Kulonga koobe kwa Bible na ba Temwe ba Yehowa nkukukwashe bwa kuuka bya binyibinyi. Kushi mpaka, myanda yoodi mulongye ngikunyingishe mu kikudi na abimweneka’shi ngikupe lukulupilo lwa muwa na myabi ibungi mu mafuku aafiki pano pa nsenga mu mpaladiisu apakamunana Bufumu bw’Efile Mukulu. Lukumiino loobe Mwiyi dy’Efile Mukulu lubanyingi, na dingi p’obe kwibunganga na kakongye ka beena Kidishitu, we mupete myabi ibungi. We mupushe mushindo ukwete Yehowa kutumika na mwilo waaye lelo uno.​—Sek. 8:23.

Bu byokwete kwilumbuula binobino bwa kubatshishibwa, bakulu abataluula noobe myanda ya mbangilo ikumiine beena Kidishitu. (Eb. 6:1-3) Yehowa atungunukye na nkwelela myabi bu byokwete kwikitshisha bwa kumuuka, na akupe bwedi bwakwete kwitulaa.​—Yo. 17:3.

1. Bwakinyi okumiina kubatshishibwa?

2. Yehowa nnanyi?

• “Yehowa Efile Mukulu, nyi Efile Mukulu a binyibinyi mwiyilu na pa nsenga. Takwi mungi.”​—Miy. 4:39.

• “Obe sh’eshina dya bu Yehowa, obe bupenka, we Sha kwiyilu kula pa nsenga ishima.”​—Mis. 83:18, NWT.

3. Bwakinyi kuteemuna eshina dy’Efile Mukulu bupenka bwadjo kwi na muulo koodi?

• “Tekaayi bino: ‘Yaay’etu ee mwiyilu, eshina dyoobe dyende ntumbo.’”​—Mat. 6:9.

• “Yawa ooso akeetanyina eshina dya Yehowa akeekala mupaashibwe.”​—Lom. 10:13, Kilombeeno kipya 2014.

4. Mbishima kinyi byabadi bateemune mu Bible pabitale Yehowa?

• “Yehowa ngi Efile a losoo Mupangi a mikalo ya nsenga.”​—Yesh. 40:28.

• ‘Nshetu e mwiyilu.’​—Mat. 6:9, Kilombeeno kipya 2014.

• “Efile Mukulu nyi nkifulo.”​—1 Yo. 4:8.

5. Nkinyi kyodya kupa Yehowa Efile Mukulu?

• ‘Ofule Yehowa Efile Mukulu oobe n’eshimba dyoobe dyooso, na kikudi kyoobe kyooso, na kinangu kyoobe kyooso, mpaa na bukome boobe booso.’​—Mak. 12:30.

• “Langwila Yehowa Efile Mukulu oobe, aye bupenka ngi ofubila.”​—Luk. 4:8.

6. Bwakinyi abitungu’shi wekale na lulamato kwi Yehowa?

• “Ikala sha-binangu mwan’ande, eshimba dyande disangale, dingi neekale mulombeene kwaluula ampeesha.”​—Nki. 27:11.

7. Welaa nteko kwi nnanyi, na mwishina dya nnanyi?

• “Mbiinyibiinyi, neenulungula’shi: su nwateka Nshaami kintu mwishina dyande, eenupa kyanka.”​—Yo. 16:23.

8. We mulombeene kuteka bwa bintu kinyi?

• “Byaabya tekaayi bino: ‘Yaay’etu ee mwiyilu, eshina dyoobe dyende ntumbo. Bufumu bwobe bufikye, kyookyebe kikitshikye pa nsenga, mumune na mwiyilu. Etupe leelo kya-kudya kyatudi nakyo lukalo, etulekyele bubi bwetu buu byatudi balekyele babaadi betulwishiishe. Twetufishanga mu kutompibwa, anka etupaashe kwi mubi.’”​—Mat. 6:9-13.

• “Talaayi lukulupilo lwatudi nalwo kumpala kwaye: su twamuteka kintu muyiile kukumiina kwaye, aye eetuteemesha.”​—1 Yo. 5:14.

9. Yehowa mmulombene kupela kuteemesha luteko lwa muntu bwakinyi?

• “Paabeele misaase batadiile kwi Yehowa, teebaluula . . . pa mwanda wa milwisho yabadi bakite.”​—Mik. 3:4.

• “Meeso a Yehowa ee pee balulame, dingi matwi aaye aateemesha nteko yaabo; anka Yehowa afutaala baaba abakitshi bubi.”​—1 Mp. 3:12.

10. Yesu Kidishitu nnanyi?

• “Simone Mpyeele baabangile kwakula, aye nkwaluula’shi: ‘Obe we Kidishitu Mwan’Efile Mukulu atala.’”​—Mat. 16:16.

