Sunga binadi na buufu, nafikile misionere

Ne mutandikue mu 1951 mu kibundi kia Vienne, mu Autriche. Baledi bande abaadi bena Katolike. Naadi na buufu, anka naadi na lukumiino mui Efile Mukulu na naadi namutekie misusa yoso. Panaadi na bipua kitema, Papa babangile kulonga Bible na Tumonyi tua Yehowa; mafuku apeela kunyima mama namu babangile kulonga Bible.

Mu mafuku apeela, atue boso tubabangile kutuela mu kakongie ka Döbling mu Vienne. Tubaadi atukitshi mianda i bungi pamune mu kifuko. Tubaadi atubadika na kuilongiela Bible, kutuela mu bisangilo, mpa na kukuasha ku midimo ya ku bikongeno. Kubanga nka panadi bukinga, Papa baadi munkuashe bua kufula Yehowa ngofu. Nsaa yoso baadi atekie’shi ami na mukuetu mukashi tufikie ba mbala-mashinda. Anka biabia, ta nyi binaadi nakumiina kukita nya.

KUBANGA MUDIMO WA NSAA YOSO

Naadi mubatshishibue mu 1965 panaadi na bipua 14. Anka, bibaadi abingielela bukopo bua kulungula bantu banshanguuku mukandu wi buwa. Dingi, nsaa yoso naadi nepusha bu mushadile kui ben’ami, na naadi na lukalo lua’shi bankumiine namu. Biabia mafuku apeela kunyima kuʼami kubatshishibua, naadi muikuatene na ba lole bashibaadi balanguidi ba Yehowa. Sunga binaadi nakumiina kuikala nabo, kondo kande k’eshimba kabaadi akantopeka muanda naadi nakisha nsaa i bungi na bantu bashi Tumonyi tua Yehowa. Anka ntshinaadi na bukome bua kutshiba bu lole nabo. Nkinyi kibaadi kinkuashe?

Mu aa mafuku, ungi nsonguakashi e na bipua 16 abetamina bu Dorothée bafikile mu kakongie ketu. Kisumi kiaye bua bulungudi bua ku nshibo na nshibo kibaadi kinkaanyishe. Naadi mukulu aaye na bipua bipeela, anka ntshinaadi nalungula mukandu wi buwa ngofu nya. Naadi munangushene’shi: ‘Baledi bande mbekale Tumonyi tua Yehowa, anka Dorothée mu kifuko kiabo nnaye bupenka Kamonyi ka Yehowa. Mmushale na nyinaaye kuete kukumba, na endaa mu bulungudi nsaa yoso!’ Kileshesho kiaye kibaadi kintakule bua kufubila Yehowa ngofu. Mu mafuku apeela, ami na Dorothée tubafikile ba mbala-mashinda, tubabangile bu ba mbala-mashinda bakuashi, akupu atue kubanga kufuba bu ba mbala mashinda ba nsaa yoso. Pa muanda Dorothée baadi akumiina kulungula mukandu wi buwa ngofu, ami namu nabangile kufula kulungula mukandu wi buwa ngofu. Kunyima kua mafuku apeela, bibabangile kumbofuila bua kuisamba na bantu ku mashibo aabo, mu kilayi na mu angi ma mbalo.

Mu kipua kiande kia kumpala kia bu mbala-mashinda a mieshi yoso, mungi mukuetu mulume a mu Autriche abetamina bu Heinz bafikile mu kakongie ketu. Baadi mulongie bia binyibinyi mu Canada pabayile mu kutembela mukuabo mulume, baadi Kamonyi ka Yehowa. Babaadi batume Heinz bu mbala-mashinda a nsaa yoso mu kakongie ketu ka mu Vienne. Naadi mumufule nka’ye kiafiki. Anka baadi akumiina kuikala bu misionere, ami namu ntshinaadi na lukalo lua kufuba bu misionere nya. Nyi buakinyi kumpala, ntshinaadi nakumiina kumulesha’shi ne mumufule. Kunyima, ami na Heinz tubabangile kuiyilena atue nkuiyibakishena, na tuabanga kufuba bu mbala-mashinda mu Autriche.

