Kiodia kukita bua kuikala na muwa mu nsenga ipia

Miisambo ibashala ibalesha’shi Efile Mukulu akafudisha binobino uno ndumbuluilo e bubi na mianda yoso ayikalakasha bantu. Tui bashinkamishe’shi bino abikalombana. Buakinyi? Muanda Eyi di’Efile Mukulu Bible ndilee’shi:

“Nsenga . . . ayikidi.”—1 YOWANO 2:17, Kilombeno kipya 2014.

Tui kuikala bashinkamishe’shi akukekala bantu abakapanda, muanda uno verse a mu Bible atubatemuna kunundu alaa dingi’shi:

‘Yawa namu akitshi kikyebe ki’eshimba di’Efile Mukulu ashadidiila bua looso.’

Biabia bua kupanda, abitungu kukita kikiebe ki’eshimba di’Efile Mukulu. Buatudia kukita kikiebe ki’eshimba di’Efile Mukulu, abitungu tubadile kulonga bua kumuiwuka.

‘LONGA BUA KUUKA’ EFILE MUKULU BUA KUPANDA KU NFUDILO

Bifuatulo bisangie: 1. Munganga mushale ku lupitalo mmukokie na mukalakashue. 2. Kuete kuikisha pa mbalo ya kutomena kafe na bamono muina mudimo naye e na muloo kuabadika jurnale. 3. Muina mudimo naye amubadikila verse a mu Bible na bamupa karte ka jw.org.

Yesu bakuile’shi: “Muwa wa looso namu ngi’shi bantu bakuwukye, obe buupenka Efile Mukulu a biinyibiinyi.” (Yowano 17:3) Biabia bua kupanda ku nfudilo a uno ndumbuluilo na kuikala na muwa losoo, abitungu ‘tulongie bua kuuka’ Efile Mukulu. Bino tabilesha penda kuuka’shi Efile Mukulu e kuanka, sunga kuuka penda mianda ipela pabimutale. Abitungu tuikale naye mu bukuku. Bua kunyingisha kipuano kietu na muntu, abitungu tukishe naye nsaa i bungi pamune. Bua kunyingisha kipuano kietu n’Efile Mukulu, abitungu tukite namu’nka biabia. Talula bia binyibinyi bi na muulo biatulongo mu Bible abitukuasha bua kutamisha na kulama kiakia kipuano kietu n’Efile Mukulu.

Bia binyibinyi biatulongo mu Bible

Atulongo’shi Efile Mukulu akumina’shi tuikale na muwa mu Mpaladiso.

Bapangile bantu ba kumpala, Adame na Eeve, aye nkuibatula mu mbalo i buwa bukile y’abetanyina bu lupango lua Edene. Babadi bantu bapuidikie, n’Efile Mukulu badi muibape bintu bioso bibabadi nabio lukalo bua kuikala na nshalelo a muloo. Babadi na kia kuikala na muwa bua losoo. Su babadi bashale mu bukuku n’Efile Mukulu, tababadia kufua nya. Anka, babasanguile bua kupela kukokiela muiya upelepele ubadi Efile Mukulu muibelele.

Atulongo buakinyi tukuete kukienga lelo uno.

P’aye kukutua kukokiela Efile Mukulu, Adame muntu a kumpala badi mushimishe mushindo wadia kuikala na muwa bua losoo, buaye nabene na bua bantu boso. Bible apatuula’shi: ‘Milwisho ibatwelele pa nsenga pa mwanda wa muntu umune Adame, yaya milwisho yafwisha lufu. Byabya lufu alukwata bantu boso.’ (Bena-Looma 5:12, EEM) Nka bu bilombene muntu kupeta mukumbo wa luambu kui baledi baye, bana boso ba Adame mbapiane kukutua kua kupuidika kuadi. Nyi buakinyi tukuete kununupa na kufua.

Atulongo bipue kukita Efile Mukulu bua kuitupasha.

