Masaku aatuuku ku bintu byabadi bapangye kwi Efile Mukulu aalesha shi efile mukulu e na kifita?

ABYAMBA BANTU: “Efile Mukulu ndjo kwete kukunkusha nsenga, byabya aye nyi kwete kufwisha ano masaku ooso, twi na kya kwamba shi e na kifita.”

ABYAMBA BIBLE: “Byaa-pano byooso mbishaale ku matalwa a mubi.” (1 Yowano 5:19) Yawa “mubi” nnanyi? Bible alesha shi nyi Satana. (Mateo 13:19; Maako 4:15) Mbya madimi su? Banda kwela binangu: Bu bi Satana e na matalwa pa nsenga ishima, byabya aye ndjo kwete kutakula bantu mu kukimba penda buwa bwabo, lwabi, na kukutwa kwa kumona myanda i kula bu byadi’ye. Byabya ta mbilombeene nkukwasha bwa kushinguula bwakinyi bantu bakwete kulwisha mbalo yabadi bashaale pa mwanda wa bubi bwabo su? Baasha binangu bebungi mbaleshe shi kulwisha kwa nsenga ndjo kukwete kufwisha masaku aatuuku ku bintu byabadi bapangye kwi Efile Mukulu, kukwete kwiatuusha, kwiafwimisha, sunga kunyisha kulwisha mbalo ishaale bantu.

Byabya, bwakinyi Efile Mukulu mmutadiile Satana bwashi atakule bantu mu kukita myanda i bino? Bwa kupeta lwalulo, abitungu twalushe binangu ku myanda ibaadi ikitshikye ku kibangilo, nsaa ibaadi baledi betu ba kumpala batombokyele Bukunkushi bw’Efile Mukulu. Kubanga mu aa mafuku bantu bebungi mbatombokyele Efile Mukulu. Kukumiina kwabo kwa kutombokyela bukunkushi bw’Efile Mukulu​—nkutuule bantu be mu nsenga ishima ku matalwa a Satana mwishikwanyi n’Efile Mukulu. Yesu baadi mwitamine Satana bu “nfumu a pano pa nsenga.” (Yowano 14:30) Satana akyebe kukunkusha bwa looso su? Nya!

Yehowaa ta mmulombeene kupela kwitatshisha bwa makyenga abakwete kufwishila bantu kwi Satana nya. Byabya, Efile Mukulu ekalakashaa ngofu p’amono bantu abakyengye. Bu kileshesho pabitale nkalakasho ibaadi ipete mwilo wa Isaleele, Bible alesha bino pabitale Efile Mukulu shi: “Baadi ekalakasha ngofu nsaa ibabadi mu makyenga.” (Yeeshaya 63:9, NW) Pa mwanda wa lusa lwaaye, Efile Mukulu mmwate mpàngo ya kufudiisha binobino bukunkushi bwa Satana bwi na kifita! Mmutuule Mwan’aaye, Yesu Kidishitu, bwashi ekale Nfumu ebuwa na sha kululama bwa looso.

MUSHINDO UKUTALE UNO MWANDA: Sunga mbii bukunkushi bwa Satana ta mboobeshe kukalwila bantu ku myanda ikwete kwibakyengesha, bukunkushi bwa Yesu abukyebe kwibikita. Ungi mususa Yesu baadi mukalwile balondji baaye ku kipapi ki bukopo. Bible alesha shi: “Aye nkusaashila lupunga na meema’shi: “Umiina!” Kipapi kibaalekyele, kooso nkumiina.” Balondji abambile’shi: “A uno nnanyi akokyelwa naa kwi lupapi mpaa na meema?” (Maako 4:37-41) Uno mwanda awitushinkamisha shi Yesu akyebe kukalwila bantu booso baasha kukokyela p’akekala Nfumu.​—Danyele 7:13, 14.