Mushindo wituleshe Efile Mukulu milayilo yaaye ya kifulo

Kasha apanga bantu, Mupangi eetu baadi esamba nabo ku bukwashi bwa ba miikeyilu na batemuki. Kukatusha byabya, badi mukumiine kufundjisha eyi dyaye na myabi yadi mulee. Ino milayilo y’Efile Mukulu ayikakukwasha mu mafuku e kumpala. Kadi kwikunyi koodya kupeta milayilo y’Efile Mukulu lelo uno?

Mukandu w’Efile Mukulu wi mu Bifundwe Biselele. (2 Timote 3:16) Efile Mukulu badi mufubishe batemuki bwa kufunda uno mukandu naminyi? (2 Mpyeele 1:21) Efile Mukulu badi mwele binangu byaye mwi bantu abafundjile eyi dyaye. Bi mumune na lelo uno. Su mukata a mudimo alungula mufundji aaye bwa kumufundjila mwanda kapanda, atushingulaa’shi wawa mukandu ubakatukila’nka kwi mukata a mudimo. Mu kipaso kimune, sunga byekala’shi Efile Mukulu badi mufubishe bantu bwa kufunda mukandu waye, aye nabeene nyi mwikale Nsulo a Bifundwe biselele.

EYI DY’EFILE DI KWANKA BWA BANTU BOOSO

Bu byabidi’shi mukandu w’Efile Mukulu wi na muulo ukata, akumiina’shi bantu beubadikye na kwiupusha. Lelo uno, “mukandu wibuwa wa looso” ngupalakane kwi bantu ba mu ‘maumbo ooso, bisamba, mwakulo na miilo yooso.’ (Kibafumbwilwe 14:6) Ku bukwashi bwa mwabi w’Efile Mukulu, Bifundwe Biselele bi kwanka mu bushima sunga bipindji mu ndjimi ikile pa 3 000, kukila ingi mikanda yooso pano pa nsenga.