DILONGIESHA 26

Buakinyi kui mianda i bubi na makienga?

Utukie ku kaamo

Apakitshika muanda wi bubi, su muntu eipusha’shi “buakinyi ubakitshika,” tabi bubi nya. Tui na muloo wa kuuka’shi Bible atusha ngalulo ku ino nkonko!

1. Mbikunyi bibatueshele Satana bubi pa nsenga?

Satana Diabulu badi mutombokiele Efile Mukulu. Satana baadi akumina kukunkusha bangi, nyi aye nkutakula Adame na Eeva bantu ba kumpala, buashi bamulonde mu bu ntomboshi buaye. Satana bakitshine bino paye kudimba Eeva. (Kibangilo 3:1-5) Batumine binangu biaye mu kunangushena’shi, Yehowa takumina buashi bapete bintu bi buwa nya. Badi akiebe kuamba’shi bantu mbalombene kuikala na muloo su bapela kukokiela Efile Mukulu. Satana bakuile madimi a kumpala paye kulungula Eeva’shi tafu nya. Nyi buakinyi Bible aitanyina Satana’shi: “Sha madimi na nshaye na madimi.”—Yowano 8:44.

2. Adame na Eeva babadi basangule bua kukita kinyi?

Yehowa badi mupe Adame na Eeva bioso bibabadi nabio lukalo. Badi muibalungule bua kudia bikuba bia mitshi yoso ibadi mu lupango lua Edene, kukasha nka mutshi umune ubadi muibatoshe. (Kibangilo 2:15-17) Anka babadi bate kitshibilo kia kudia kikuba kia wawa mutshi ubabadi bebatoshe. Eeva ‘batshile kikuba adya.’ Kunyima, Adama ‘nkudya namu.’ (Kibangilo 3:6) Boso buabo babidi babadi bapele kukokiela Efile Mukulu. Bu bibaadi’shi adame na Eeva babadi bapuidikie, babadi nka na mushindo wa kukita mianda i buwa. Bu bibabadi bapele kukokiele Efile Mukulu, babakitshine muluisho na abo nkupela bukunkushi buaye. Kino kitshibilo kibadi kibafuishile makienga e bungi.—Kibangilo 3:16-19.

3. Kitshibilo kia Adame na Eeva ki na bukitshishi kinyi kuatudi?

Pabadi Adame na Eeva bakite muluisho, babafikile bantu bakutue kupuidika, na mbalekiele bana babo boso kukutua kua kupuidika. Pabitale Adame, Bible akula’shi: “Milwisho ibatwelele pa nsenga pa muanda wa muntu umune, Adame, yaya milwisho yafwisha lufu. Byabya, lufu alukwata bantu boso.”—Bena-Looma 5:12, EEM.

Tukuete kukienga muanda wa tubingilo tui bungi. Ingi misango atukienga muanda wa bitshibilo bi bubi biatuataa. Ingi namu atukienga muanda wa bitshibilo bi bubi bia bangi bantu. Ingi nsaa namu atukienga muanda washi tui pa mbalo i bubi mu nsaa i bubi.—Badika Mulungudi 9:11.

TUKIMBUULE BOSO

Tutale buakinyi Efile Mukulu ta naye nsulo ya bubi na makienga e pa nsenga lelo uno, na biapushaa nsaa yatukiengie.

4. Kui muntu umune muikale nsulo ya makienga etu

Bantu bebungi abamba’shi Efile Mukulu nyi kuete kukunkusha nsenga ishima. Uno muanda ngua binyibinyi su? Tala VIDEO.

VIDEO: Nnanyi kuete kukunkusha nsenga? (1:24)

Badika Shake 1:13 na 1 Yowano 5:19, akupu nuisambile luno lukonko alulondo:

Efile Mukulu nyi nsulo ya bubi na makienga su?

5. Tala bipeta bia bukunkushi bua Satana

Tala VIDEO.

VIDEO: Bwakinyi Efile Mukulu mmutadiile makyenga?—Kapindi (3:07)

Badika Kibangilo 3:1-6, akupu nuisambile ino nkonko ailondo:

Madimi kinyi abaadi akule Satana?—Tala verse 4 na 5.
Mbikunyi bibadi Satana muleshe’shi Yehowa asuminaa bantu bintu bi buwa?
Muyile mueneno a Satana, bantu bena lukalo lua bukunkushi bua Yehowa bua kuikala na muloo su?

Badika Mulungudi 8:9, akupu nuisambile luno lukonko alulondo:

Bu bikale’shi nta Yehowa kuete kukunkusha nsenga, mianda kinyi ikuete kukitshika?

Bifuatulo bisangie: Mianda ailesha nshalelo e pa nsenga kubanga ku kipangilo mpa na ku Mpaladiso akafiki. A. Mpaladiso pa nsenga na mitshi ibuwa. B. Munda mua bipua nkama, bukunkushi bua bana ba bantu mbuushe nsenga na bipuilo bia madimi, kuitshibula, ngoshi na kuluisha lupapi. Bifuatulo bia ma mbulamatadi asha bukome: Égypte, Chine, Grece, Rome, Grande-Bretagne, na États-Unis. C. Bantu be mu Mpaladiso pa nsenga.

Adame na Eeva babadi bapuidikie na babadi mu Mpaladiso. Anka babadi bakokiele Satana na abo nkutombokiela Yehowa
Kunyima kua bu ntomboshi, miluisho ibatuelele pa nsenga ishima, makienga, mpa na lufu
Yehowa akapudisha miluisho, makienga mpa na lufu. Na bantu, abakekala bapuidikie na abakashala mu Mpaladiso

6. Yehowa ekalakashaa pabitale makienga etu

Efile Mukulu ekalakashaa buetu patukiengie su? Tubande kutala bibafundile Nfumu Davide na Mpyeele mutumibua. Badika Misambo 31:7 na 1 Mpyeele 5:7, akupu nuisambile luno lukonko alulondo:

Opusha naminyi pakuuka’shi Yehowa amonaa na ekalakasha bua makienga etu?

7. Efile Mukulu akapudisha makienga oso a bantu

Badika Yeeshaya 65:17 na Kibafumbwilwe 21:3, 4, akupu nuisambile luno lukonko alulondo:

Buakinyi abitunyingisha pakuuka’shi Yehowa akalumbula mianda yoso ikuete kukiengiesha bantu?

Oukanga su?

Pabadi Satana mudimbe bua musango wa kumpala, badi mudimbile Yehowa. Paye kukita biabia badi muluishe nkumo ya Yehowa na kumuikasha bu mukunkushi shina kifulo. Yehowa pakapudisha makienga a bantu mu mafuku apela e kumpala, akalushula nkumo y’eshina diaye. Mu ungi ngakuilo, akashinkamisha’shi bukunkushi buaye nyi bukile buwa. Kukaluila ku’eshina dia Yehowa kuina muulo.—Mateo 6:9, 10.

BANGI ABAMBA’SHI: “Efile Mukulu nyi mukumine buashi bantu bakiengie.”

Obe namu wamba naminyi?

MU KIKOSO

Satana Diabulu na bantu babidi ba kumpala Adame na Eeva, nyi bekale nsulo ya mianda i bubi i pa nsenga. Yehowa ekalakashaa bua makienga etu na mu mafuku apela akeapudisha.