Myanda ibubi ikwete kufiima!

Smita,a ungi mukashi e na bipwa 35 a mu Dacca, mu Bangladesh, baadi aukibwa bu muntu sha kifulo na kwete kwitatshisha bwa bangi. Bantu abaadi abamuuku bu mukashi baadi afubu ngofu na e na muloo, na baadi na lukalo lwa kukwasha bangi pa kwibalungula myanda ibaadi alongo pabitale Efile Mukulu. Kifuko kyaye na ba kuku baaye abaadi bakalakashwe ngofu nsaa ibaadi Smita mukwatshikye mususa umune na mukumbo ubaadi umwipe munda mwa lubingo.

James na mukashi aye, ba mulume na mukashi be na bipwa 30 mu dibaka, abaadi na nkumo nka bi ya Smita. Dingi efuku mu kashiposhipo, abaadi bende mu nkatembela ba kuuku baabo mu Côte Ouest a mu États-Unis. Ta mbalukye dingi kwabo ku New York nya. Kwakwa abo nkupeta masaku akata a lufu, nkuleka bantu babadi bafule na beena mudimo nabo na kinyongwa.

Tokwete kumona namu shi myanda ibubi na makyenga bibafiimi ngofu lelo uno? Ngoshi ikwete kwipa basalayi na bantu ba bisumanga. Bibeshi na bukitekite abikyegyesha bantu bashi na mwanda. Masaku a lufu na mikumbo abifwila bantu kushi kutala bipwa sunga milongo yabo. Masaku aatukila ku bintu bipangye Efile Mukulu aalwisha bibundi kushi ntondo. Kwelela bantu binangu bibubi na myanda ya kukutwa kwa kululama mbipalakane. Pangi obe namu we na lobe lukalakasho.

Bibuwa kwiyipusha ino nkonko:

• Bwakinyi myanda ibubi ayifwilaa bantu bebuwa?

• Efile Mukulu ndjo kwete kufwisha ino myanda su?

• Makyenga nyi masaku aafikaa mu mpukapuka su kwi muntu kwete kwiafwisha?

• Bikwikala shi karma, kwamba shi, bipeta bya ku bilubilo bya muntu bibakitshine kala, abimufwishila nkalakasho?

• Su kwi Efile mukulu sha bukome booso, bwakinyi takwete kulama bantu bebuwa ku myanda ibubi?

• Kwi efuku dyatukashaala kushi malwa na mpombo?

Bwa kwaluula ino nkonko, tubande kupusha lwaluulo ku ino nkonko ibidi ikata: Bwakinyi myanda ibubi ikwete kufwila bantu booso, na nkinyi akikyebe kukita Efile Mukulu.