Bantu bebungi mbapwe kuleka kutwela mu bisangilo bya myanda y’Efile Mukulu mwanda tambibakwashe bwa kupeta myalulo ya nkonko i na muulo na mwanda wa kukutwa kwa kusambibwa. Byabya, bwakinyi abitungu shi otwele mu bisangilo bya Batemwe ba Yehowa? Bisangilo byabo abikyebe nkupa kinyi?

Abikupa muloo wa kwikala munkatshi mwa bantu be na kifulo na abetatshisha bwa bangi. Mu mafuku a batumibwa, beena Kidishitu abaadi beabuule mu tukongye, na abaadi abebungu bwa kulangwila Efile Mukulu, bwa kulonga Bifundwe, na bwa kwinyingishena ku mashimba. (Beena-Ebreeyi 10:24, 25) Pababadi abebungu na kifulo kyooso, abaadi abapusha shi be munkatshi mwa bakuuku b’eyendo​—bakwabo ba mu kikudi. (2 Beena-Tesalonika 1:3; 3 Yowano 14) Tukwete kulonda kileshesho kyabo na tukwete kupeta wawa muloo.

Abikukwasha bwa kuuka mushindo wa kulonda miiya ya mu Bible mu nshalelo oobe. Bu bibabidi mu mafuku a kala, bantu booso​—balume, bakashi na baana—​abaadi abebungu pamune. Lelo uno balambukishi abauku kulambukisha bakwete kutumika na Bible bwa kwitukwasha bwashi tuukye mushindo wa kulonda miiya ya mu Bible mu nshalelo etu a kwifuku n’efuku. (Miiya Ikituulwe 31:12; Neemi 8:8) Bantu booso mbakumbeene kuyimba nsaa ya kuyimba na kwalula ku nkoko yabeele, byabya abitupeyaa mushindo wa kushinkamisha lukumino lwetu lwa bwina Kidishitu.​—Beena-Ebreeyi 10:23.

Abikukwasha bwashi wekale na lukumino mwi Efile Mukulu. Mpoolo mutumibwa bakwile pabitale kangi kakongye ka mu aa mafuku shi: “Ne na lukalo lukata lwa kwinumona . . . kwamba’shi twikale basambibwe pamune munkatshi mwenu, anwe n’ami, muntu na muntu ku lukumiino lwi mwi mungi.” (Beena-Looma 1:11, 12, Kilombeno kipya 2009) Ku bisangilo, bu byatwikala nsaa yooso na bakwetu beena Kidishitu, lukumino lwetu na kitshibilo kyetu kya kwikala na nshalelo mwipushene na mayi a mu Bible akikyebe kunyinga.

Bwa kupeta bino byooso atukutekye bwashi okumine kufika ku bisangilo byetu bya kakongye luno lubingo. Abakyebe nkukukila ngofu. Bwa kutwela mu bisangilo byetu tabafutaa makuta nya na dingi tabakongolaa milambu nya.

• Bisangilo byetu abilondaa kileshesho kinyi?

• Kutwela mu bisangilo bya beena Kidishitu nkulombeene kwitupa kinyi?

Sunga byekala shi abitungu kusabuka mitamba ikata sunga kwekala kanya sunga mpeshi, tatupishaa ku bisangilo byetu bya beena Kidishitu nya. Sunga bekala na nkalakasho kampanda sunga mbakokye mwanda wa midimo ibabakatuka mu kukita, bwakinyi Batemwe ba Yehowa abetatshishaa bwa kwibunga na bakwabo beena Kidishitu?

Akwitukwasha bwa kwikala bibuwa. Mpoolo pabaadi esamba bwa baaba batwibungu nabo mu kakongye, bafundjile shi: “Twikwasheneyi.” (Beena-Ebreeyi 10:24) Kino kishima akipatuula “kwela binangu kalolo,” sunga kukimba mushindo wa kwiukena. Byabya, bishima bya mutumibwa abitunyingisha bwa kwitatshisha bwa bangi. Patuuku bingi bifuko bya beena Kidishitu, atusangana shi bangi ba kwabadi bakwete kulwa na nkalakasho i mumune na yetu na mbalombeene kwitukwasha bwa kumona mushindo wa kukambila yetu nkalakasho.