11. Yesu bafikile pa nsenga bwakinyi?

• “Byaabya ngi bibafikile Mwan’a-muntu, kushii bwa kufubilwa, anka bwa kufubila bantu, na kupaana muuwa waye bwa kukuula mwilo wa bantu.”​—Mat. 20:28.

• “Ne [Yesu] naa kya kulungula mukandu wibuwa wa Bufumu bw’Efile Mukulu mwanda ngi kyabadi bantumine.”​—Luk. 4:43.

12. Mushindo kinyi odya kulesha lutumbu bwa mulambu wa Yesu?

• “Aye mmufwe bwa booso, na bwa’shi abatala tabeekalanga na muuwa bwa’bo baanabeene, anka bwa yaawa baafwile asanguka pa mwanda wabo.”​—2 Kod. 5:15.

13. Yesu e na matalwa kinyi?

• “Matalwa ooso mbeampe mwiyilu na pa nsenga.”​—Mat. 28:18.

• “Efile bamutundubwile ngofu, aye nkumupa eshina dii kunundu kwa mashina ooso.”​—Fid. 2:9.

14. Okumiina’shi Kasaka ka Bakunkushi-Bakulu ka ba Temwe ba Yehowa nyi “mpika a lulamato na mudimukye” abadi batuule kwi Yesu su?

• ‘Nanyi e bu mpika a lulamato na mudimukye, abadi batuule kwi nfumwaye bu mukata a bafubi ba mu nshibo yaaye, bwa kwibapa kidiibwa kiabo ku kipindji kikumbane?’​—Mat. 24:45, Kilombeeno kipya 2014.

15. Kikudi kiselele mmuntu su?

• “Mwikeeyilu nkumwaluula’shi: ‘Kikudi kiselele akifiki poodi, bukome bwa Sha-kwiyilu abukubwikila mu mutaala; ngi mwanda kinyi yaawa akatandjikwa aikala eeselele, dingi abamwitanyina buu Mwan’Efile Mukulu.’”​—Luk. 1:35.

• “Byaabya, su anwe beebubi anuwuku kupa baana beenu bintu biibuwa, nkipaso kinyi kilombeene yaaya a mwiyilu kukutwa kupa kikudi kiselele kwi baaba abamutekye kyanka!”​—Luk. 11:13.

16. Yehowa mmufube naminyi na kikudi kyaaye?

• “N’eyi dyaaye, Yehowa mmupangye eyilu; kilwilo kyaadyo, na muwa [kikudi] wa mukanwa mwaye.”​—Mis. 33:6.

• “Anukapete bukome, buno bwa kikudi kiselele akifiki panudi. Paapa anwikala tumonyi twande . . . Mpaa na kufudiile nsenga.”​—Bik. 1:8.

• “Butemuki su mbumune bwa mu Bifundwe ta nkintu kya ku mpángo ya muntu kampanda nya; eyendo ta nkintu kya kwishimba dya muntu kituushe nguba kampanda butemuki nya, anka nku bukome bwa kikudi kiselele kubekeele bantu balungule myanda ayifiki kwi Efile Mukulu.”​—2 Mp. 1:20, 21.

17. Bufumu bw’Efile Mukulu nkinyi?

• “Efile Mukulu e mwiilu akatûlu bungi bufumu, bushyabukalwishibwa. Bwabwa bufumu t’abukapono mu mâsa mwa ungi mwilo ooo. Abukafingakasha na kufudîsha mafumu oso abebubadidîle. Anka pend’abo, nyi abukekadidîla ikalaika.”​—Nda. 2:44, EEM.

18. Bufumu bw’Efile Mukulu abukakukwasha naminyi?

• “Akumuna mpolo yooso ku meeso aabo. Lufu taalwikala dimo sunga maalo, sunga kwidila, sunga mukumbo, mwanda byaa pano bya kala bibaashimina.”​—Kibaf. 21:4.

19. Ouku naminyi’shi myabi ya Bufumu ayifiki binobino?

• “Balondji baaye babeeseeseele pa-bupeenka kwadi, ngi abo nkumwipusha’shi: ‘Etulungule nguba afiki byooso byaabya, na kitundwilo kya kufika kwobe naa kya nfudiilo aa byaa pano?’ Yesu beebalulwile’shi: ‘. . . Eumbo adituuku dingi eumbo ngoshi; na bufumu abwibwela bungi bufumu; mu mbalo iilekeene, amwikala nsala na kutshinkatshinka kwa nsenga. Uno mukandu wibuuwa wa Bufumu aukalungulwa mu nsenga ishima; akukeekala buukamonyi kwi baa-maumbo booso. Paapa ngi apakumbana nfudiilo.’”​—Mat. 24:3, 4, 7, 14.