Bible akula’shi: ‘Mwanda Efile Mukulu mmufule baa pano bikile, mu kipaso kiadi mupaane Mwan’aye eeleka bwa’shi muntu ooso alesha lukumiino mwadi taashiminanga, anka aikale na muwa wa iikalaika.’ (Yowano 3:16) Efile Mukulu batumine Yesu pa nsenga buadia kutusha muwa waye buetu. Pabitale kino kikitshino akilesha kifulo, ungi muana mulume a mu Inde e na bipua 86 abetamina bu Prabhakar bambile’shi: “Akilesha kifulo kikata ki nakio Yehowaa buande. Kifulo kiaye nkimpe lukulupilo lua kuikala na muwa wa losoo.”

Atulongo biatudia kulesha lutumbu bua biabadi betukitshine kui Efile Mukulu.

Bible akula’shi tui kulesha lutumbu luetu bua biabadi betukitshine kui Efile Mukulu p’atue ‘kulama miiya yaaye.’ (1 Yowano 2:3) Yehowa Efile Mukulu kuete kuitulesha kiatudia kukita na kifulo kioso buatudia kuikala na muloo mu nshalelo kubanga binobino. (Yeeshaya 48:17, 18) Efile Mukulu t’akumina’shi tuikale na makienga nya. Muitulee’shi su atulondo buludiki buaye, t’atuikala penda na muloo mu nshalelo nya, atuikala dingi mpa na mushindo wa kuikala na muwa bua losoo.

BADIKA BIBLE, EYI DI’EFILE MUKULU EFUKU DIOSO

Munganga e pasha, atala muiyilu kunyima kuaye kubadi Bible mu nsaa yaye ya kuikisha. — Su okuete kuteka bukuashi bu’Efile Mukulu na kukita kikiebe ki’eshimba diaye, we kupanda ku nfudilo ya nsenga

Atudiyaa bidibua efuku dioso bua kuikala na muwa. Kadi Yesu bakuile’shi: “Muntu takeekala na muwa peenda ku mukate nya, anka ku eyi dioso adituuku kukanwa kw’Efile Mukulu.”—Mateo 4:4, Kilombeno kipya 2014.

Lelo uno, atupete eyi dia Yehowa mu Bible. Nsaa y’olongo uno mukanda wa kishila, ouku bia binyibinyi bi na muulo pabitale bibadi Efile Mukulu mukite mu mafuku a kala, biakuete kukita lelo uno na pabitale biakakitshi mu mafuku e kumpala.

SAMBILA BUA KUPETA BUKUASHI BU’EFILE MUKULU

We kukita naminyi su okumina kulonda buludiki bu’Efile Mukulu, kadi osangana’shi bi bukopo kuimika kukita mianda yamono’shi i bubi? Mu yaya nsaa, kuuka Efile Mukulu nkulombene nkukuasha bikata.

Tutale muanda wa ungi muana mukashi abetamina bu Sakura, badi na nshalelo a butesha mu muwa waye. Pababangile kulonga Bible, baukile pabitale muiya w’Efile Mukulu wa’shi “sûkai lusandji.” (1 Bena-Kodinda 6:18, EEM) Sakura batekiele bukome kui Efile Mukulu, aye nkobesha kuleka wawa muikelo wibubi. Anka badi atungunuka na kulua bua kukambila biabia bitompuanga. Amba’shi: “Su binangu bibubi bibanfikila, nafunguilaa Yehowa eshimba diande mu luteko muanda nauku’shi ntshi kuibikambila ami nabene. Bukome bua luteko mbukuashe bua kuifubuila pepi na Yehowa.” Nka bu Sakura, midiyo ya bantu bakuete kuuka Efile Mukulu. Kuete kuibapa bukome buabadi nabo lukalo bua kushintula nshalelo aabo na kuikala na nshalelo amusankisha.—Bena-Fidipe 4:13.

P’onyinsha kuuka Efile Mukulu, onyinsha ‘kuukibua [naaye]’ nka bu kuku oobe a p’eshimba. (Bena-Ngalatea 4:9; Misambo 25:14) Paapa, wekala na ngobesha ya kutuela mu nsenga ipia y’Efile Mukulu. Kadi yaya nsenga ipia ayikekala naminyi? Muisambo aulondo awibipatula.

a Yehowa nyi eshina di’Efile Mukulu bu biabadi bedileshe mu Bible.