Akwitukwasha bwa kupeta bakuku b’eyendo. Mu bisangilo byetu, tatwibungaa na penda bantu batufumankana nabo binyi byabya nya, kadi atufumankanaa na kisaka kya bakuuku betu ba p’eshimba. Mu ingi misusa, atukishaa nsaa ibuwa nabo pamune. Kwakwa kwibunga kwi na bukwashi kinyi? Atulongo mushindo wa kwinemekyeshena ngofu, na kunyingisha kifulo kyetu nabo. Na dingi, su mukwetu kampanda bapete mwanda, atwendaa lubilo mu kumukwasha mwanda twi bapwe kunyingisha bukuuku bwetu naye. (Myeele 17:17) Nsaa yatwibungu na beena kakongye ketu booso, atulesha shi twi na “lukalo lwa kwikwashena.”​—1 Beena-Kodinto 12:25, 26.

Atukunyingisha bwashi osangule bakuuku bakwete kukita akikyeb’Efile Mukulu. Okyebe kupeta baaba bakuuku munkatshi mwa Batemwe ba Yehowa. Totadilanga kintu su nkimune kyakukutshisha kwibunga pamune n’etu.

• Bwakinyi bi na muulo bwashi twibungye pamune mu bisangilo?

• Mafuku kinyi okumina kubanga kwibunga n’etu bwa kwiukene na beena kakongye ketu?

Mu bisangilo bya beena Kidishitu ba kumpala abaadi abemuyimbi misambo, kwela nteko, kubadika na kwisamba pabitale Bifundwe, tababaadi abemukitshi bipikwa kampanda nya. (1 Beena-Kodinto 14:26) Na bisangilo byetu lelo abikidikaa nka byabya.

Malongyesha aafiki mu Bible na ngakumbeene kwitukwasha. Mu dya mposo sunga dya lubingo, kakongye kooso akebungaa bwa kuteemesha munda mwa minite 30 Mwisambo wa mu Bible pabitale mushindo awakula Bifundwe bwa nshalelo etu na bwa kino kipungo kyatudi. Abetunyingisha atwe booso bwashi twikale atubadika maverse mu ma Bible etu. Kunyima kwa mwisambo, kwi Kulonga kwa “Kitenta kya Mulami” munda mwa nsaa mushima. Yaya nsaa muntu ooso mu kakongye mukumbeene kwakula pabakwete kulonga mwanda kampanda wi mu Kitenta kya Mulami. Wawa mushindo wa kulonga awitukwasha bwa kulonda malango a mu Bible mu nshalelo etu. Kakongye kooso ka ku tukongye twetu tukile pa 110 000 mu nsenga ishima abalongo wawa mwanda umune.

Bisangilo abitukwasha bwa kulumbuula ndongyeesho etu. Atwibungaa dingi munkatsh’a lubingo ku kyelwa bwa bisangilo abikitshikaa mu bipindji bisatu bii na mutwe wa mwanda awamba shi Bwina Kidishitu na Mudimo wetu, bi mu Bwina Kidishitu na Mudimo wetu​—Programe a bisangilo atukaa mweshi ooso. Kipindji kya kumpala kya bino bisangilo, Bupeta bwa mwiyi dy’Efile Mukulu, akitukwasha bwatudya kwiubidisheena na kipindji kya mu Bible kyabadi babadikye kumpala kwi kakongye. Kya kabidi, Fuba kalolo mu bulungudi, mwanka mwi maasha a kileshesho aakwasha bwa kuuka bya kwisamba na bantu pabitale Bible. Muntu atuusha malango etuleesha byatudya kulumbuula mushindo wetu wa kwakula na kubadika (1 Timotee 4:13) Kipindji kya nfudiilo, Nshalelo a bwina Kidishitu, akileesha mushindo watudi balombeene kutumikila mayi a kulonda a mu Bible mu nshalelo eetu a kwifuku n’efuku. Bino mbitale dingi mpana nkonko na ngalulo ayitamisha mpushisho eetu a Bible.

Su botwele mu bisangilo byetu, kushi mpaka malongyesha a mu Bible ebuwa okyebe kupeta aakyebe nkukanyisha.​—Yeeshaya 54:13.

