Mbala-mashinda

Atufubisha bukome buetu kalolo, patuifundila bipatshila bia kukita bibungi mu mudimo wa Yehowa. (1Kod 9:26) Kumpala kuashi nfudilo a uno ndumbuluilo afikie, bipatshila abitukuasha buatudia kufubisha nsaa yetu kalolo. (Ef 5:15, 16) Mu lulanguilo luenu lua mu kifuko, nuikuisambila pabitale bipatshila bianudia kuifundila mu kipua kia mudimo akifiki. Mu uno programe aabo a bisangilo bia buina kidishitu na mudimo wetu, mui miisambo ibungi pabitale bipatshila bianudia kuifundila, nui kunagushena na kuteka bua bianka.​—Shak 1:5.

Bu kileshesho, bena kifuko be kukuasha sunga muntu umune buashi afikie mbala-mashinda a mieshi yoso su? Su omono’shi tobesha kulombasha nsaa itekibue, wekuisamba na ba mbala-mashinda bena mianda i mumune na yobe. (Nki 15:22) Pangi, wekuela mbala-mashinda nkonko nsaa ya lulanguilo luenu lua mu kifuko. Biabia su kui mushindo funda programe aabo e nkukuasha p’esaki. Su bodi mbala-mashinda bipua bishaale, taluula mianda ya nkukuasha bodia kuibuikala dingi binobino.

Muntu amu kifunko kienu mulombene kufuba bu mbala-mashinda mukuashi bua mueshi umune sunga bua mieshi ibungi su? Su tuena bukome bui bungi, wemulombene kufuba bu mbala-mashinda mukuashi pa kukisha nsaa ipela efuku dioso mu bulungundi. Su totukaa mu bulungundi munkatshi mua lubingo muanda’shi ofubaa efuku dioso, sunga’shi wendaa mu kalasa, wekusangula mueshi wi misangelo sunga wina mbingo itano. Ku kalandrie kenu, elayi katunduilo pa mueshi w’anukumina kubanga bu mbala-mashinda mukuashi, na nukite programe enu.​—Nki 21:5.

LESHA VIDEO AMBA’SHI IKALA N’ESHIMBA DINYINGYE . . . MBALA-MASHINDA, AKUPU NUALULE KU LUNO LUKONKO ALULONDO:

• Muanda wa mukuetu mukashi Aamand, awitulongiesha kinyi pabitale kifulo kia Yehowa na bia pasukilaa boso abepana mu mudimo wa bu mbala-mashinda?