• ‘Mu mafuku a ku nfudiilo akufiki bipungo biibukopo. Mwanda bantu abakeekala beetale anka abo baanabeene, bapape mashimba bwa bupeta, baa-sha-kwilungula, bapeeshi ba myanda y’Efile, batombokyele beebatande, bashii na lutumbu, bapeeshi ba bintu bya kishila, bashii na lusa, baa-sha-twipu, bashii beelame, bafule kupombesheena, balwishi ba myanda iibuwa, baa-sha-kiipuko, baa-sha-bukyelo, bawule mbaa na kwilesha, bafule milòo ya mbidi, bashii bakumiin’Efile Mukulu; abakeeleesha bu been’Efile, anka abeekala batune bukome bwaye.’​—2 Tim. 3:1-5.

20. Mushindo kinyi oleshaa’shi Bufumu bwi na muulo koodi?

• “Kimbayi Bufumu bw’Efile Mukulu kumpala na kululama kwaaye.”​—Mat. 6:33.

• “Yesu nkulungula balondji baaye’shi: ‘Su muntu akyebe kundonda, eepele’ye nabeene, aate mutshi waaye wa makyenga andonde.’”​—Mat. 16:24.

21. Satana na ba demo mba nnanyi?

• “Anwe, enu nshenu nyi Diabulu, na anukumiina kukita ngabiabi ya nshenu . . . Aye badi ntapangi kubanga ku kibangilo.”​—Yo. 8:44, Kilombeeno kipya 2014.

• “Babasumbwile nyoka mukata, nyoka a kala, aabaitaanyina bu Kafilefile na bu Sataana, mulendwishi aa baa-pano booso; babaamusumbwile pa nsenga na mikeeyilu yaaye pamune naaye.”​—Kibaf. 12:9.

22. Satana badi mutopekye Yehowa na balangwidi Baaye pabitale kinyi?

• “Mukashi nkwaluula nyoka’shi: ‘Twi balombeene kudya bikuba bya ku mitshi ya mu lupango, anka kikuba kya mutshi wi munkatsh’a lupango, Efile Mukulu mmwambe’shi: “Tanwakwikidya sunga nkwikikuma, tala nwafwa.” Nyoka nkulungula mukashi’shi: ‘Nyaa, taanufun’we, ank’Efile Mukulu awuku’shi, efuku dyaanwikidi, meeso eenu aabuluka, dingi anwikala buu beefile, balombene kushinguula buuwa na bubi.’”​—Kib. 3:2-5.

• “Satana balulwile Yehowa’shi: ‘Kii na mwanda mbidi! Kyooso kii nakyo muntu, eekipaana bwa muuwa waye.’”​—Yob 2:4.

23. We kulesha naminyi’shi abyamba Satana mbya madimi?

• “Omufubile [Efile Mukulu] n’eshimba dimune.”​—1 Mya. 28:9.

• “Mpaa na byanfu, ntandekye lulamato lwande nya!”​—Yob 27:5, NWT.

24. Bwakinyi bantu bakwete kufwa?

• ‘Milwisho ibatwelele pa nsenga pa mwanda wa muntu umune, Adama, yaya milwisho yafwisha lufu. Byabya lufu alukwata bantu booso mwanda booso mbalwishe.’​—Lom. 5:12, EEM.

25. Bafwe abeekalaa naminyi?

• “Abatala abawuku’shi abafu; anka bafwe taabawuku kintu su nkimune.”​—Mul. 9:5.

26. Ndukulupilo kinyi lwi kwanka bwa bafwe?

• “Akwikala kusanguka kwa balulame naa kwa bashii-balulame.”​—Bik. 24:15.

27. Mbantu bungi kinyi abende mwiyilu bwa kumunana na Yesu?

• “Namwene . . . Mwana a mukôko badi mwimane pa mwengyé wa Siyona. Bádi na bantu 144 000 abádi mu mapala mwâbo mmufundwe eshina dyê na dya Nshê.”​—Kibaf. 14:1, EEM.

Mu kulonga koobe kwa Bible, we mupete kyukilo pabitale abikutekye Yehowa na kyoodi mulombeene kukita bwa kwikala na nshalelo mwipushene na miiya yaaye. Bwa kukita muyiile myanda yoodi mulongye, pangi we mushintuule myanda ibungi mu mweneno oobe pabitale muwa oobe na mwikeelo oobe. Binobino pobwata kitshibilo kya kwikala na nshalelo mwipushene na miiya ilulame ya Yehowa, boopu kulombana bwa kukita mudimo wibuwa bu mulungudi a mukandu wibuwa.

