kuyiisha mudimo wa Bufumu kumpala. (Mateo 6:33) Ta kwi muntu su ngumune a kwabadi apetaa efuto nya, kadi be na mashibo na bya kudya mpa na ekuta dipela dya kupwa nkalo ingi yabadi nayo. Muntu ooso ku Betele e na mbalo yatumikaa, byayikala mu biro, mu kikuku sunga mu nshibo yakudiila. Bangi abatumikaa ku ma mashinyi a kutuusha mikanda sunga a kwiyeela bipusu, sunga kulumbuula mashibo a kulala, kutumpa bilamba, kulumbuula bintu bilwile, sunga ingi midimo.

Mbalo yabafubu ngofu bwa kukwasha mudimo wa kulungula mukandu wibuwa wa Bufumu. Mudimo wa kumpala wa Betele ooso ngwa kupalakasha bya binyibinyi bya mu Bible kwi bantu booso. Bu kileshesho, uno broshire. Baadi mufundibwe ku bukunkushi bwa Kasaka ka Bakunkushi-Bakulu, ba mutuma ku Internet kwi bisaka bya bantu abaluulaa mu ingi ndimi be mu nsenga ishima, abo nkumutuusha ku bukwashi bwa ma mashinyi aafundu mikanda lubilolubilo mu ma Betele ebungi aatushaa mikanda, akupu nkwiatuma mu tukongye tukile 110 000. Ku byooso abikitshi beena kifuko kya Betele, bakwete kukwasha ngofu mu mudimo ukata wa​—kulungula mukandu wibuwa.​—Maako 13:10.

• Mbantu kinyi abatumikaa ku Betele, na mbukwashi kinyi bwabebapeya?

• Mudimo wa ku Betele aukwasha bwa kutambusha mudimo kinyi autungu kukita bukidibukidi?

Beena Betele abatumikaa mu ma departema elekeene, bakwete kukwasha mudimo wa kulungula mukandu wibuwa mwiumbo dimune sunga mu maumbo ebungi. Abatumikaa mu bisaka bya kwalula mikanda mu ingi ndimi, mu kutuusha ma jurnale mu mashinyi, kwela mikanda bipusu, kwiyituula mu ma depo, kukita kwa ma video na ma bande a kuteemesha, sunga kutala ingi myanda ya mwiumbo dyabo pabitale mudimo wa bulungudi.

Komite a filiale akunkushaa mudimo. Kasaka ka Bakunkushi-Bakulu nkatuule Komite a filiale bwa kukunkusha biro bya filiale. Uno komite mukumbeene kwikala na bakulu basatu sunga bakile pa basatu abauku kukunkusha myanda ya tukongye kalolo. Komite a filiale eukishaa Kasaka ka Bakunkushi-Bakulu mushindo ukwete kukidika mudimo mwiumbo dyooso dyabakwete kukunkusha sunga pabitale mwanda ooso ulombeene kwimutuuka. Aa ma rapore aakwasha Kasaka ka Bakunkushi-Bakulu bwakadya kuuka myanda yabadi balombeene kufunda mu mikanda, na ya kulonga mu bisangilo, na mu bikongeno. Akatumaa dingi bantu abalesha mpala ya biro byetu bikata misusa ibungi bwa kutwadila beena Komite ya ma filiale myanda yabadi balombeene kulonda bwa kukita mudimo wabo kalolo. (Myeele 11:14) Yawa muntu alesha mpala ya biro byetu bikata akitaa mwisambo bwa kunyingisha booso be mu teritware a yawa filiale mu kisangilo kikata kyabakitshishaa.

Abakunkusha tukongye twi mu teritware aabo. Bakwetu balume bakwete kukunkusha biro bya filiale abakunkushaa myanda itale kukita kwa tukongye tupya. Bano bakwetu balume abakunkushaa mudimo wa ba mbala-mashinda, ba misionere, na bakunkushi ba bifunda bakwete kufuba mu teritware a filiale aabo. Abalumbuulaa bikongeno, abakunkusha kwibaka kwa Mashibo a Bufumu, na kutala su mikanda ngipwe kwenda mu tukongye mwabadi nayo lukalo. Mudimo ooso wabakitshi ku biro bya filiale aukitshibwa bwa kulombasha mudimo wa kulungula mukandu wibuwa.​—1 Beena-Kodinto 14:33, 40.

• Ma Komite a filiale aakwashaa Kasaka ka Bakunkushi-Bakulu mushindo kinyi?

