MU BINTU BYETU BYA KALA

Tubakatukile “na katshintshi na kifulo mu mashimba eetu kukila bibatudi kumpala”

MU MWESHI wa kitema mu kipwa kya 1922, mu dya Katano kunamashika, bantu 8 000 abadi bebungye mu nshibo ya bikongeno abapushishe kibobo kikwete kwenda na kukaamina. Mukunkushi a kipindji kya kikongeno balungwile bantu’shi mu kino kipindji ki na muulo, muntu ooso e na bulungantu bwa kutuuka, anka muntu su ngumune te na matalwa a kutwela dingi nya.

Lono lubabayimbile ku mbangilo lubadi na mutwe wa mwanda awamba’shi: “Tumbishayi mudimo,” kunyima mukwetu Joseph F. Rutherford bayimene ku kyakwilo. Bantu bebungi abadi abeyipusha nkonko munda mwabo. Bantu bapeela abadi abele binangu ku kibobo. Muntu badi ku kyakwilo bebalungwile bwabadya kushala mu ma mbalo aabo na kuteemesha. Nsaa ibabangile mwisambo, kwi muntu su ngumune bamwene kilamba kikata kibadi kipudikye kwiyilu kunundu kwa mutwe wa muntu badi eele mwisambo su?

Mwisambo wa mukwetu Rutherford ubadi na mutwe wa mwanda awamba’shi: “Bufumu bwa mwiyilu tabudi pepi.” Munda mwa nsaa mushima na kipindji eyi dyaye dibadi adipushika bibukopo mu nshibo ya kikongeno na badi apatuula mushindo ubabadi baleshe kufika kwa Bufumu mu matemuki a kala. Pepi na ku nfudilo kwa mwisambo waye, bayipwishe bantu’shi, “Anukumina’shi Nfumu sha ntumbo mmupwe kubanga kumunana su?” Bantu boso abalulwile n’eyi di bukopo’shi: “Oolo!”

Kunyima mukwetu Rutherford bakwile n’eyi di bukopo’shi: “Byabya, alukilayi mwifuba, anwe bana b’Efile Mukulu sha bukome booso! Talayi, Nfumu kwete kumunana! Anwe nwi bantu baye. Byabya, lungulayi, lungulayi, lungulayi.”

Mu yaya nsaa, kilamba kibabadi bafungye mufungofungo kibafungulukile musango umune, kwanka, kubadi kufunde uno mwaku: “Lungulayi mukandu wa Nfumu na Bufumu bwaaye.”

Ray Bopp atentekyesha’shi, “Bantu abadi na muloo wibungi na abakemene ngofu.” Anna Gardner badi muleshe kipaso “kibabadi beele nkasa.” Fred Twarosh akula’shi: “Bantu boso abadi mwanka abebwele bwimane.” Evangelos Scouffas bambile’shi, “Bibadi nka bu bukome kampanda bubadi bwitukakye pa mbalo ibatudi bashale, atwe nkwimana bwimane mpa na mpolo ibetutuukile mu meeso.”

Bantu bebungi abadi ku kino kikongeno abadi abalungula mukandu wibuwa wa Bufumu kumpala. Anka, binobino abapushishe bu’shi abebatakula mu kukita bibungi. Ethel Bennecoff badi mwakule’shi balongi ba Bible abayiile “Na katshintshi na kifulo kibungi mu mashimba [aabo] kukila bibabadi kumpala.” Odessa Tuck, badi na bipwa 18 mu aa mafuku, bakatukile ku kikongeno na kitshibilo kya kwalula ku lukonko lwa’shi “Nnaanyi andy’a kutuma?” Balulwile’shi: “Ntshinadi nauku mbalo, kipaso sunga kintu nya. Kintu kinadi nauku mpenda’shi nadi nakumina kulonda kileshesho kya Yeeshaya, bambile’shi: ‘Nnaami uno, ntume!’” (Yeeshaya 6:8) Ralph Leffler bambile’shi: “Dino efuku dikata, dibadi mbangilo a kampanye ka kulungula mukandu wa Bufumu upwe kupalakana mu nsenga ishima lelo uno.”

