Nnanyi Nfumu a Bufumu bw’Efile Mukulu?

• Musangudibwe n’Efile Mukulu. ‘Ami nyi batuulu . . . yawa nfumu andji musangule. . . Nakakupa miilo yooso bu yobe yobe, matalwa oobe aekekala pano pa nsenga pooso.’​—Misambo 2:6, 8, Ñono na malango.

• Kekulu ka Nfumu Daavide. “Babeetutandjila mwana, tubaapeebwa mwana. . . Akwikala bufumu bwande mbalo yooso, na butaale bushii mpwilo bwa lupuna-nsulu lwa Daavide naa bwa bufumu bwaye; eebutuulu, dingi eebunyingishe.”​—Yeeshaya 9:6, 7.

• Mutandjikilwe mu Beteleeme. “Obe naamu, Beteleeme  . . . koodi akutukila e na kya kuludika [kumunana] . . . Mwanda eekala mukata mpaa na ku mikalo ya nsenga.”​—Mika 5:2, 4.

• Babadi bamupele kwi bantu na abo nkumwipaa. “Badi mubendjibwe, ta twi bamwate na kinêmo. . . . Batapilwe’nka pa mwanda wa kusôla kwetu, batwilwe mponyo pa mwanda wa bubi bwetu.”​—Yeeshaya 53:3, 5, EEM.

• Basangukile ku lufu na aye nkupeta ntumbo. “Twe kunsumbusheena [mu Mashaama]. Sunga kuleka mukulamate aalaala mu bwina. . . . Ku ilume yoobe, kwi miloo ishii mpwilo.”​—Misambo 16:10, 11.

Yesu Kidishitu nyi mwikale bu Nfumu mulombene

Mu bantu batababapwile kwikala pa nsenga, nka penda muntu umune nyi mulombashe ino myanda bwa kwikala Mukunkushi mulombene; yawa muntu nyi Yesu Kidishitu. Nyi bwakinyi mwikeeyilu balungwile Maadiya nyin’aye na Yesu’shi: ‘Mfumu Efile Mukulu amupa lupuna-nsulu lwa Daavide nshaye-kulu, . . . na bufumu bwaye taabwikala na mpwilo.’​—Luka 1:31-33.

Yesu tabandjile kumunana pa nsenga nya. Anka, akamunu bantu kukatukila mwiyilu bu Nfumu a Bufumu bw’Efile Mukulu. Nkinyi akimwikasha bu Nfumu mulombene? Banda kutala myanda ibakitshine pabadi pa nsenga.

• Yesu badi apasukila bantu. Yesu bakwashile balume na bakashi, ba nsongwa na banunu, kushii kutala kabila sunga bitenta byabo. (Mateo 9:36; Maako 10:16) Pabadi muntu sha nsudi mumutekye’shi: “Su okumiina we mulombeene kumpaasha,” lusa lubadi lutakule Yesu bwa kumupaasha.​—Maako 1:40-42.

• Yesu mmwitulongyeshe bya kusankisha Efile Mukulu. Bambile’shi: “Tanwi balombene kufubila Efile Mukulu na nfwalanga.” Bambile dingi’shi abitungu tukitshine bangi myanda mu kipaso kyatukumiina’shi betukitshine namu, mmwiya ubafikile mu kwitaminyibwa bu Mwiya ukile buwa. Kukatusha byabya, badi muleshe’shi Efile Mukulu t’asangalaa penda na byatukitshi, kadi mpa na byatunangushena na byatupusha. Nyi bwakinyi, bwa kusangasha Efile Mukulu, abitungu tutaluule byatupushaa mu mashimba eetu. (Mateo 5:28; 6:24; 7:12) Yesu badi mushimikye kasele’shi bwatudya kwikala na muloo wa binyibinyi, abitungu tulongye bwa kukita byabya abikumiina Efile Mukulu na dingi twibifubile.​—Luka 11:28.

• Yesu badi mulongyeshe akipushisha kufula bangi. Mayi na bikitshino bya Yesu bibadi na bukome bwa kukuma bantu babadi abamuteemesha ku mashimba. “Bantu babadi na kukaanya kukata bwa kulambukisha kwaye; mwanda badi eebalambukisha bu muntu ee na matalwa.” (Mateo 7:28, 29) Badi mwibalongyeshe shi: “Fulaayi beshikwanyi neenu.” Mpaa na nsaa ibadi ku mutshi wa makyenga, batekyele’shi: “Yaaya, ebafwile lusa, mwanda taabawuku kyabakitshi.”​—Mateo 5:44; Luka 23:34.

Yesu badi na ngikashi ipwidikye bwa kwikala Mukunkushi mulombane a nsenga akwasha bantu na e na kalolo. Kadi nsaa kinyi ya kabanga ku kunkusha?