NABANGA KUPUSHA LUKALO LUA KUIKALA BU MISIONERE

Nsaa yoso Heinz baadi andungula lukalo luaye lua kuikala bu misionere. Sunga tabaadi ankitshisha pa bukopo, baadi angiele nkonko ayintakula mu kuela binangu. Baadi angipushaʼshi: “Bu biatushi na bana, tui kukita bi bungi mu mudimo wa Yehowa su?” Naadi natshinyi kuikala bu misionere muanda naadi muntu sha buufu. Eyendo’shi naadi mbala-mashinda, anka kuikala bu misionere kubaadi bu muanda ukile bukopo kuandi. Anka, na luishinko loso, Heinz baadi andungula pabitale kuikala bu misionere. Baadi dingi munyingishe buandia kutuula binangu biande mu kukuasha bantu pamutue pa kuibituula ku moo unadi nao. Elango diaye dibaadi dinkuashe ngofu.

Kapeelakapeela, nabangile kupusha lukalo lua kuikala bu misionere, biabia atue nkuteka bua kutuela mu kalasa ka Galaade. Anka, mukuetu baadi akunkusha Filiale baadi mundungule’shi, abitungu mbande kulonga bia kuakula Anglais kalolo. Nalondele elango diaye ami nkubanga kulonga bia kuakula Anglais kalolo. Anka kunyima kua bipua bisatu, ami na Heinz abaadi betutume musango umune mu kakongie ka ludimi lua Serbo-Croate mu Salzbourg, mu Autriche. Tubafubile mu yawa terituare munda mua bingi bipua musambo, na kipua kimune tuekikisha mu mudimo wa kifunda. Ludimi luabetamina bu Serbo-Croate lubaadi bukopo biabia, anka tubaadi na balongi ba Bible be bungi.

Akupu mu 1979 bakuetu abaadi abakunkusha ku Filiale abaadi betutekie bua kuenda bua mafuku apeela mu Bulgarie. Pa muanda mudimo wa bulungudi babaadi beukandikie muanka, bakuetu babaadi betulungule’shi tukite bu abende mu kuikisha muanka. Abo nkuitulungula’shi tatukumanga kulungula mukandu wi buwa kadi tutuale tu mikanda tupeela mu bufiefie tuatudia kupa bakuetu bakashi bataano babaadi bashale mu Sofia, epata dia Bulgarie. Naadi na moo, anka Yehowa baadi munkuashe mu wawa mudimo wi buwa. Panaadi mumone eshimba dinyigie dibaadi nadio baaba bakuetu bakashi na muloo ubaabadi nao sunga mbiabaadi balombene kuibakuata na kuibela mu lukano, bibaadi binyingishe’shi, ne mulombene kukita kioso akintekie Yehowa bua kukita mu ndumbuluilo aaye.

Kunyima kua mafuku, tubatekiele dingi bua kuenda mu kalasa ka Galaade, na wawa musango abaadi bakumiine. Tubaadi bapuandikishe’shi atukatuele mu kalasa ka mu Anglais mu États-Unis. Anka mu mueshi w’Ekumi na umune mu 1981, ndumbuluilo baadi mutuule kangi kalasa ka Galaade mu Filiale a Wiesbaden mu Allemagne. Biabia tubaadi balombene kutuela mu kalasa ka mu ludimi lua Allemand lunaadi mulombene kupusha kalolo. Abaketutumu kunyi?

KUFUBA BU MISIONERE MUIUMBO DI NGOSHI

Babaadi betutume mu Kenya! Anka, biro bia Filiale a Kenya bibaadi bitutekie bua kufubila muiumbo dia Ouganda dikungishene na Kenya. Bipua ekumi kumpala, mukata a basalayi abetamina bu Idi Amin baadi muate bufumu pa bukoo na aye nkubanga kukunkusha mbulamatadi a mu Ouganda. Mu bipua bibalondele, ku bukunkushi buaye, bantu nkama babaadi bayipayibue na bantu midiyo babaadi bakiengie ngofu. Akupu mu 1979 abaadi baponeshe dingi mbulamatadi a mu Ouganda. Pangi anupusha buakinyi naadi na moo wa kuenda muiumbo di bu ntomboshi bui biabia. Anka kalasa ka Galaade kabaadi ketulumbuule bua kukulupila mui Yehowa. Biabia atue nkukumiina kuenda.

