Milayilo ayikalombana binyibinyi
Mukandu wibuwa wa Bufumu bw’Efile Mukulu ukwete kulungulwa mu nsenga ishima, nka bibatemukile Yesu. (Mateo 24:14) Mukanda wa mu Bible wa Ndanyele awitulungula’shi buno Bufumu nyi mbulamatadi a Efile Mukulu. Shapitre a 2 a uno mukanda umune e na matemuki aalesha kwilendona kwa angi ma mbulamatadi a bana ba bantu, sunga mafumu, kubanga ku Babilone na ku ano mafuku eetu. Verse a 44, (EEM) atemuka myanda aayifiki kumpala’shi:
“Efile e mwiyilu akatûlu bungi Bufumu, bushy’abukalwishibwa. Bwabwa Bufumu tabukapono mu mâsa a ungi mwilo, ooo. Abukafingakasha na kufudîsha mafumu, anka pend’abo nyi abukekadidîla ikalayika.”
Buno butemuki na angi matemuki a mu Bible aalesha’shi Bufumu bw’Efile Mukulu abukapyana mafumu oso a bantu na kutwadila bantu kufukama pa nsenga. Nshalelo akekala naminyi mu Bufumu bw’Efile Mukulu? Banda kutala ino milayilo ya kukaanya ayikalombana binobino.
NGOSHI TAYIKEKALA KWANKA DIMO
Misambo 46:10: “[Efile Mukulu] emika ngoshi nyaa na kufudiile nsenga, atshokola buta, asooso milumbu, ashiiki matempu mu kaalo.”
Banda kunangushena abikekala pa nsenga su makuta na bintu byabakwete kufuba nabyo bwa kupwa ma mputu bafuba nabyo bwa kupwa bintu abikwasha bantu pamutwe pa kwibayipaa! Uno mulayilo aukalombana mu Bufumu bw’Efile Mukulu.
MIKUMBO TAYIKEKALA KWANKA DIMO
Yeeshaya 33:24: “[Muntu] sunga umune tamba dimo’shi ‘ne na mukumbo.’”
Banda kunangushena abikekala pa nsenga apakekala muntu su ngumune takumbu maladi a eshimba, maladi a cancer, malaria, sunga ungi mukumbo ooso. Takukekala dingi lukalo lwa mpitaalo na manga nya. Bantu abakekala pa nsenga, abakekala na mbidi ipwidikye.
TAKUKUTSHIKWA BIDIBWA DIMO
Misambo 72:16: ‘Akwikala [pa nsenga], dingi mpaa na ku nsongw’a myengye, mafuba mpese yooso, bikunwanga bitangale.’
Nsenga ayikatusha na bya kudya bibungi bwa muntu oso, na bantu boso abakekala na mushindo wa kwibipeta. Bipupa bya nsala na mikumbo ya kubuubuka tayikekala kwanka dimo.
TAKUKEKALA DIMO MIKUMBO, TWINYONGOSHI, NA LUFU
Kibafumbwilwe 21:4: “[Efile Mukulu] akumuna mpolo yoso ku meso aabo. Lufu talwikala kwanka dimo. Taakwikala dimo sunga maalo, sunga kwidila, sunga mukumbo, mwanda bya pano bya kala bibashimina.”
Bino abipushisha’shi bantu abakekala na muwa ushi na nfudilo na upwidikye mu mpaladiso pa nsenga! Ino ngi myanda yabadi betulee kwi Mupangi eetu, sha kifulu Yehowa Efile Mukulu.
‘ADIKAKUMBASHA KINADI MWIDITUMINE’
Opusha ino milayilo bu ikilekile buwa ishi bya kulombana su? Sunga byekala’shi bantu bebungi abakumina kupeta nshalelo abadi baleshe mu Bible, anka bwa tubingilo twilekene, bebungi abamono’shi bi bukopo bwa’shi bantu bekale na muwa wa ikalaika. Bino tabitukemesha nya, mwanda ta kwi muntu su ngumune pano pa nsenga mupwe kupeta nshelelo e bino bwadya kwitulungula byadi nya.
Bantu boso mbakwatshibwe mu bupika bwa mulwisho na lufu na bakwete kufumankana na nkalakashi ibungi, makyenga, na bu ntomboshi munda mwa mafuku ebungi, ngi bwakinyi bantu bebungi mbafikye mu kumona’shi abetupangile bwatudya kwikala na uno nshalelo atudi naye. Anka bino mbilekene ngofu na mpàngo ya Mupangi eetu, Yehowa Efile Mukulu bwa bantu.
Bwa kwitukwasha bwatudya kushinkamisha’shi milayilo yaye yoso ngya binyibinyi, Efile Mukulu badi mwakule na kushimika pabitale eyi dyaye’shi: “Tadii kwalukila kwandji kushii kipeta, kushii kukita kindongamine na kukumbasha kinaadi mwiditumine.”—Yeeshaya 55:11.
Mu Bible abayitanyina Yehowa bu Efile Mukulu “shadimbanaa.” (Tite 1:2) Bu byadi mwitulee ino myanda yoso i buwa mu mafuku aafiki, twi balombene kwiyipusha’shi: Bantu mbalombene kwikala binyibinyi na muwa wa ikalaika mu Mpaladiso abadi betulee pa nsenga su? Abitungu tukite kinyi bwa nkapeta myabi ya ku uno mulayilo w’Efile Mukulu? Mu masaki a uno mukanda aalondo, okapete myanda ibuwa ilombene nkukwasha bwa kwaluula ku ino nkonko.