• Midimo kinyi yabakitaa ku biro bya filiale?

Bwa kulungula “mukandu wibuwa” mu “eumbo dyooso, kisamba, mwakulo na mwilo ooso,” atukitaa mwetu mooso bwa kutusha mikanda mu ndimi ikile pa 750. (Bifumbulwe 14:6) Mushindo kinyi watukitaa uno mudimo wi bukopo? Tukwete kwiukita ku bukwashi bwa kisaka kya bafundji be mu maumbo ebungi na bwa bantu abalulaa mikanda mu ingi ndimi​—booso Batemwe ba Yehowa.

Mayi a kumpala abeafundaa mu Anglais. Kasaka ka Bakunkushi-Bakulu abakunkushaa mudimo wa mu Departema a Kufunda ku biro byetu bikata bya Batemwe ba Yehowa. Uno departema akunkusha mudimo wa bafundji abatumika ku biro bikata bya Batemwe ba Yehowa na mu angi ma filiale. Kwikala na bafundji be ma mbalo elekene akwitukwasha bwa kufunda myanda itale tubila twibungi na bwashi bantu ba maumbo ooso basepeele na mikanda yetu.

Aa mayi a kumpala abeatumina bano abalula mu ingi ndimi. Kunyima kwa kufunda, kulumbuula mbalo ayitungu kulumbuula, abatumu ku Internet aa mayi a nfudiilo kwi bantu ba kwialula mu ingi ndimi mu nsenga ishima; bakwete kutumika mu bisaka bwa kwialula, kwiatalula, na kubadikuula. Abakitshi mwabo mooso bwa kusangula “myaaku ya binyibinyi” ikumbeene kupatuula kalolo kyabakula mu Anglais bwashi kipushikye mwidimi dyabalula.​—Mulungudi 12:10.

Ordinatere ayitukwasha bwa kutumika bukidibukidi. Ordinatere tamukumbeene kupyana bafundji sunga bano abaluula mikanda mu ingi ndimi. Kadi, mudimo wabo ngulombeene kukitshika bukidibukidi ku bukwashi bwa ma diksyonere, mikanda itale yaya ndimi, sunga ingi mikanda ikumbeene kukwasha bwa kukimba bishima yatudi nayo mu ma ordinatere. Batemwe ba Yehowa mbakite programe a mu ordinatere abetanyinaa bu MEPS (Système Électronique d’Édition Multilingue) asangisha mayi e mu nkama ya ndimi na bifwatulo, bwa kutuusha yaya mikanda mu mashinyi.

Bwakinyi tukwete kwitatshisha bwa kukita bino byooso, sunga mu ndimi yabesamba kwi bantu bapeela? Mwanda Yehowa akyebe shi “bantu booso bapande na bafikye ku kyuukilo kya biinyibiinyi.”​—1 Timotee 2:3, 4.

• Mushindo kinyi wabafundaa mikanda yetu?

• Bwakinyi atwalulaa mikanda yetu mu ndimi ibungi?

Ndumbulwilo etu kwete kutusha na kwabila nkama na nkama ya midiyo ya mikanda ku kipwa kyooso kushi kuteka bantu makuta. Tukwete kwibaka na kulumbuula Mashibo a Bufumu na a Betele. Tukwete kukwasha binunu na binunu bya beena Betele na ba misionere, na kutuma bukwashi kwi baaba bapete masaku kampanda. Byabya, pangi we kwiyipusha shi, ‘nkunyi akufikaa makuta a kukita bino byooso?’

Tatutekaa ky’ekumi, milambu, sunga lupungo nya. Sunga mudimo wetu wa kulungula mukandu wibuwa wibukopo, tatutekaa makuta nya. Kubapu kukila bipwa lukama, nimero a Kitenta kya Mulami a kabidi baadi muleshe shi atuuku shi Yehowa ndjo kwete kwitukwasha na shi: “Tatwi balombeene kuteka bukwashi bwa bantu”​—na kasha tatwatekyele bwanka nya!​—Mateo 10:8.