Nkonko yatutaluula binobino ayikyebe nkukwasha bwa kulamiina myanda ayikutekye Yehowa na nkutentekyesha ingi myanda yoodi mulombeene kukita bwa kwikala bu umune a ku bafubi baaye. Ino myanda ayikulesha muulo wa kukita byooso na kondo k’eshimba kebuwa bwa kutumbisha Yehowa.​—2 Kod. 1:12; 1 Tim. 1:19; 1 Mp. 3:16, 21.

Bu bibofiki mpaa na kuno kooso mu kulonga koobe, kushi mpaka we na lukalo lukata lwa kulamata ku miiya ya Yehowa na kutwela mu ndumbulwilo aaye. Nkonko na ma verse bi mwanka abikukwasha bwa kutaluula bi mpushisho oobe pabitale mpángo ya Yehowa, byabikala mu kakongye, mu kifuko, sunga pabitale myanda ya politike ya uno ndumbulwilo. Okyebe kusangeela ngofu mpángo yaate Yehowa bwa kulongyesha mwilo waaye na kwiunyingisha mu kikudi. Mu ino mpángo mwi bisangilo byotwele na kutusha myaluulo mwanka poodi na mushindo.

Na dingi, kino kipindji akikyebe kutaluula muulo wa kwipaana mu mudimo wa bulungudi bwa Bufumu, kukwasha bangi bwabadya kuuka Yehowa na kyakwete kukitshina bantu. (Mat. 24:14; 28:19, 20) Akupu, akitwesha mu binangu byobe muulo wa kwilambula koobe kwi Yehowa Efile Mukulu na kubatshishibwa. Shinkamisha’shi Yehowa aata na muulo byoso byokitshi bwa kalolo kaaye kakata kadi mukuleeshe.

1. Beena Kidishitu be na mwiya kinyi pabitale dibaka? Nkabingilo kinyi kamune ke mu Bible bwa kutshiba dibaka?

• “Aye pa balulwile, nkwi balungula’shi: ‘Anwe tanwibabadikye’shi yawa bebapangile kubanga ku kibangilo bebapangile mulume na mukashi, na nkwamba’shi: “Ngi bwakinyi mulume akalekye nshaye na nyinaye n’akalamate kwi mukashi aaye; na abo babidi abakekala mbidi imunenka?” Byabya abo ta be bubidi nya anka be mbidi imunenka. Kyakya namu kibungye Efile Mukulu muntu te kilamuunanga nya. . . . Su muntu abinga mukashi aaye, kukaasha bwa mwanda wa masandji, su aibakila ungi, baatambuka masandji.”​—Mat. 19:4-6, 9.

2. Bwakinyi abitungu’shi baaba bashaale pamune bu mulume na mukashi bekale beyibakishene muyiile miiya ya mbulamatadi? Su we mwibakile, oshinkamisha’shi dibaka dyobe ndifundjibwe ku mukanda na mbedikumine kwi mbulamatadi su?

• ‘Teentekyesha bantu booso’shi bee naa kya kwikala bakookyele ba nsushi, na ba mfumu.’​—Tt. 3:1.

• “Bantu booso baneemekye bulunda, dingi lusala lwa beena-nshibo lwikale lushii kato, mwanda baa-sha-lukyebanokyebano na baa-sha-kutambuka bundumba abakeekala basambishwe kwi Efile Mukulu.”​—Eb. 13:4.

3. We na mbalo kinyi mu kifuko?

• “Mwan’ande, lama abikulambukisha nshoobe, tolenguulang’elango dya nyinoobe.”​—Nki. 1:8.

• “Mwanda mulume nfumu a mukashi anka bu bii Kidishitu mwikale nfumu a kipwilo . . . Balume, fulaayi bakashi beenu bu bii Kidishitu na kifulo kwi kipwilo.”​—Ef. 5:23, 25.

• “Anwe ba nsha bana namu, tanwibakolomonanga, ooo. Mbikile buwa panukwete kwibakusha, nwibalongyeshe na kwibanyôka muîle abikyebe Yehowa.”​—Ef. 6:4, EEM.

• “Bana, kookyelaayi beenutande mu byooso; kyaakya ngi akitengyela Mwanaana kwanudi.”​—Kol. 3:20.

• “Anwe bakashi, kookyelaayi balume beenu.”​—1 Mp. 3:1.

4. Bwakinyi abitungu tuneemekye muwa?

• “[Efile Mukulu] ngi apeyaa byooso muwa na bukome, naa bibashaala byooso. . . . Mwadi’ye nyi mwatudi bapetele muwa, kusaanasaana na kikeelo kyetu.”​—Bik. 17:25, 28.

5. Bwakinyi tatwi balombene kwipaa muntu, sunga kukatusha eyimi?

• “Apekwateena bantu ngoshi, su beekupila mukashi ee n’eyimi . . . su kabi kaafika, afutu muuwa bwa muuwa.”​—Efi. 21:22, 23.

