We kwikala na lukulupilo mwi Efile Mukulu su?

BANDA kupwandikisha shi we na kuuku oodi mufule, kadi kwete kukita myanda kampanda yoshopusha kalolo. Bangi bakwete kutopeka myanda yakitshi na binangu byaaye, abamba shi e na kifita. We mulombeene kukumiina mususa umune kyabamba su we kukumiina kuteemesha abyamba kuuk’obe? Su tepanka bwa nkupatulwila, we kumutengyela na kupela kumutopeka mususa umune su?

Kumpala kwa kwaluula, abitungu oukye bibungi. We mulombeene kwiyipusha shi: ‘Uno kuuku ande namuuku naminyi, na nkinyi kilombeene kunkuminyisha myanda yaaye?’ Bibuwa. Kadi, banda kutala: Tatwi balombeene kwiyipusha bino pabitale kuuka su Efile Mukulu e na kifita su?

Mbilombeene nkwikeela bukopo bwa kupusha ingi myanda yabadi bakite kwi Efile Mukulu, sunga shi we mulombeene kukaanya pomono ingi myanda yaadi mutadiile bwashi ikitshikye. Kwi bantu bebungi abakyebe nkulungula shi Efile Mukulu e na kifita na balombeene nkutakula mu kutopeka bikitshino byaaye bu byabakwete kwibitopeka. We mulombeene kutengyela mpa na nsaa youku bibungi su? Lwalulo loobe ndutale mushindo ouku Efile Mukulu. Eyipushe shi: ‘Ne mu kipwano ki naminyi n’Efile mukulu?’

Su we na nkalakasho, ngilombeene nkutakula mu kwamba shi Efile Mukulu ta mwileshe bu kuuku oobe. Kadi banda kwela binangu; Efile Mukulu ndjo nsulo ya makyenga oobe su aye nyi nsulo ya miloo yoobe? Anka bu bibatukatuka mu kumona, Satana nyi “nfumu a pano pa nsenga,” ta Yehowa nya. (Yowano 12:31) Byabya Satana ndjo nsulo ya makyenga na kukutwa kwa kululama kwi pa nsenga. Twe mulombeene kukumiina shi kukutwa kwetu kwa kupwidika na myanda ayitufwila kushii kuuka ndjo nsulo ya nkalakasho yetu su?

Kadi, Efile Mukulu nsulo ya kinyi? Bible amba shi Efile Mukulu “Bapangile eilu na nsenga”; na dingi shi ku bintu byadi mukite twi kutemuna mbidi yeetu, yaadi mukite “mu kipaso kya kukânya kukata.” Alesha dingi shi, Yehowa ‘e na muwa wetu mwiyasa dyaaye.’ (Misambo 124:8; 139:14, Ñono na malango; Danyele 5:23) Bino byooso abilesha kinyi?

Bino abilesha shi Mupangi etu ndjo mukumiine shi twikale kwanka. (Bikitshino 17:28) Nyi nkwamba shi: Muwa waadi mwitupe, buwa bwa bintu bitwifunyishe, kusangeela kwa kifulo na bukuuku, miloo ya kutompa, kukuma, kupusha, na kununka​—byooso bino mbyabuntu by’ Efile Mukulu. (Jaake 1:17) Tomono’ shi ino miloo yooso ayimwikasha bu Kuuku atudi balombeene kunemeka na kukulupila su?

Eyendo’shi, mbilombeene nkwikeela bukopo bwa kukulupila Efile Mukulu. Pangi opwandikisha shi twe mubande kumuuka kalolo bwa kutuula lukulupilo mwadi. Byabya abipushika. Mu ino miisambo ipeela, tatwi balombeene kulesha byooso abitakulaa bantu mu kupwandikisha shi Efile Mukulu e na kifita nya. Kadi twe mulombeene kukita moobe mooso bwa kuuka Efile Mukulu kalolo su?a Atushinguula shi su bokitshi byabya, okyebe kuuka bya binyibinyi pabitale Efile Mukulu. Efile Mukulu e na kifita su? Nya, “Efile Mukulu nyi nkifulo.”​—1 Yowano 4:8.