Nshalelo baadi bukopo bukile mu Ouganda. Mbulamatadi tabaadi na mushindo wa kupa bantu mema, nsembue, na bingi bintu bi na muulo. Ma telefone taabaadi aakidi. Bantu abaadi abaasa benabo ma mputu na kuiba bintu; bikishekishe bufuku. Biabia pabaadi bufuku abuidi, muntu oso baadi ashala kuaye ku nshibo akulupila mpa na kuteka’shi muntu su ngumune tafikanga mu kuiba kuaye sunga kumuipaa. Sunga mbiakubaadi luno lukalakashi, bakuetu abaadi abende kumpala mu kikudi!

Mu 1982, ami na Heinz tubafikile mu Kampala epata dia Ouganda. Munda mua mieshi itano ya kumpala, tubaadi bashale ku nshibo ya Sam Waiswa na mukashi aaye Christina pamune na bana babo batano na bakuabo ba mu kifuko bananka. Mukuetu mulume Waiswa na mukashi aaye na kifuko kiabo abaadi abadi nka dimune kuifuku, abaadi abalesha’shi be na kalolo kakata pa kuitatshisha bua kuitupa bintu biabadi nabio. Mu mafuku abaatudi bakishe pamune na kifuko kia mukuetu Waiswa, ami na Heinz tubapetele malongiesha ebungi a mu nshalelo abaadi etukuashe mu mudimo wa bu misionere. Bu kileshesho, tubalongiele bia kulama mema pa kuitumpa penda ndambo ipeela na kulama aa mema bua kuela mu nkumba. Mu 1983, ami na Heinz tubapetele yetu nshibo mu ingi mbalo ya mu Kampala ibaadi kufukama.

Tubaadi bafule kulungula mukandu wi buwa mu Kampala. Natentekiesha’shi penda mu mueshi umune tubaadi baabile ma jurnale akile pa 4 000! Anka kibaadi na muulo nkumona bibaadi bantu abakumiina bia binyibinyi. Abaadi abanemeka Efile Mukulu na kukumiina kuisamba mianda ya mu Bible. Ami na Heinz oso a kuatudi baadi na balongi ba Bible 10 sunga 15. Tuibalongie bi bungi kui balongi betu. Bu kileshesho, sunga mbibaabadi abatambuka lua ngua bua kuenda mu bisangilo ku lubingo loso, abaadi nka na muloo tababaadi abedidi nya.

Mu kipua kia 1985 na 1986, kubaadi ingi ngoshi ibidi mu Ouganda. Misusa ibungi tubaadi atumono bana bakinga mbatuale ma mputu. Babaadi bebatueshe busalayi na abataluula muntu oso akidi muishinda. Mu biabia bipua, tubaadi batekie Yehowa buadia kuitukuasha bua kuikala na binangu na kusuuka masaku nsaa yatudi mu bulungudi. Na Yehowa baadi mualuule ku nteko yetu. Misusa ibungi, moo wetu ubaadi aupu nsaa ibaatudi atufumankana na muntu akumiina kulonga pabitale Yehowa.

Tubaadi dingi na muloo wa kulongiesha bantu benyi. Bu kileshesho, tubaadi bemonene na Murat na Dilbar Ibatullin, mulume na mukashi ba mu Tatarstan (kibundi ki mu Russie Centrale) tualonga nabo Bible. Murat baadi doktere. Boso buabo abaadi babatshishibue na bakuete kufubila Yehowa na lulamato loso. Kunyima, naadi na kinemo kia kuimonena na Tatjana Vileyska, muana mukashi a mu Ukraine baadi na lukalo lua kuiyipaa. Kunyima Tatjana, aye nkualukiila mu Ukraine na akupu baadi mukuashe mu kualuula kua mikanda yetu.a

KUFUBA BU MISIONERE MU DINGI EUMBO

Mu 1991 ami na Heinz patubaadi bende mu kuikisha mu Autriche, biro bia Filiale a mu Autriche bibaadi bitufundile’shi tubapete mudimo upia: Kuenda mu kufubila mu Bulgarie. Kunyima kua kupona kua bukunkushi buabetamina bu comunisme mu Europe a kutunduka nguba, mudimo wa Tumonyi tua Yehowa abaadi beufunde ku mikanda ya mbulamatadi a mu Bulgarie. Anka bu biangakulanga kumpala, ami na Heinz tubaadi batueshe mikanda mu bufiefie mu diadia eumbo pabaabadi bakandikie mudimo wetu. Anka bua binobino mbetutume muanka mu kulungula mukandu wi buwa.