• ‘Bommwene mwanka pa nádi nkí bu kantu kebumbe bisumanga. Ku mpala kwa’mi kumona nguba, bofundjile mu mukanda ôbe mafuku ande ooso obódi muntshibile kwikala pa nsenga.’​—Mis. 139:16, EEM.

• “Yehowa mushikwe . . . maasa aasukumuna mase a muntu shii musoole mwanda.”​—Nki. 6:16, 17, NWT.

6. Efile Mukulu mmwele mwiya kinyi pabitale mase?

• “Tanudyanga . . . sunga mase, sunga nyema ifinyibwe nkono.”​—Bik 15:29, EEM.

7. Bwakinyi abitungu tufule bakwetu bena Kidishitu?

• “Nenupa mwiya upya; efuleeneyi kifulo. Bu byandi mwinufule, anwe naamu nwi naa kya kwifuleena. Abakatundula’shi nwi balondji bande anka ku kifulo kyaanwifuleena.”​—Yo. 13:34, 35.

8. Bwa kupela’shi mukumbo wa lwambu wibubi wambukile bangi: (a) Bwakinyi abitungu’shi muntu e na wawa mukumbo tekalanga ekwatena na bantu pa mbidi, bu kwibakwata biipa sunga kwififyena nabo ku milomo? (b) Bwakinyi ta mulombene kupusha bubi su bangi tabamwitanyisha ku mashibo abo? (c) Bwakinyi abitungu’shi muntu baadi mushale na muntu sha mukumbo wa lwambu ende mu kwipimisha kwi munganga kumpala kwa kubanga kwiyilena na ungi muntu? (d) Bwakinyi abitungu’shi muntu sha mukumbo wa lwambu alungule mukunkushi a midimo ya kasaka ka bakulu kumpala kwa kubatshishibwa?

• “Tanwikalanga na muntu su ngumune kishiyo, kukaasha kino kya kwifuleena ku muntu na muntu. . . . ‘Ofule muntu noobe bu’be na beene.’ Kifulo takikitshinaa muntu bubi su mbumune; byaabya kifulo ngi kukumbasha kw’Eyi dyooso dishima.”​—Lom. 13:8-10.

• “Muntu takimbanga bya kumusangasha pend’aye nabeene, asangashe naamu bangi.”​—Fid. 2:4.

9. Bwakinyi Yehowa etutekye bwa kufwila bangi lusa?

• “Tungunukayi na kwitwalenanga bushito na kwifwilena lusa muntu na mukwabo, su mungi e na mwanda wadiila mukwabo. Anka bu bibenufwidiile Yehowa lusa, n’anwe namu nukite nka byabya.”​—Kol. 3:13, NWT.

10. Nkinyi akitungu’shi okite su mukwenu bakudimbiila sunga nkukita bulandwe?

• “Su mukwenu baalwisha, enda kwadi, okamuleeshe kilubilo kyaaye pa buupenka bwenu. Su baateemesha, opaasha mukwenu. Su ta muteeemeshe, ata muntu umune sunga babidi bwa’shi mwanda ooso upete kitshibilo n’eyi dya tumonyi tubidi sunga tusatu. Su baapele kwibateemesha, lungula kipwilo bii mwanda; anka su baatunu kuteemesha mpaa na kipwilo, mutale buu mwina kingi kisamba na buu mufutshishi a bitadi.”​—Mat. 18:15-17.

11. Yehowa amonaa ino milwisho naminyi?

▪ Lusandji

▪ Kufuba na bifwatulo mu lulangwilo

▪ Kwifikena peepi kwa mulume na mulume, mukashi na mukashi

▪ Kwiba

▪ Kwasha maasha a makuta

▪ Kukolwa

• “Tanwidimbanga nya! Sunga basha-lukyebanokyebano, sunga abalangwila nkishi, abatambuka lusandji, . . . sunga balume abakyebe balume nabo, . . . tabakapyana Bufumu bw’Efile Mukulu nya.”​—1 Kod. 6:9, 10.

12. Pabitale lusandji, mwanka mwi kukita myanda ya kwifikena peepi na mulume sunga na mukashi shii oobe, we na kitshibilo kinyi?

• “Sûkai lusandji!”​—1 Kod. 6:18, EEM.

13. Bwakinyi abitungu’shi tupele kutoma bintu abikolwanaa byabashii betufundjile kwi munganga sunga bingi bintu abilwisha binangu na kukwata muntu ku bupika?

• “Anwe bakwetu, pa mwanda wa lusa lukata lwabadi betufwile kwi Efile Mukulu, nenusendêla byanudya kumulambula mbidi yenu bu kitapwa akitala, kimulamunwinwe, akimusangasha. Kukita byabya nyi nkumulangwila mu kipaso kimulombêne. Tanwambulanga mwikêlo wa ba pano pa nsenga, anka nulekyêle Efile Mukulu alûle mwikêlo wenu pa kwinupa binangu bipya. Byabya, anukashingûla akikyebe eshimba dyê, kyakya kibuwa, akimusangasha dingi kikumbanyinyîne.”​—Lom. 12:1, 2, EEM.