• Nkinyi kyodi mukumbeene kupusha potwele mu bisangilo bya Batemwe ba Yehowa?

• Ku bisangilo byetu bya ku lubingo na lubingo, okumina kutwela mu kisangilo kinyi?

Bomono mu bifwatulo bi mu uno broshire mushindo ufwale Batemwe ba Yehowa kalolo nsaa yabadi mu bisangilo bya tukongye twabo su? Bwakinyi atwateya nfwadilo etu na kulumbuula kwetu kwa mbidi na muulo?

Bwa kunemeka Efile Mukulu. Nky’eyendo shi Efile Mukulu atalaa bi mwishimba ta mbyatumweneka ku mbidi nya. (1 Samwele 16:7) Sunga mbyabya, nsaa yatwibungu bwa kumulangwila, lukalo lwetu ndwa kumupa kinemo na kunemeka bakwetu beena Kidishitu. Su twi na lukalo lwa kwimana kumpala kwa nfumu sunga prezida kampanda, abitungu tutale shi nfwadilo etu amupa kinemo bwa mwasu waye. Bi mumune na mushindo watufwala nsaa yatwende mu bisangilo; atulesha kinemo kyatupa Yehowa Efile Mukulu, aye “Nfumu a bisamba byooso,” na kinemo kyatupa mbalo yatwibungu bwa kumulangwila.​—Yeelemiya 10:7.

Bwa kulesha muulo wa miiya yatulondaa mu nshalelo etu. Bible alungula beena Kidishitu bwa kufwala “na kwidinga na kwiyisha” bu bantu “abatshinyi Efile.” (1 Timotee 2:9, 10, NWT) Kufwala “na kwiyisha” akupatuula kupela kufwala bu bantu abelesha, be na nfwadilo mukumbeene kulwisha mashimba a bantu sunga alesha bipindji bya mbidi. Na dingi, kwikala “na kwidinga” akwitukwasha bwa kusangula bilamba bibuwa, kadi kushi kwilekyela sunga kukishakisha. Ino miiya ya mu Bible ayitulesha mushindo wa kusangula bilamba byatukyebe kufwala. Nfwadilo etu ebuwa na amweneka kalolo mukumbeene ‘kupa bulambukishi bw’Efile Mukulu Mupashi eetu kinemo’ na “kutumbisha Efile Mukulu” sunga tatwibakule kintu. (Tite 2:10; 1 Mpyeele 2:12) Patufwala kalolo patudi mu bisangilo byetu, atukwasha bangi bwashi bekale na mweneno ebuwa a lulangwilo lwa Yehowa.

Totshinanga kufika ku Nshibo ya Bufumu mwanda wa bilamba byodi nabyo. Twi balombeene kufwala bilamba bilombane, bibuwa na abimweneka kalolo ku meso kwa bantu; tabitungu nka shi twikale na bilamba bya muulo wi bukopo nya.

• Mushindo watudi bafwale wi na muulo kinyi patwende mu kulangwila Efile Mukulu?

• Miiya kinyi ayitukunkusha mu mushindo wetu wa kusangula bilamba na wa kulumbuula mbidi yetu?

Su okwete kulonga Bible na Batemwe ba Yehowa, abimweneka shi welumbuulaa kumpala kwa’nwe kulonga. Bwashi bisangilo bya kakongye bikukwashe kalolo, bibuwa okite nka byabya kumpala kwa kwenda kwanka. Bantu be na kyakya kiubishi mbapete bipeta bibuwa.

Sangula nsaa na mbalo yodya kwilongyela. Nsaa kinyi yoodi mukumbeene kulonga kalolo na kutuula binangu ku myanda yolongo? Sunga byekala shi tobesha kulonga munda mwa kipindji kikata, tshiba nsaa ya kwilongyela, na okite moobe mooso bwashi ungi mwanda taukukutshishanga kulonga. Kimba mbalo itaale, na kaasha bintu bikumbeene kukukalakasha, bu kisaashi, TV, na telefone. Kwela luteko kumpala kwa kulonga akukyebe nkukwasha bwa kukaasha nkalakasho i mu binangu bwashi otuule binangu ku Eyi dy’Efile Mukulu.​—Beena-Fidipe 4:6, 7.

