MIISAMBO YA BANGILO
Batemwe ba Yehowa mbantu kinyi?
“Nauku Mike munda mwa bipwa bibungi. Nyi ngumune a ku Batemwe ba Yehowa. Kadi lulangwilo lwabo alunkemeshaa ngofu. Yehowa nnanyi? Bwakinyi Batemwe tabasankilaa mafuku a ma feete? Mike mbamulubishe mu lulangwilo su?”—Becky, a mu Californie mu États-Unis.
“Pabaabangile beena mutumba naami kulonga Bible na Batemwe ba Yehowa, naadi neyipusha’shi: ‘Dyadya eshina dya bu Batemwe ba Yehowa adipushisha kinyi? Nyi eshina dilekeene na bingi bipwilo byooso!’”—Zenon, a mu Ontario mu Canada.
“Ami na mukash’ande tubaadi atunangusheena’shi Batemwe ba Yehowa abafikaa mu kwitutembela bwa kwitukatusha moo mwanda tatwendaa mu kipwilo. Tubaadi atumono’shi, su bipwilo bya ba nkambwa ta bi na myanda yatukimbanga, kasaka bu ka Batemwe ba Yehowa ta nkalombeene kwikala na myanda yatukimbi nya.”—Kent, a mu Washington mu États-Unis.
“Tshinaadi nauku kalolo byabadi beekale na myanda yabalongyesha nya.”—Cecilie, a mu Esbjerg mu Danemark.
Tobopwile kwibamona kwabalungula mukandu wibuwa ku nshibo na nshibo sunga mu ma mbalo e bantu bebungi, abaabila mikanda ayisambila Bible, na kulonga Bible na bantu buntu. We kwikala mupwe kupeta mukanda kwi umune a kwabadi. Na dingi we kwiyipusha’shi: Batemwe ba Yehowa mbantu kinyi? Pangi onangusheena mu mushindo umune na bano be kunundu.
Su weyipushaa yaaya nkonko, we kukimba myaluulo kunyi? We kulonga naminyi bwa kuuka myanda ayikumiinaa Batemwe ba Yehowa, byabapetaa makuta a kufubisha midimo yaabo na bwakinyi abafikaa ku nshibo yoobe na kwisamba noobe mu ma mbalo e bantu bebungi?
Cecilie atubesambila kunundu akula’shi: “Ne mubadikye myanda ibungi pabitale Batemwe ba Yehowa ku Internet. Nemupushe bantu abebakula myanda ibubi, na kwibamba’shi be na ntondo. Nyi bwakinyi naadi mupete binangu bibubi ngofu pabitale Batemwe ba Yehowa.” Anka, kunyima baadi mutentekyeshe na Batemwe ba Yehowa, aye nkupeta myaluulo ibuwa ku nkonko yaaye yooso.
Okumiina kupeta myaluulo y’eyendo ku nkonko yoobe pabitale Batemwe ba Yehowa su? Atukunyingisha bwa kwipusha kwi bantu balombeene kukwaluula kalolo—Batemwe ba Yehowa abo banabeene, batuushe uno jurnale. (Myeele 14:15) Atukulupila’shi ino miisambo ayilondo ayikukwasha bwa kushinguula’shi twi bantu kinyi na myanda yatukuminaa na bwa kupusha kalolo mudimo watukwete kukita.