DILONGIESHA 41
Bible akula kinyi pabitale bia kufubisha bipindi bia mbidi bia bufu?
Bantu bebungi abapushaa bufu bua kuisambila bipindi bia mbidi bia bufu. Aku namu Bible akulaa patoka pabitale bipindi bia mbidi bia bufu. Mianda yakula ngilombene kuitukuasha. Na bino abipushika kalolo muanda Bible afiki kui Yehowa aye Mupangi eetu. Na auku kiakia kibuwa buetu. Etulesha bilombene bikitshino bietu kumusankisha na kilombene kuitukuasha bua kuikala na muloo bua loso.
1. Yehowa e na mueneno kinyi pabitale kuilalena kua mulume na mukashi?
Kuilalena kua mulume na mukashi nkia buntu akifiki kui Yehowa. Akumina’shi kuilalena kua mulume na mukashi beyibakishene kuibape muloo. Kino kia buntu mbekipe bantu be mu eyibakishi kushi penda bua kutanda bana anka na bua kuileshena kifulo na kabombeleshi muyile mpango ya ku kibangilo mu mushindo ausankisha. Nyi buakinyi Bible amba’shi: “Sanka na mukashi a ku bukinga boobe.” (Nkindji 5:18, 19) Yehowa atekie bena Kidishitu beibakishene bua kuikala na lulamato munkatshi muabo, biabia nta mbalombene kulala na muntu shi muina dibaka nabo.—Badika Bena-Ebelu 13:4.
2. Lusandi alupushisha kinyi?
Bible etulungula’shi ‘basha lukiebanokiebano . . . tabakapyana Bufumu bw’Efile Mukulu.’ (1 Bena-Kodinda 6:9, 10) Baludi ba Bible babafundile mu kina Greke abadi bafubishe kishima por·neiʹa bua kulesha lusandi. Kino kishima akilesha (1) kuilalena kua mulume na mukashia bashi beibakishene (2) kua mulume na mulume sunga mukashi na mukashi mpa na kua (3) muntu na nyema. Atusankisha Yehowa na abitukuasha atue banabene “pa tuilama ku lusandji.”—1 Bena-Tesalonika 4:3.
TUKIMBUULE BOSO
Tutale biodi mulombene kusuka lusandi na biodia kupeta bukuashi bua kushala mutokane mu binangu.
3. Suka lusandi
Yosefe muntu sha lulamato, badi muitatshishe bua kushala mutokane mu binangu. Badika Kibangilo 39:1-12, akupu nuisambile ino nkonko ailondo:
Nkinyi kibadi kitakule Yosefe bua kusuka?—Tala verse 9.
Omono’shi Yosefe batshile kitshibilo ki buwa su? Buakinyi wamba biabia?
Ba nsongua be kuambula Yosefe na kusuka lusandi ano etu mafuku naminyi? Tala VIDEO.
Yehowa akumina’shi oso a kuatudi asukie lusandi. Badika 1 Bena-Kodinda 6:18, akupu nuisambile ino nkonko ailondo:
Mianda kinyi ilombene kutakula muntu mu kutambuka lusandi?
Mbikunyi biodi mulombene kusuka mianda i butete?
4. We mulombene kukambila bitompuanga
Nkinyi kilombene kuelela muntu bukopo bua kukambila kitompuanga kia kutambuka lusandi? Tala VIDEO, akupu nuisambile luno lunkonko alulondo.
Mu uno video, nkinyi kibakitshi mukuetu mulume pa basangana’shi binangu na bikitshino biaye bi kumutakula mu kukutua lulamato kui mukashi aaye?
Ingi nsaa, mpa na bena Kidishitu ba sha lulamato abekitshisha bua kushala batokane mu binangu. We kuimika kuela binangu ku mianda ibutete naminyi? Badika Bena-Fidipe 4:8, akupu nuisambile ino nkonko ailondo:
Tui kunangushena pabitale bintu kinyi?