Badika myanda yanukalongo, na welumbuule bwa kwalula. Banga na kutalula kina mwanda kyanulongo dyady’efuku. Nangushena pabitale mutwe wa mwanda wa mwisambo sunga shapitre, tala mushindo wipusheene mitwe ya mwanda ipeela na mutwe wa mwanda ukata, na taluula bifwatulo na nkonko yabadi beele bwa kwambuula ayilesha myanda ikata i mu mwisambo. Akupu badika paragrafe ooso, na kimba lwalulo ku nkonko. Badika maverse abadi batemune, na onangushene mushindo wa adi epushene na myanda yanulongo. (Bikitshino 17:11) Su bopete lwalulo, ela mushonyi pa lwalwa lwalulo sunga penda pa bishima sunga angi mayi e mu paragrafe akumbeene nkukwasha bwa kutentekyesha lwalulo. Akupu, ku bisangilo, we mukumbeene kwibwesha munwe na kwalula mu mayi oobe.

Su welongyela myanda yatwisambila ku bisangilo bya lubingo looso, okyebe kukumbasha ingi myanda ipya mu ‘bintu byobe bya bupeta’ bwa kiukilo kya Bible.​—Mateo 13:51, 52.

• Nkiubishi kinyi kyoodi mukumbeene kwikala nakyo bwa kwilumbuula ku bisangilo?

• Mushindo kinyi odi mukumbeene kwilumbuula bwa kwalula mu bisangilo?

Kubanga mu mafuku a kala, Yehowa baadi mukumiine shi kifuko kyooso kikishe nsaa pamune, bwa kunyingisha kipwano kyabo na Yehowa na kipwano kyabo munkatshi mwa kifuko. (Miiya Ikituulwe 6:6, 7) Nyi bwakinyi Batemwe ba Yehowa be n’efuku dyabakishaa lubingo looso bwa kulangwila pamune mu kifuko​—abesambaa na mashimba amune pabitale myanda ya mu kikudi ipushene na myanda yabadi nayo mu kifuko. Sunga wekala bupenka, we mulombeene kukisha nsaa i byabya n’Efile Mukulu mu kulonga kwa Bible bwa kutalula myanda yoodi nayo lukalo.

Nyi nsaa ya kwifubwila pepi na Yehowa. “Efubwileyi kwi Efile Mukulu, byabya aye naamu efubwila pepi nenu.” (Jaake 4:8) Atwiuku Yehowa kalolo nsaa yatulongo myanda itale bumuntu bwaye na bikitshino byaye ku bukwashi bwa Bible. Mushindo wibuwa wa kubanga kukita lulangwilo lwa mu kifuko, nkukisha ingi nsaa bwa kubadika Bible n’eyi dibukopo, pangi nwi kubadika kipindji ki mu programe a bisangilo bya Bwina Kidishitu na mudimo wetu. Nwi balombeene kwiabishena bipindji bya kubadika munkatshi mwa beena kifuko, na akupu booso bwenu nwi balombeene kwisambila pabitale myanda ibanukatuka mu kulonga mu Bifundwe.

Nsaa ya kunyingisha kipwano pankatshi pa beena kifuko. Mulume na mukashi, baledi mpa na baana, mbalombeene kunyingisha kipwano kyabo nsaa yabalongo Bible mu kifuko. Ngilombeene kwikala nsaa ya muloo, kufukama na ayikwasha mwina kifuko ooso bwadya kwikala na muloo wa kupetekyelwa lubingo alufiki. Baledi mbalombeene kusangula myanda muyiile bipwa bya baana baabo, pangi be kutalula ingi myanda i mu Kitenta kya Mulami sunga Réveillez-vous! sunga mu site a jw.org. Nwi balombeene kwisamba myanda ikwete kufumankana nayo baana benu ku kalasa na kyabadya kukita. Nwi bakumbene kutala mwisambo wa mu Televizion a JW (tv.jw.org). Nwi balombeene dingi kwikala na muloo wa kuyiya ngono yanukayimbi mu bisangilo na kwikala na kantu ka kudya sunga kutoma bwa kusangala kunyima kwa lulangwilo lwa mu kifuko.

Kukisha nsaa bwa kulangwila Yehowa pamune lubingo looso nkulombeene kukwasha mwina kifuko ooso bwa kupeta muloo wa kulonga Eyi dy’Efile Mukulu, na’ye naamu akebakwasha mu kwitatshisha kwabo.​—Misambo 1:1-3.