14. Midimo kinyi ingi ya ba demo yabadi bakandjikye kwi Efile Mukulu?

• “Munkatshi mwenu tamutuukanga muntu . . . Akwipusha mbuko, ayimbi misambo ya kutupika bikudi, abuku, àlèngula naa àsèndula, eesamba na bafwe.”​—Miy. 18:10, 11.

15. Su muntu bakitshi mulwisho na akumina kwalushuula kipwano kyaaye na Yehowa, abitungu akite kinyi bukidibukidi?

• “Nee mukusokwele mulwisho wande, ntshii mufye kito kyande nya. Nee mwambe’shi: ‘Naasokwela Yehowa kutupakana kwande.’”​—Mis. 32:5.

• “Umune aa kwanudi ee na kukumba su? Aitaanyine bakulu ba kipwilo, bwa’shi bamutekyele, kubaapu bamushingye mwimu wa kishila mwishina dya Yehowa. Nteko ya lukumiino aipaashaa ee na mukumbo; Yehowa amunyingisha, dingi, su ee na milwisho yaadi mukite, aimulekyeelwa.”​—Shak. 5:14, 15.

16. Su owuku’shi mukwenu mwina Kidishitu bakitshi mulwisho ukata, abitungu’shi okite kinyi?

• “Pee muntu kampanda akitshi milwisho, ngi’shi su apusha mwanda sunga eekala mumone sunga muwukye kintu kampanda, aye mupele kubwela byaawuku, paapa asemuna bushito bwa kito kyaaye.”​—Lv. 5:1.

17. Su abaukisha kakongye’shi muntu kampanda takii Temwe a Yehowa dingi, abitungu tumwate naminyi?

• ‘Muntu ayitaminyibwa’shi mukwetu mwikale sha lukyebanokyebano, sunga sha malaka, sunga mulangwidi a nkishi, sunga sha kukaana, su nkodi a malofu, sunga munyenganyi, tanwikalanga bukuuku naye, sunga kudya naye nya’.​—1 Kod. 5:11, Kilombeeno kipya 2014.

• “Su muntu afika kwanudi kushii kwinutwadila buno bulambukishi, tanumupokyeelanga kwenu nya, tanwelekyeshanga sunga nkumusema nya.”​—2 Yo. 10.

18. Bwakinyi abitungu’shi bakuuku boobe bekale bantu bafule Yehowa?

• “Su otemba na basha binangu, obe namu okekala n’abyo. Anka, su otemba na balôtakane, okamono malwa.”​—Nki. 13:20, EEM.

• “Tanwidimbanga: baakuuku beebubi abalwishaa bwikashi bwi buwa.”​—1 Kod. 15:33.

19. Bwakinyi ba Temwe ba Yehowa t’abatwelakanaa mu myanda ya politike?

• “Ta mba pa nsenga, bu bianshii mwikale’mi [Yesu] a pa nsenga.”​—Yo. 17:16, Kilombeeno kipya 2014.

20. Bwakinyi abitungu’shi okookyele mbulamatadi?

• ‘Muntu ooso akookyele banfumu bee na matalwa, mwanda bufumu booso abutuukila’nka kw’Efile Mukulu; mafumu ooso ee padi, nnaye mwialekyeele.’​—Lom. 13:1.

21. Su kwi kwikakena pabitale kukookyela mwiya wa bana ba bantu na mwiya w’Efile Mukulu, we mulombene kukita kinyi?

• “Bii buwa kukookyela Efile Mukulu pee kukookyela bantu.”​—Bik. 5:29.

22. Mma verse kinyi akumbene nkukwasha bwa kwikala kula na uno ndumbulwilo nsaa yosangula mudimo?

• “T’akukekalanyi mwilo aukatûku win’âo ngoshi, sunga kwiya mwa kwiilwa.”​—Mik. 4:3, EEM.

• “Mwilo wande’be tuuka mu luno lupata [Babilone mukata] tala nwatwelakana mu milwisho yaalwo, nweabeena bipupa byabadi beebaabikiishe.”​—Kibaf. 18:4.

23. Mmaasha kinyi na mishindo kinyi ya kukisha kapapi yodya kusangula, na mishindo kinyi yodya kupela?

• “Yehowa . . . mmushikwe baaba bafule etombo.”​—Mis. 11:5, NWT.

• “Shikwayi bubi, lamataaayi ku myanda iibuwa.”​—Lom. 12:9.

