Nkonko ya bantu ababadikaa

Mudimo wa bulungudi aukapu efuku kinyi?

Yesu bakuileʼshi: “Na uno mukandu wibuwa wa Bufumu aukalungulua pa nsenga yoso ishadibue bua’shi wikale bukamonyi kui miilo yoso, akupu nfudiilo ayikafiki.” (Mat. 24:14) Kishima kia mu kina Greke kiabadi baluule bu “nfudiilo” mu uno verse, na mu verse 6 na 13, nyi kishima telos. Kino kishima akilesha nfudiilo a uno ndumbuluilo a Satana ku Armagedone. (Kbf. 16:14, 16) Biabia, atutungunuka na kulungula mukandu wi buwa mpa na kumpala kua Armagedone. Bino bibashintuula mpushisho atuikalanga naye kumpala.

Kumpala tubaadi atuamba’shi, atukemika kulungula mukandu wi buwa apakabanga mpombo ikata na kabutu ka Babilone mukata. (Kbf. 17:3, 5, 15, 16) Tubaadi atuamba’shi, apakabanga mpombo ikata, Yehowa takapa dingi bantu mushindo wa kukumiina mukandu wi buwa. (Yesh. 61:2) Tubaadi atupuandikisha dingi’shi, bantu abakapanda ku mpombo ikata nyi baaba abaadi bapue kufubila Yehowa na lulamato kumpala kuaʼshi mpombo ikata ibangie. Tubaadi atuibapuandikisha na bena Yunda abaadi bapande ku kabutu ka Yelusalema mu 607 K.B.B. Bano bantu abaadi bedibue kitunduilo bua kupaashibua muanda abaadi abalanguila Yehowa na abaadi bashikue bubi. (Ez. 5:11; 9:4) Anka, kupuandikisha bantu abakapanda ku mpombo ikata na bena Yunda ta kuipushene na mayi a Yesu e mu Mateo 24:14, aaleshaʼshi bantu abakekala na mushindo wa kukumiina mukandu wi buwa kumpala kua nfudiilo a Armagedone.

Mpushisho eetu mupia pabitale Mateo 24:14 mmulumbule dingi mpushisho eetu pabitale mukandu wetu wi bu mabue akata a kasangu wabakuila mu Kibafumbuilue 16:21. Kutaluula kalolo nkuleshe’shi bino bifundue bibidi mbipushene. Mu mushindo kinyi? Lualuulo lui pa mushindo aukumiina bantu mukandu wa Bufumu. Mpoolo mutumibua bafundileʼshi bua “baaba abakapaashibua,” mukandu wi buwa wi bu “mapembue a muwa.” Kadi bua beshikuanyi b’Efile Mukulu, nyi mukandu wi bubi, “mapembue a lufu.” (2 Ko. 2:15, 16) Mbashikue mukandu wa Bufumu muanda aulesha patookaʼshi, uno ndumbuluilo abadi bafule e bubi, abamukunkusha kui Satana naʼshi binobino abamubutula.​—Yo. 7:7; 1 Yo. 2:17; 5:19.

Lamiina dingiʼshi, ano mabue akata a kasangu abakuila mu Kibafumbuilue 16:21, aakekala “kipupa kikile bukata.” Bino mbilombene kuleshaʼshi, mu mpombo ikata, mudimo wetu wa bulungudi aukekala na bukitshishi bui bukopo kui bantu, kuambaʼshi eshina dia Yehowa adikaukibua ngofu kukila kumpala. (Ez. 39:7) Mu aa mafuku, kunyima kua kabutu ka Babilone Mukata, bangi bantu abakakumiina mukandu wetu bu biabadi bakumiine mapembue e buwa su? Mbilombene nkekala biabia. Pangi abakatentekiesha sunga kuukaʼshi Tumonyi tua Yehowa tubaadi atulungula bantu’shi Babilone Mukata abakamubutula, na abakebimuena banabene.

Bino nyi bibakitshikile mu Ejipitu kunyima kua Bipupa Ekumi. Kunyima kua Yehowa “kutshibila bʼefile boso ba bena Ejipitu kiimu,” “kisaka kikata kia bantu” bashi bena Isalele kibaadi “kisangie” kui muilo waye. (Efi. 12:12, 37, 38) Bano bantu abaadi basangule bua kuenda na muilo wa Yehowa nsaa ibabamueneʼshi, Bipupa Ekumi bioso bibakuile Moyise bibalombene.

Muntu oso akakidi ku lupese lua Yehowa kunyima kua kabutu ka Babilone Mukata, akekala na kinemo kia kukuatshishena bakuabo na Nkidishitu abakekala pa nsenga. (Mat. 25:34-36, 40) Eyendo, mushindo wa kutshibibua kiimu bu mukooko aukapu kumpala kua Armagedone nsaa ayikapete bedibue muimu boso ba ki pa nsenga efuto diabo dia kuenda muiyilu.

Uno mpushisho mupia ashimika kasele pa kifulo kikata na lusa lua Yehowa. Binyibinyi, Yehowa “t’akumiina’shi muntu su ngumune abutudibue, anka akumiina’shi bantu boso belangie ku mashimba.”​—2 Mp. 3:9.