Babaadi betulungule’shi tatualukiilanga mu Ouganda. Biabia, tatubaadi balukiile mu Ouganda bua kulonga bintu sunga kuiladikishena na ba kuuku betu nya. Anka tubayile musango umune ku Betele a mu Allemagne, tuapeta motoka na, atue nkuenda mu Bulgarie. Babaadi betutume mu kisaka kia balungudi 20 mu kibundi kia Sofia.

Tubaadi bapete ingi nkalakashi ibukopo mu Bulgarie. Lua kumpala, tatubaadi atuuku ludimi luabo. Na dingi, mikanda ibaadi mu ludimi lua Bulgarie mpenda mukanda wa La vérité qui conduit à la vie éternelle na Mukanda wa mianda ya mu Bible. Na bibaadi abituikela bukopo bua kubanga kulonga Bible na bantu. Sunga kubaadi ino nkalakashi, kasaka ketu kabaadi na kisumi na kabaadi akende kumpala. Kipuilo kia ba Orthodox kibatunduile bianka na akio nkubanga kuitubingabinga.

Mu 1994 mbulamatadi baadi mushime Tumonyi tua Yehowa ku mulongo wa bipuilo, na bantu be bungi mu Bulgarie nkubanga kumona Tumonyi tua Yehowa bu kipuilo ki bubi. Abaadi bakuate bangi bakuetu mu lukano. Bisaashi bi bungi bibaadi abipalakasha mianda ya madimi pabitutale. Abaadi abambaʼshi Tumonyi tua Yehowa atutadiilaa bana babo buaʼshi bafue, muanda tʼabakumiinaa bebeela mase, naʼshi Tumonyi tua Yehowa atutakula bena Nkidishitu nabo buaʼshi bepudikie. Pa muanda wa bino, bibekeele bukopo bua kulungula mukandu wi buwa. Bantu abaadi abetukitshina mianda i bubi bu kuituela misaase ya kuitusenga, kuitamina ba mpulushi pabetumono atulungula mukandu wi buwa, mpa na kuituasa bintu. Bi baadi bukopo bua kupeta mikanda mu dino eumbo, na bibafikile bukopo bua kupeta nshibo ya kufutshila bua kukita bisangilo. Ba mpulushi abaadi mpa na bemikie kikongeno kietu kia mafuku asatu. Ami na Heinz ta tubaadi baubile mushikua wi bino. Bano bantu abadi belekene na bantu ba mu Ouganda abaadi abakumiina kulonga Bible! Nkinyi kibaadi kitukuashe bua kupela kubofula?

Tubaadi atupete muloo pa kukisha nsaa pamune na bakuetu balume na bakashi. Abaadi na muloo wa kupeta bia binyibinyi na abaadi na lutumbu muanda tubaadi panka bua kuibakuasha. Tubaadi nka pamune na tubaadi atuikuashena. Uno muanda nguitulongiesheʼshi bua kuikala na muloo mu mudimo oso wawa watupete, abitungu tuipane mu kukuashe bangi.

Anka muenda mafuku, mianda ibalumbukile. Mu 1998, mbulamatadi baadi mufunde dingi Tumonyi tua Yehowa ku mulongo wa bipuilo, na mikanda i bungi nkuikala kuanka mu ludimi lua bulgare. Akupu mu 2004 mashibo apia a Betele ababadi bebakie, abaadi bealambule kui Yehowa. Lelo uno, mu Bulgarie mui tukongie 57 tui na balungudi 2 953. Na mu kipua kia mudimo kia 2024, bantu 6 475 mbatuele mu Kitentekiesho. Kala, mu kibundi kia Sofia mu baadi penda bakuetu bakashi batano, anka lelo uno tamudi tukongie kitema! Tuibamone binyibinyi “kisaka kipeela [akifiki] kya bantu kinunu.”​—Yesh. 60:22.

TUIBAPETE NKALAKASHI YA KU MBIDI

Munda mua bipua bi bungi nemukumbe ngofu, mbakuate mpa na kintu kinguule mu mutue kiabetamina bu tumeurs. Abaadi bambukie na mayele abaadi ankiengieshe ngofu abetamina bu radiothérapie, na kunyima abaadi bambaale munda mua nsaa 12 mu Inde bua kukatusha aa ma tumeurs. Kunyima kua ku mbaala tubaadi bashale munda mua mafuku ku Betele a mu Inde, kunyima tubalukiile mu Bulagarie.