• “Kintu kyooso kya biinyibiinyi, kyooso kii kineemo, kilulame, kiiselele, kyaakya kilombeene kufudiibwa na kudingwa, kyaakya kii n’eshina’shi mmwanda wibuuwa, kilombeene kukaanyibwa, byooso byaabya, ebifubileyi.”​—Fid. 4:8.

24. Bwakinyi ba Temwe ba Yehowa tabalangwilaa pamune na bingi bipwilo?

• “Tanwi balombeene kutoma ku kipulu kya Yehowa na kipulu kya kafilefile pamune nya.”​—1 Kod. 10:21.

• “‘Katukaayi munkatshi mwa baaba bantu, etuuleyi kumpengwa, ngi abyamba Yehowa; tanukumanga kintu kii butete su nkimune. Byaabya ami nenupokyeela.’”​—2 Kod. 6:17.

25. Mayi kinyi a kulonda alombene nkukwasha bwa kusangula musangelo odya kutwela?

• “Babaatwelakeene na bingi bisamba, abo nkwambula bikitshiino byaabo. Babaalangwidiile nkishi yaabo, ayo nkwibalulukila buu kateo.”​—Mis. 106:35, 36.

• “Bafwe taabawuku kintu su nkimune.”​—Mul. 9:5.

• “Ta mba pa nsenga, bu bianshii mwikale’mi a pa nsenga.”​—Yo. 17:16.

• “Mwanda byaabya bibaanukitanga kala muyiile bwikashi bwa bashii bakumiine mbipwe kulombana; nubaadi mu bukitekite, ndàkalakà, kukwatshika, bisankasanka, buntomi na kulangwila nkishi bishii naa kyaabyo.”​—1 Mp. 4:3.

26. Bileshesho bya mu Bible abikukwasha naminyi bwa kwata kitshibilo pabitale kukita feete a efuku dya kutandjikwa?

• ‘Efuku dyaa kasatu, dibaadi diikale mufikilo wa Faraone, uno nkukitshiina bafubi baaye madyo akata dingi munkatshi mwabo, aye nkutuula pankatshi mwedi mukata a malofu na nkitshishy’a mikate. Aye nkutuula dimo ku mufubo waye yaawa mwedi mukata a malofu . . . Ngi aye nkupudika nkitshishi mukata a mikate.’​—Kib. 40:20-22.

• “Dya mufikilo wa kusepeela kutandwa kwa Eroode, mwana-mukashi aa Erodyaade nkusha masha kumpala kwa baitaanyinwe, aye nkusangasha Eroode bikata. Ngi mwanda kinyi aye uno baatshipile bwa kumupa kyooso kibaady’a kuteka. Nyinaaye baamutakwile, aye naamu nkumulungula’shi: ‘Mpe pano mwilonga dyaalame, mutwe wa Yowano Mubatshishi.’ Aye nkutuma muntu mu kutshiba Yowano mutwe mu lukano.”​—Mat. 14:6-8, 10.

27. Bwakinyi bibuwa’shi olonde bukunkushi bwa bakulu?

• “Kookyelaayi bakunkushi beenu, nwibafubile; mwanda abo ngi abalama myuuwa yeenu, mwanda abakeeyilubwila bulami bwabo kwi Efile. Byaabya mbalombeene kwibikumbasha na muloo, kushii mu kwidila, mwanda ta mbilombeene kwinulumbulukila nya.”​—Eb. 13:17.

28. Bwakinyi bi na muulo bwa’shi obe na kifuko kyoobe nwate nsaa ya kubadika na kulonga Bible efuku dyooso?

• “Kyê kyadi mufule nyi ndambukisho ya Yehowa, einangushena kânya na bufuku. E bu mutshi ukunyibwe ku bukunkula bwa musulo aupeyâ bikuba pa kipindji kyâbyo. Mpâ na masaki âo t’aafumbâ ooo. Byoso by’akitshi abimuîla’nka ku mpala.”​—Mis. 1:2, 3, EEM.

29. Bwakinyi okuminaa kutwela mu bisangilo na kutuusha ngaluulo?

• ‘Naakawukisha bakwetu kineemo ky’eshina dyoobe dingi nakakutumbisha munkatshy’a kakongye.’​—Mis. 22:22, NWT.

• “Twikwasheneeyi ku muntu na muntu, bwa kwinyingisheena mu kifulo na mu mifubo iibuwa. Tatupungilanga kufika mu bikongeeno byeetu, bu bibaabanga bangi kyaakya kyuubishi, anka twinyingisheeneeyi ku mashimba, nkibinkibi pano paanumono’shi efuku dibeeseesela peepi.”​—Eb. 10:24, 25.

30. Yesu mwitupe mudimo kinyi wi na muulo ukata watudya kukita?

• “Ndaayi: mu miilo yooso, nwibeekashe buu balondji bande, nwibabatshishe . . . , nwibalambukishe bya kulama byooso binaadi mwinufundjile.”​—Mat. 28:19, 20.