Ngi bwakinyi kino kikongeno kya mu kipwa kya 1922 kibatwelele mu Cedar Point, Ohio, nkikale bu kikongeno kikata na kyende nkumo mu myanda ya mwilo w’Efile Mukulu! George Gangas bambile’shi, “Kino kikongeno kibampeele binangu bya kupela kupisha ku kikongeno su nkimune.” Kunyima kwa bipwa bibungi, badi atentekyesha’shi ta mukishe kikongeno su nkimune. Julia Wilcox bafundile’shi: “Ntshi bya kwakula muloo unadi napusha nsaa yoso yabatemuna kikongeno kya mu kipwa kya 1922 kibakitshikile mu Cedar Point mu mikanda yetu. Nsaa yoso nakuminaa kwakula’shi, ‘Bofwambuka, Yehowa, p’obe kukumina’shi ntwele mu kino kikongeno.’”

Mu mushindo umune, bebungi ba kwatudi lelo uno abapushaa muloo wi bino nsaa yabatentekyesha kikongeno kibadi kisankishe mashimba aabo na kibadi kibape katshintshi na kifulo bwa Efile Mukulu na Nfumu aadi mutuule. Nsaa yatunangushena ku ino myanda, ayitutakula n’atwe namu bwa kwakula’shi, “Bofwambuka, Yehowa, p’obe kukumina’shi ntwele mu kino kikongeno.”

Abapetele lwaluulo ku luteko lwabo

Arthur na Nellie Claus abafikile kumpala kwa nsaa bwabadya kupeta mbalo ibuwa ya kushala. Arthur bambile’shi: “Nadi nakyebe kupusha kishima kyooso kibabadi abakula.” Mususa umune kiishi kibabangile kumusuma. Sunga mbibadi takumina, batuukile pasha kushii lukulupilo lwa kwalukila mu nshibo. Ungi mukwetu badi apa bantu ma mbalo bamwipwishe’shi, “Bwakinyi otuku pasha ino nsaa?” Arthur bapushishe’shi abitungu nka atukye.

Pa kwalukila, Arthur bapushishe bantu be munda mwa nshibo abeele nkasa bibukopo. Bu bibadi akimbi mbalo yadya kumona abikitshika munda, bamwene mbalo yadi mulombene kukaamina mu kisasa, pa mbalo i bula bwa metre 4 na kipindji. Pabakamine mwanka bamwene’shi abitungu ende kumpala kapindji pa mbalo i mwasa yadi mulombene kumona bi munda.

Arthur basangene bakwetu balume bebungi abadi bakalakashwe mu binangu na abadi abatala muntu badi eele mwisambo. Abadi bebalungule bwabadya kutshiba myoshi ibungi musango umune bwa kufunguula kilamba kibabadi banyengye mufungofungo. Anka bwabadya kutshiba myoshi pamune, abadi na lukalo lwa kupeta kangi kapete. Arthur badi na kangi kapete ke maashi su? Oolo. Uno mwanda ubadi wibasangashe ngofu. Arthur na bangi abayimene pa ma mbalo na kutengyela nsaa yabebalungula bwa kutshiba myoshi. Nsaa ibakwile mukwetu Rutherford bwa musango wa kabidi’shi “Lungulayi!”, abatshibile myoshi musango umune.

Bantu abadi bemwene na meso aabo, abadi baleshe mushindo ubadi ufungulukye mufungofungo wa kilamba kila, kibadi na mifunda isatu. Pankatshi pabadi kifwatulo kya Yesu.

Kunyima, bano bakwetu abalungwile Arthur’shi, abekalanga bakamine ku kisasa na kikamino akupu abekikatusha. Tababadi na mushindo wa kuteka bukwashi nya, ngi bwakinyi abadi abatekye Yehowa bwa’shi atume mukwetu mulume e na kapete. Bano bakwetu abadi bashinkamishe’shi Yehowa baluula ku luteko lwabo mu kipaso kya kukaanya.