Makuta aetukwasha bwa kutambusha midimo yetu aafiki ku bya buntu. Bantu bebungi abasangalaa ngofu na mudimo wetu wa kulonga kwa Bible na abatusha bya buntu byabo. Batemwe abo banabeene abatushaa nsaa yabo, bukome bwabo, makuta aabo, na bungi bupeta bwabadi nabo bwa kukita akikyeb’Efile Mukulu mu nsenga ishima. (1 Myanda 29:9) Ku Nshibo ya Bufumu kwi tushete twa kwela bya buntu; ooso akumina kwela byaaye bya buntu mwanka mukumbeene kwela. Muntu mmulombeene kutuusha bya buntu kukiila ku site eetu a jw.org. Misusa ibungi, makuta atupetaa taafikaa nka kwi ba mpeta nya, bi nka mumune na makuta a mukashi baadi mufwishe mulume baadi Yesu mwakule kalolo shi beele penda tukuta tubidi mu mushete wa kulamina makuta mu ntempelo. (Luuka 21:1-4) Byabya muntu ooso mukumbeene kwikala nsaa yooso “atuulu ku lupese” bwa kutuusha “muyiile kitshibilo kya mwishimba dyaaye.”​—1 Beena-Kodinto 16:2; 2 Beena-Kodinto 9:7.

Atushinkamisha shi Yehowa akyebe kutungunuka na kukuma mashimba a booso abakumiina ‘kumutumbisha na bintu byabo bya muulo’ bwa kukwasha mudimo wa Bufumu bwashi kyakyebe kikitshikye.​—Myeele 3:9.

• Nkinyi akilesha shi ndumbulwilo etu mwilekeene na bingi bipwilo?

• Mushindo kinyi wabatumikaa na bya buntu?

Anka abilesha eshina dyayo shi Nshibo ya Bufumu, malongyesha a mu Bible abemulongaa aesambila ngofu pabitale Bufumu​—mutwe wa mwanda wa bulambukishi bwa Yesu.​—Luuka 8:1.

Mbalo yakwibunga bwa lulangwilo lwa binyibinyi mu mbalo ishale bantu. Ku yaya mbalo, nyi kwabakunkusha mudimo wa kulungula mukandu wibuwa wa Bufumu. (Mateo 24:14) Mashibo a Bufumu ngelekeene mu bukata bwawo na mu mushindo wabadi beayibakye, kadi awo ooso tangaule bintu sunga bifwatulo nya, Mashibo a Bufumu ebungi ngakumbeene kwikala na tukongye tubidi sunga kukila. Mu bipwa bishaale, twi bebakye binunu makumi bya Mashibo a Bufumu (pepi na mashibo atano kwifuku dyooso) mwanda bungi bwa balungudi be mu tukongye bukwete kufwima. Mbilombeene kukitshika mushindo kinyi?​—Mateo 19:26.

Ngayibakibwe na makuta abeele mu kashete kakata. Mu Nshibo ya Bufumu yooso, mwi kangi kashete ka makuta a Kwibaka kwa Mashibo a Bufumu mu nsenga ishima. Byabya bya buntu abebitumaa ku biro bya filiale bwashi aa makuta ekale aakwasha mu kwibaka kwa Mashibo a Bufumu sunga kulumbuula angi aatungu kulumbuula.

Ngayibakibwe kwi bantu be na nshalelo mwilekene na bepane abo banabene kushi kwibafuta. Mu maumbo ebungi, mwi Bisaka bya kwibaka kwa Mashibo a Bufumu. Bisaka bya bantu abebaka na abebakwasha abitentulukaa mu kakongye na kakongye kooso ke mwiumbo dya bakwete kwibaka, sunga mu angi ma mbalo e kula na e bukopo bwa kwikufika bwa kukunkusha mudimo wa kwibaka na kulesha Batemwe be mu yaya mbalo mushindo wa kwibaka. Mu angi maumbo, mbatuule ma Komite a kwibaka bwa kukunkusha mudimo wa kwibaka na kulumbuula Mashibo a Bufumu mbalo kampanda yabadi beatuule. Bakulu mu kakongye abauku mudimo wa kwibaka kalolo abakunkushaa midimo yooso mu tukongye mpa na apapu kwibaka, bakwetu abauku midimo ya maboko ya kwibaka kalolo abafikaa mu kukwasha. Mu mbalo yooso ya kwibaka, beena kakongye ka bebakila nshibo abafikaa mu kisaka kikata bwa kukwasha ku mudimo wa kwibaka. Bino byooso abikitshika ku bukwashi bwa kikudi kya Yehowa na bwa bano bakwetu abepaana na bukome bwabo booso ku uno mudimo.​—Misambo 127:1; Beena-Kolose 3:23.

• Bwakinyi ma mbalo etu a lulangwilo aayitanyibwa bu Mashibo ya Bufumu?