• Bwakinyi atwataa nsaa ya kukita lulangwilo lwa mu kifuko?

• Baledi mbalombeene kukita kinyi bwashi yaya nsaa ipe beena kifuko booso muloo?

Bwakinyi mapala a bano bantu e na muloo? Be mu kikongeno. Anka bu bibabadi batumine bafubi b’Efile Mukulu ba kala eyi dya kwibunga misango isatu ku kipwa, atwe namu atutengyela kikongeno kya bantu bebungi. (Miiya Ikituulwe 16:16) Ku kipwa kyooso, atwikalaa na bikongeno bisatu: Bikongeno bya kifunda bibidi kikongeno kyooso akikitshika munda mw’efuku dimune, na kikongeno kya mafuku asatu. Byabya bikongeno abitukwashaa naminyi?

Abinyingisha kipwano kyetu na bakwetu beena Kidishitu. Nka bu bibaadi beena Isaleele na muloo wa kutumbisha Yehowa “mu bisaka bya bantu,” atwe namu twi na muloo wa kumulangwila pamune mu bisangilo bikata. (Misambo 26:12; 111:1) Bino bikongeno abitupa mushindo wa kwipetena na kukisha nsaa pamune na Batemwe ba mu tungi tukongye sunga ba mu angi maumbo. Mu midi, atwikalaa na muloo wa kudya pamune na bakwetu pa mbalo ya kikongeno, mpa na kushala bwa kwisamba na bakwetu pabitale myanda ibuwa ya mu kikudi. (Bikitshino 2:42) Kwakwa atumonaa na meso etu kifulo akitubungu pamune na ‘bakwetu booso’ ba mu nsenga ishima.​—1 Mpyeele 2:17.

Abitukwasha bwa kukula mu kikudi. Beena Isaleele abaadi bapete bukwashi paabo ‘kuteemesha bishima’ bya mu Bifundwe bibabadi bebapatulwile. (Neemi 8:8, 12) N’atwe naamu atunemekaa malongyesha a mu Bible atupete ku bikongeno byetu. Kipindji kyooso ki na mutwe wa mwanda autukila mu Bifundwe. Ku bukwashi bwa miisambo ibuwa, miisambo ya bipindji bibungi, na kukituula mushindo ubaadi ukidikye myanda, atulongo mushindo wa kukita akikyeb’Efile Mukulu mu nshalelo etu. Kuteemesha myanda yabadi bafumankane nayo kwi baaba bakwete kukambila nkalakasho bwa kwikala na nshalelo a bwina Kidishitu mu ano mafuku e bukopo, kukwete kwitunyingisha. Ku bikongeno bya mafuku asatu, kwi ma drame aetukwasha bwa kumona mu binangu mushindo ubaadi ukitshikye myanda i mu Bible na kwitulongyesha myanda ikumbeene kwitukwasha. Ku kikongeno kyooso, bano booso abakumina kulesha patooka shi mbelambule kwi Efile Mukulu, abatambulaa lubatshisho.

• Bwakinyi nsaa yatukishaa ku bikongeno nyi nsaa ya muloo ukata?

• Kwenda ku kikongeno nkukumbeene nkukwasha naminyi?

Mafuku apela kunyima kwa’ye kusanguka Yesu bambile shi: “Uno mukandu wibuwa wa bufumu, aukalungulwa mu nsenga yooso yishadiibwe; bwa kulesha bu-kamonyi kwi maumbo ooso na kunyima nfudiilo ayikafiki.” (Mateo 24:14, Kilombeno kipya 2009) Kadi mushindo kinyi ukumbeene kukitshika uno mudimo wa kulungula mukandu wibuwa mu nsenga ishima? Ngukumbeene kukitshika su atulondo kileshesho kya Yesu pabaadi pano pa nsenga.​—Luuka 8:1.