Mu aa mafuku, Heinz babangile kukumba mukumbo wi bukopo ush’aukambaa kuikala kuanka wadi mupiane kui baledi baaye wabetaminaa bu Huntington. Ubaadi aumukiengiesha ngofu bua kutambuka, kuakula, tabaadi auku nyi kia kukita. Pabaadi mukubo awende na kumuneemena, nami baadi amukitshina mianda yoso. Ingi nsaa nadi nepusha bu mianda ibankidila na nadi nenyongola muanda mianda ibaadi nka ayiluila. Kadi kubaadi ungi mukuetu nsongua abetamina bu Bobi baadi afiki mukuata Heinz pa kiubishi bua kuende naye mu bulungudi. Bobi ta baadi ekakalasha pabitale mushindo ulombene kunangushena bantu pabamono Heinz biash’akula kalolo sunga biʼasanyisha mbidi na mikoolo yaye. Bobi baadi kuanka bua kunkuasha misusa yoso, nsaa ishinaadi na mushindo wa kukitshina Heinz kintu kampanda. Ami na mulum’ande Heinz tubaadi bate kitshibilo kia kupela kutanda bana mu uno ndumbuluilo, kadi tubaadi bepushe’shi Yehowa betupa Bobi bu muan’etu mulume!​—Mak. 10:29, 30.

Heinz baadi akalakashua dingi na cancer. Muanda wa malua, mulum’ande bafuile mu 2015. Pabafuile mulum’ande Heinz nadi mukalakashue ngofu. Muanda naye baadi ankuasha ngofu, nadi namono’shi nami namu tandi nafu. Anka, mu binangu muande, kinka na muwa! (Luk. 20:38) Efuku dioso nanangushenaa ku mayi a kalolo abaadi andungula na ku malango abaadi ampa. Ne na lutumbu lukata kui Yehowa bu biatudi bamufubile pamune munda mua bipua bi bungi.

NATUMBULA YEHOWA BUA BUKUASHI BUAYE

Yehowa munkuashe mu nkalakashi yande yoso yandi mupete. Dingi, munkuashe bua kuikala misionere mufule bantu sunga biandi na buufu. (2 Ti. 1:7) Ku bukuashi bua Yehowa, ami na muinʼande mukashi tui mu mudimo wa nsaa yoso. Lelo uno, aye na mulume aaye, bakuete kufuba mu mudimo wa kifunda, abakunku tukongie toso tua ludimi lua Serbe mu Europe mushima. Yehowa mualuule nteko ya Papa ibaadi eele pabatudi bakinga.

Kuilongiela kua Bible akumpaa butaale. Nemulongie dingi bia ‘kuteka ngofu’ mu nkalakashi nka bu bibaadi abikitshi Yesu. (Luk. 22:44) Yehowa kuete kualuula nteko yande kukiila ku kifulo na kalolo ka bakuetu ba mu kakongie ketu ka Nadejda, mu kibundi kia Sofia. Ku nsaa na nsaa abangitaminaa bua kukisha nabo nsaa pamune, na kundungulaʼshi banfule. Bino abimpeyaa muloo wi bungi.

Nsaa yoso nanangushenaa pabitale lusangukilo. Mu binangu biande namonaa kifuko kiande kioso mu Mpaladiso. Namonaa baledi bande ba nsongua nka bu muifuku diabo diʼeyibakishi. Namonaa mukuetu mukashi ateekie bia kudia. Namonaa Heinz muimane pepi na mpunda aaye. Kunangushena bino akunkuashaa bua kukatusha binangu bi bubi na kumpa muloo wa kutungunuka na kunyingiila na abintakulaa bua kulesha Yehowa lutumbu.

Panangushena pabitale nshalelo aande, na pabitale mafuku aafiki, nepusha nka bu Davide, bafundile mayi e mu Misambo 27:13, 14: “Nkunyi kunadia kuikala su ntangikalanga na lukumiinoʼshi nakamono kalolo ka Yehowa muiwumbo dia bantu be na muwa? Kulupila kui Yehowa; ikala na bukome onyingiʼeshimba; kulupilaʼnka kui Yehowa.”