• Nkinyi akitukwasha bwa kwibaka Mashibo a Bufumu?

Nshibo yooso ya Bufumu ya Batemwe ba Yehowa ngitwale eshina diselele dy’Efile Mukulu. Byabya, atumonaa shi kukwasha bwashi nshibo ikale itokye, ibuwa, ilumbulukye nkinemo kikata kyatudi nakyo na nkintu kimune ki na muulo mu lulangwilo lwetu lwiselele. Bantu booso mbalombeene kukita uno mudimo.

Kunyima kwa bisangilo, kwasha mu kukomba kwa mu Nshibo ya Bufumu. Kunyima kwa bisangilo byooso, bakwetu balume na bakashi abepaana na muloo ooso bwa kukomba na kulonga bintu bya mu Nshibo ya Bufumu bwashi ishale bibuwa. Musango umune ku lubingo, abasuulaa Nshibo ya Bufumu kalolo. Mukulu umune sunga mufubi a mifubo mukumbeene kukunkusha wawa mufubo, misusa ibungi abalondaa liste mufunde myanda ayitungu kukita. Muyiile bintu byabadi nabyo lukalo, kwi bantu abakwashaa mu, kukomba, kukolopa, kukumuna lufufi, kulonga bibasa, kusuula na kwela bwanga mu nkumba sunga mu kyolonyi, kusuula madidishi na mmweno, kukaasha butshafu bwi mu kintu kya kwelanga butshafu, sunga kukomba paasha mu lupango. Kadi, mususa umune ku kipwa, abasangulaa efuku dimune dya kusuula Nshibo ya Bufumu ngofu. Patufubu pamune na baana betu, atwibalongyesha shi bekale abanemeka mbalo yetu ya kulangwila.​—Mulungudi 5:1.

Kumina kwipana su kwi lukalo lwa kulumbuula bintu kampanda. Ku kipwa kyooso, abendaa na kutala Nshibo ya Bufumu munda mwayo na paasha. Kutaluula wawa mushindo akwitukwasha bwa kutungunuka na kufuba bwa kulama nshibo bwashi ikale ilumbuule kalolo, na akwitukwasha bwa kupela kulwisha makuta bisumanga. (2 Myanda 24:13; 34:10) Nshibo ya Bufumu ilumbuule na ilamibwe kalolo nyi mbalo ibuwa yatudi balombeene kulangwila Efile Mukulu. Patukwasha mu uno mudimo, atulesha shi twi bafule Yehowa na mbalo yetu ya lulangwilo. (Misambo 122:1) Bino abikwasha bwashi bantu abeyimono baate lulangwilo lwetu na muulo.​—2 Beena-Kodinto 6:3.

• Bwakinyi tatwi balombeene kulenguula mbalo yetu ya lulangwilo?

• Mpango kinyi yabadi baate bwa kulumbuula Nshibo ya Bufumu?

Okumina kukimbuula myanda ikumbeene kutamisha kiukilo kyobe mu Bible su? Kwi verse kampanda, muntu kampanda sunga mbalo kampanda yabadi baleshe mu Bible yoshowuku kalolo su? Sunga shi okwete kunangushena shi Eyi dy’Efile Mukulu ndilombeene nkukwasha pa mwanda kampanda su? Su mbyabya, enda okatale mikanda i mu biblioteke bya mu Nshibo ya Bufumu.

Abitukwasha bwa kukimbuula mu mikanda. Pangi, twe na mikanda yooso ayipatuula Bible yabadi batuushe kwi Batemwe ba Yehowa mwidimi dyenu nya. Kadi mu biblioteke bi mu Nshibo ya Bufumu mwi mikanda ibungi itukye binobino. Mulombeene kwikala ma Bible elekene, ma diksyonere ebuwa na ingi mikanda ibuwa. Kumpala na ku nfudiilo kwa bisangilo, we mukumbeene kubadika mikanda i mwanka yodi nayo lukalo. Su mbatuule ordinatere ku Nshibo ya Bufumu, pangi mbemwele Watchtower Library. Uno nyi programe abelaa mu ordinatere e na mikanda yetu ibungi na mubofule bwa kukimba mwanda kampanda. We mulombeene kukimba kina mwanda, mwaku, sunga verse kampanda.