Atukitaa mwetu mooso bwa nkatala bantu ku mashibo aabo. Yesu balongyeshe balongi baaye bwa kulungula mukandu wibuwa ku nshibo na nshibo. (Mateo 10:11-13; Bikitshino 5:42; 20:20) Baaba balungudi ba mukandu wibuwa ba kumpala abaadi bebape ma teritware mwabadya kulungula mukandu wibuwa. (Mateo 10:5, 6; 2 Beena-Kodinto 10:13) Anka bu’twe lelo, twi beabuule kalolo bwa kukita mudimo wetu wa bulungudi, kakongye kooso ke na ako teritware. Bino abitukwasha bwa kukumbasha eyi dibaadi ditutumine Yesu pabitale mukandu wa “kuwukisha kwi bantu na dya kutwaala buno bukamonyi.”​—Bikitshino 10:42.

Atukitaa mwetu mooso bwa kukimba bantu mbalo yatudi balombeene kwibapeta. Yesu baadi dingi mwitulekyele kileshesho kya kulungula mukandu wibuwa mbalo i bantu bebungi, bu ku kyeese kya mwela sunga ku meena akutapaa bantu mema. (Maako 4:1; Yowano 4:5-15) Atwe namu atwisamba na bantu pabitale Bible mbalo yooso yatudi balombeene kwibapeta​—mu mashinda, mu bisalwe, mu ma parc sunga ku telefone. Atulungulaa dingi mukandu wibuwa kwi bantu bekungishene n’etu, beena mudimo n’etu, beena kalasa n’etu na bakwetu ba mu kifuko su tubapete mushindo wa kwisamba na’bo. Kwitatshisha mu yaya mishindo yooso nkukwashe midiyo ya bantu mu nsenga ishima bwa kupusha “mukandu wa kipandjilo.”​—Misambo 96:2.

Ouku muntu kampanda odi mukumbeene kulungula mukandu wibuwa wa Bufumu bw’Efile Mukulu na kikumbeene kumupa wawa mukandu mu mafuku aafiki su? Tolamanga wawa mukandu aupa bantu lukulupilo nya. Ebalungule wanka nsaa yooso yoodi na mushindo wa kwibikita!

• “Mukandu wibuwa” kinyi autungu kulungula bantu?

• Pabitale mushindo wa kulungula mukandu wibuwa, mushindo kinyi ukwete Batemwe ba Yehowa kulonda kileshesho kya Yesu?

Misusa ibungi kishima “mbala-mashinda” akilesha baba abendaa mu ma teritware apya na kufungwila bangi mashinda a kulonda. Yesu baadi nka bu mbala-mashinda, abamutumine pa nsenga bwa kukita mudimo aupa bantu muwa na kufungula eshinda dya kipandjilo. (Mateo 20:28) Lelo uno, balondji baaye bakwete kulonda kileshesho kyaye pabakwete kukisha nsaa ibungi mu ‘kwikasha bantu bu balondji.’ (Mateo 28:19, 20) Bangi be na mushindo wa kukita mudimo watwitamina bu wa bu mbala-mashinda.

Mbala-mashinda mmulungudi a mukandu wibuwa a nsaa yooso. Batemwe ba Yehowa booso mbalungudi ba mukandu wibuwa. Kadi, bangi mbelumbuule bwa kufuba bu ba mbala-mashinda ba myeshi yooso, bano abakishaa nsaa 70 ku mweshi mu mudimo wa bulungudi. Bwa kwibikita, bebungi abakita midimo ayibaata nsaa ipela. Bangi naamu mbasangulwe bwa kufuba bu ba mbala-mashinda ba nsaa yooso mu ma mbalo abadi na lukalo lwa balungudi bebungi, bano abakishaa nsaa 130 sunga ikile paapa ku mweshi mu mudimo wa bulungudi. Ba mbala-mashinda abasangeela kwikala na nshalelo shebatekye bintu bikile bungi, mbakulupile shi Yehowa ebakwasha na bintu bya kupudisha nabyo nkalo yaabo ya mu nshalelo. (Mateo 6:31-33; 1 Timotee 6:6-8) Booso bashi na mushindo wa kukita mudimo wa nsaa yooso abatumikaa bu ba mbala-mashinda bakwashi, abakitaa nsaa 30 sunga 50 ku mweshi bwa kutamisha nfubilo aabo a mudimo wa bulungudi.