Kubadika Bible na kushala bepane mu mudimo wa Yehowa kui kuitukuasha bua kukambila kitompuanga kia kukita muluisho naminyi?
5. Miya ya Yehowa i kuanka bua buwa buetu
Yehowa auku ki buwa buetu. Etulungula biatudia kushala batokane mu binangu na bukuashi buatupete patuibitumikila. Badika Nkindji 7:7-27 sunga kutala VIDEO, akupu nuisambile ino nkonko ailondo.
Uno nsongualume badi muitule mu kitompuanga naminyi?—Tala Nkindji 7:8, 9.
Muyile mukanda wa Nkindji 7:23, 26, kutambuka lusandi kui kufuisha masaku akata. Su atushala batokane mu binangu mianda kinyi i kukutua kuitufikila?
Kuikala batokane mu binangu kui kuitukuasha bua kuikala na muloo wa loso naminyi?
Bangi bantu abamba’shi abiakula Bible pabitale kuilalena kua mulume na mulume sunga mukashi na mukashi t’abilesha’shi Efile mmuitufule. Anka Yehowa Efile sha kifulo akumina’shi bantu boso bekale na muloo bua loso. Biabia abitungu tuikela na nshalelo muipushene na miya yaye. Badika 1 Bena-Kodinda 6:9-11, akupu nuisambile luno lukonko alulondo:
Muyile mueneno a Efile Mukulu, nka penda kuilalena kua mulume na mulume sunga mukashi na mukashi nyi kui bubi su?
Bua kusankisha Yehowa, abitungu oso a kuatudi ashintulukie. Bi na muulo bua kuikitshisha su? Badika Misambo 19:8, 11, akupu nuisambile ino nkonko ailondo:
Omono’shi miya ya Yehowa ngilombanyine? Buakinyi wamba biabia?
Yehowa mmukuashe bantu bebungi bua kuikala na nshalelo muipushene na miya yaye. Mulombene nkukuasha namu
BANGI ABAMBA’SHI: “Muntu oso mulombene kulala na oso akumina su mbefulene.”
Obe namu omono naminyi?
MU KIKOSO
Kuilalena kua mulume na mukashi beibakishene nkia buntu akifiki kui Yehowa akibapa muloo.
Kuambuula
Kutambuka lusandi nkutale dingi mianda kinyi?
Nkinyi kilombene kuitukuasha bua kusuka lusandi?
Miabi kinyi yatupete p’atulondo miya ya Yehowa?
TALUULA DINGI
Tala buakinyi Efile Mukulu akumina’shi su mulume na mukashi abakumina kushala pamune, abitungu beyibakishene.
“Bible akula kinyi pabitale kushala pamune kushi kuiyibakishena?” (Muisambo wi mu Internete)
Tala buakinyi miya ya mu Bible pabitale kuilalena kua mulume na mulume sunga mukashi na mukashi t’ayilesha’shi abitungu tui bashikue.
“Kuilalena kua mulume na mulume sunga mukashi na mukashi kui bubi su?” (Muisambo wi mu Internete)
Tala mushindo awitukaluila miya y’Efile Mukulu ku mishindo yoso ya kuilalena mu kipaso ki bubi.
“Kuififishena ku misua nkuilalena su?” (Muisambo wi mu Internete)
Tala kibadi kitakule ungi muana mulume badi elalena na balume naye mu kushintula nshalelo aye bua kusankisha Efile Mukulu, mu muisambo wa mianda imone muntu awamba’shi: “Babadi bangate na muulo.”
“Bible kwete kushintula bantu” (Kitenta kia Mulami, 1/4/2011)
a Mu ino mianda mui bikitshino bi bubi bu kuikiebena mu kanua, ku matako, sunga kufina bipindi bia mbidi bia buufu bia ungi muntu na lukalo lua kuibuesha malaka a kusangisha mbidi.