31. Nsaa yatutusha bya buntu ku Nshibo ya Bufumu sunga kukwasha mukwetu, Yehowa asangalaa na binangu kinyi?

• “Tumbisha Yehowa na bintu byoobe bya muulo.”​—Nki. 3:9, NWT.

• “Ooso muntu atuushe muyiile kitshibilo kya mwishimba dyaaye, kushii kinyongwa sunga ku bukopo, mwanda Efile Mukulu mmufule apaana na mulòo.”​—2 Kod. 9:7.

32. Bena Kidishitu abauku’shi abakapete nkalakashi kinyi?

• “Baa-sha mwabi mbano baabapombesha bwa bululame: bufumu bwa mwiyilu mbwabo. Nwi baa-mwabi paabeenukaa, paabeenupombesha, naa pabeenudimbiila myanda ii bubi ilekeene pa mwanda wande. Ikalaayi na muloo na kusepeela, mwanda efuto dyeenu ndikata mwiyilu; mwanda byaabya ngi bibaabapombeeshe batemuki babaadi benubadidiile.”​—Mat. 5:10-12.

33. Bwakinyi kubatshishibwa bu Temwe a Yehowa nyi mwabi ukata?

• “Eyi dyoobe dibansangulusha, dibampa mwabi ukata. Babangabikish’eshina dyoobe, Yehowa Efile Mukulu.”​—Yel. 15:16.

Ababatshishaa bantu nka ku bikongeno bya ba Temwe ba Yehowa. Ku nfudiilo kwa mwisambo wa lubatshisho, sha mwisambo alungula baaba abakyebe kubatshishibwa bwa’shi bemane bwa kwaluula n’eyi di bukopo ku ino nkonko ibidi:

1. We mupwe kwilanga ku milwisho yoobe welambula obe nabene kwi Yehowa na kukumiina eshinda dyaaye dya kipandjilo kukiila mwi Yesu Kidishitu su?

2. Oshinguula’shi nsaa y’obatshishibwa, b’ofiki Temwe a Yehowa na’shi b’otwele binobino mu ndumbulwilo a Yehowa su?

Kukumiina ku ino nkonko akulesha’shi baaba abakyebe kubatshishibwa ‘abakula patooka’ lukumiino lwabo mu mulambu wa nkuulo ya Yesu na’shi abelambula na mashimba aabo ooso kwi Yehowa. (Lom. 10:9, 10) Baaba abakyebe kubatshishibwa abitungu babadiile kunangushena mu luteko ino nkonko bwa’shi baluule muyiile lukumiino lwabo.

We mupwe kwilambula kwi Yehowa mu luteko, omulaa bwa kumulangwila nka penda’ye na kutuula kukita akikyeb’eshimba dyaaye pa mbalo ya kumpala mu muwa oobe su?

Oshinkamisha’shi we mupwe kwilumbuula bwa kubatshishibwa su?

Mbilamba kinyi bilombane bwa nsaa ya kubatshishibwa? (1 Tim. 2:9, 10; Yo. 15:19; Fid. 1:10)

Abitungu nfwadilo eetu aleshe “kwiyisha na binangu bibuwa” bwa kulesha “kwilambula kwetu kwi Efile Mukulu.” Byabya, baaba ababatshishibwa t’abitungu’shi bafwale bilamba bish’abilesha kwiyisha sunga bifundwe myaku kampanda nya. Nfwadilo aabo abitungu ekale mulombane, shii mako, amweka kalolo ku meso kwa bantu, na mulombane bwa wawa mwanda.

Abitungu muntu ekale na mwikeelo kinyi nsaa yabamubatshisha? (Luk. 3:21, 22)

Lubatshisho lwa Yesu ndulekyele beena Kidishitu kileshesho kibuwa lelo uno. Baadi aata dino etabula na muulo, na byabya bibaadi abimweneka mu binangu na bikitshino byaye. Byabya, t’abitungu kwela miseku ibubi, kwasha masha sunga kuywa pa mbalo ya lubatshisho nya, sunga kukita myanda kampanda isha ineemeka lubatshisho lwabakyebe kukita panka. Na dingi, mwina Kidishitu bakatuka mu kubatshishibwa t’abitungu asame bu muntu batshokola ngoshi nya. Bu bi kubatshishibwa mmwanda wa muloo, abitungu kusangala mu mushindo ulombane.

Mushindo kinyi ukumbene kwibunga na kwikala peepi na kakongye nkukwasha bwa kulombasha kwilambula koobe kwi Yehowa?

Kunyima kwa kubatshishibwa, bwakinyi abitungu’shi olame programe ebuwa a kwilongyela na kulungula mukandu wibuwa?