Mbala-mashinda atumikaa pa mwanda wa kifulo kyadi nakyo bw’Efile Mukulu na bwa bantu. Anka bu Yesu, tukwete kumona mpombo ya mu kikudi i nayo bantu lelo uno. (Maako 6:34) Kadi binobino twi na kiukilo kikumbeene kwibakwasha, kilombeene kwibapa lukulupilo lwa binyibinyi bwa mafuku e kumpala. Kifulo kya muntu naaye akitakula mbala-mashinda bwashi aleshe kalolo kaaye mu kupana kwa nsaa na bukome bwaye bwa kukwasha bangi bantu bwashi baukye mukandu wibuwa. (Mateo 22:39; 1 Beena-Tesalonika 2:8) Pakitshi byabya, anyingisha lukumino lwaye, efubwila pepi n’Efile Mukulu, na apete muloo wibungi.​—Bikitshino 20:35.

• We mukumbeene kwamba shi mbala-mashinda mmuntu kinyi?

• Nkinyi akitakuulaa bangi mu kukita mudimo wa nsaa yooso wa bu mbala-mashinda?

Kubanga kala, malongyesha a teokrasi nkintu kikata kikwete kukita Batemwe ba Yehowa. Baaba bakwete kwipaana nsaa yooso mu mudimo wa bulungudi mbalombeene kupeta angi malongyesha bwa kumona bya ’kulombasha kalolo mufubo wabo.’​—2 Timotee 4:5.

Kalasa ka ba mbala-mashinda. Ku nfudiilo kwa kipwa kyaaye kya kumpala kya mudimo, mbala-mashinda a myeshi yooso, atwele mu kalasa munda mwa mafuku asamombo akakitshikaa misusa ibungi mu Nshibo ya Bufumu i peepi naaye. Kano kalasa ke kwanka bwa kukwasha mbala-mashinda bwashi efubwile peepi na Yehowa, ekale munyingye mu mishindo yooso ya bulungudi na kulombasha mufubo waaye kalolo.

Kalasa ka balungudi ba Bufumu. Kano kalasa ka myeshi ibidi ke kwanka bwa kukwasha ba mbala-mashinda banyingye abakumiina kukatuka mbalo yabadi bwa kwenda mu kukwasha kooso kwabebatumu. Be nka bu abamba shi: “Nnami uno, ntume!” mu kulonda kileshesho kya Mulungudi mukata mukile balungudi booso be pa nsenga, Yesu Kidishitu. (Yeeshaya 6:8; Yowano 7:29) Kukatuka mu mbalo yabo akutekye kupeelepeesha nshalelo aabo. Biubishi, lupapi na bidibwa mbilombeene kwikala bilekeene na byakwabo. Pangi abitungu shi balongye lungi ludimi. Kano kalasa akakwasha bakwetu balume na bakashi bebakile na bashii bebakile be mu bipwa 23 na 65, bwabadya kwikala na ngikashi ya mu kikudi ilombeene kwibakwasha mbalo yabebatumu na ilombeene kukwasha bwashi ndumbulwilo a Yehowa atumikye nabo ngofu.

Kalasa ka Galaade. Mu kii na Ebelu, kishima “Galaade” akipatuula “Kibumbu kya bukamonyi.” Kubanga mu 1943, ba misionere bakile pa 8 000 mbebatume bwa kupalakasha mukandu wibuwa mu kipaso kilombane mpa na “kufudiile nsenga.” (Bikitshino 13:47) Pabayile ba misionere betu bwa mususa wa kumpala mu Pérou, tamubaadi kakongye ketu su nkamune​—binobino tatudi na tukongye tukile pa 1 000. Pabafikile ba misionere betu mu Japon, Batemwe abaadi mushi mw’ekumi​—binobino tatudi na Batemwe bakile pa 200 000. Kano kalasa ka myeshi 5 ke na malongyesha akata a Eyi dy’Efile Mukulu. Mu kano kalasa abetaminaa ba mbala-mashinda ba nsaa yooso, ba misionere, beena Betele, bakunkushi ba bifunda na bakashi baabo bwabadya kupeta malongyesha ebungi aebakwasha bwa kunyingisha mudimo wa mu nsenga ishima.

• Kalasa ka ba mbala-mashinda ke kwanka bwakinyi?

• Mba nnanyi balombeene kutwela mu Kalasa ka balungudi ba Bufumu?