Mbilombeene kukwasha balongi ba mu kisangilo kya Bwina Kidishitu na mudimo wetu. Biblioteke bya mu Nshibo ya Bufumu mbilombeene nkukwasha pokwete kulumbuula miisambo yoobe. Mukunkushi a kisangilo kya bwina Kidishitu na mudimo wetu ndjo atalaa biblioteke bya ku Nshibo ya Bufumu. Aye ndjo mukumbeene kutala su mikanda itukye binobino mbeyele mwanka na su mbeyilongye kalolo. Aye sunga muntu okwete kulonga naaye Bible mukumbeene nkulesha mushindo wa kupeta myanda yoodi nayo lukalo. Anka, mukanda su ngumune ta ngulombeene kutuuka paasha pa Nshibo ya Bufumu. Na, abitungu shi tubambe mikanda kalolo kushi kwela mishonyi mwanka.

Bible alesha shi, bwashi “oshinguule bii binangu by’Efile Mukulu,” abitungu kwibikimba “bu bupeta[bufwame].” (Myeele 2:1-5) Biblioteke bya mu Nshibo ya Bufumu mbikumbeene nkukwasha bwa kukimbuula.

• Mbintu kinyi abitukwasha bwa kukimbuula bi mu biblioteke bya mu Nshibo ya Bufumu?

• Nnanyi mukumbeene nkukwasha bwa kutumika kalolo na mikanda i mu biblioteke bi ku Nshibo ya Bufumu?

Yesu balungwile balondji baaye shi: “Etaata dyeenu diileeshe kwi bantu bwa’shi, pabamono bikitshino byeenu bibuwa, batumbishe Nsheenu e mwiyilu.” (Mateo 5:16) Bwa kukita byabya, tukwete kutumika na bintu byabadi batuushe kwi bantu ano mafuku, bintu bu Internet. Site etu a jw.org, mbalo imune ibuwa ilombeene kupeta myanda itale midimo na lukumino lwa Batemwe ba Yehowa. Myanda kinyi i mwanka?

Myalulo ku nkonko ayipushaa bantu bebungi. We mulombeene kupeta myalulo ku ingi nkonko ya muulo ukata yabadi bepushe kwi bantu. Bu kileshesho, ma trakte a Kwi efuku adikapu makyenga su? na Bafwe be kwikala dingi na muwa? e mu Internet mu ndimi ikile pa 600. We mukumbeene kupeta dingi Bible a Traduction du monde nouveau mu ndimi ikile pa 130 na ingi mikanda ya kulonga nayo Bible, mpa na mukanda wa A nkinyi akilongyesha namu Bible? We mulombeene dingi kupeta ma Kitenta kya Mulami na Réveillez-vous! atuukye binobino. Ino mikanda yooso we mukumbeene kwiyibadika sunga kwiyiteemesha ku Internet sunga kwiyata bwa kwiyela mu ma bande. Ngikumbeene kwikala ya kuteemesha sunga ya kubadika ku Internet sunga kwiyata mu mishindo ilekene bu MP3, PDF sunga EPUB. We mukumbeene dingi ku imprime angi masaki oodi nawo lukalo bwa kukwasha bantu be nayo lukalo mu ludimi lwabo! Ingi mikanda ibungi mbeyitushe mu ma video mu ndimi ibungi ya tumaama. We mulombeene dingi kwata ma drame apenda kubadika kwa Bible sunga angi ma drame a mu Bible, na mizike ibuwa yodya kuteemesha nsaa yokwete kwikisha.

We mukumbeene kuuka myanda ya binyibinyi pabitale Batemwe ba Yehowa. Mbemwele dingi myanda ipya na ma video aalesha mushindo ukwete kukitshika mudimo wetu, myanda ikitshikile Batemwe ba Yehowa, na mushindo watutumaa bukwashi kwi bakwetu bapete masaku. We mukumbeene dingi kumona mbalo ayikakitshika bikongeno byetu mu mafuku e kumpala na mushindo odya kwisamba na biro byetu bya filiale.

Ku bukwashi bwa uno site, tukwete kuleesha etaata dya bya binyibinyi mu ma mbalo e kula e mu nsenga ishima. Bantu be mu bipindji bikata bya nsenga mpa na be mu Antarctique, bakwete kumona dino etaata. Tukwete kuteka shi “eyi dya Yehowa ditungunukye na lwendo lwadyo” mu nsenga ishima bwa kutumbisha Efile Mukulu.​—2 Beena-Tesalonika 3:1.

• Site a jw.org kwete kukwasha bantu bwa kuuka Bible mushindo kinyi?

• Nkinyi kyodi mukumbeene kukimba mu site etu a Internet?