5 Vendos vlera të shëndosha morale

Vështirësia.

Presioni i moshatarëve në shkollë dhe morali në rënie i botës ndikojnë fuqishëm te familja. Për të mos rënë pre e këtyre ndikimeve negative, fëmijët kanë nevojë për vlera të shëndosha. Përndryshe, s’ka si të bëhen të përgjegjshëm, me parime e të edukuar.

Sugjerime.

Shumë prindër të vetëm, duke përfshirë edhe ata që cituam në artikujt e mëparshëm, kërkojnë drejtimin e Biblës, të bindur se ajo përmban mençurinë e pashoqe të Perëndisë. Për shembull, le të shohim çfarë thotë Bibla për parimin më të rëndësishëm: shfaqja e dashurisë së vërtetë.

«Dashuria është shpirtgjerë dhe mirëdashëse. Dashuria nuk është xheloze, nuk mbahet me të madh, nuk krekoset, nuk sillet në mënyrë të pahijshme, nuk kërkon interesat e veta, nuk provokohet. Ajo nuk e mban llogari të keqen. Nuk gëzon për padrejtësinë, por gëzon me të vërtetën. Mban çdo gjë, . . . shpreson çdo gjë, i qëndron çdo gjëje. Dashuria nuk shuhet kurrë.»​—1 Korintasve 13:4-8.

Kur prindërit tregojnë këtë lloj dashurie, fëmijët rriten të mbarë. Koleta e përmendur më sipër, që jeton në Francë, shkruan: «Ua përsëritja shpesh fëmijëve se i doja. Gjithashtu, u thosha se janë dhuratë nga Perëndia, prandaj duhej të kujdesesha mirë për ta. Pjesa e tyre ishte të silleshin mirë e të na respektonin mua dhe babanë e tyre [që nuk i kishte nën kujdestari]. Këto parime na ndihmuan të krijonim një atmosferë mirëbesimi e respekti në shtëpi.»​—Psalmi 127:3

Ana, që jeton në Poloni, shkruan: «Kur fëmijët kanë mosmarrëveshje, u kujtoj fjalët e Jezuit se atë që duam të na bëjnë të tjerët, duhet ta bëjmë edhe ne për ta.» (Mateu 7:12) Robertoja, i përmendur më parë, ndesh një problem të zakonshëm për shumë prindër të vetëm. Ai thotë: «Fëmijët përballen me dy standarde vlerash​—tëndin dhe të prindit tjetër. E di se, kur unë këmbëngul të zbatohen parimet e Biblës, për ta e ëma është më e mirë.» Ai shton: «Prindi tjetër mund t’u japë dhurata, që t’i bëjë për vete. Këto presione nuk janë aspak të lehta, megjithatë komunikimi i mirë me fëmijët ndihmon.»

Nuk është gjithnjë e lehtë të ndjekësh normat e Biblës, sidoqoftë mundi shpërblehet. Sara, një nënë e vetme nga Afrika e Jugut, thotë: «Jam e kënaqur që fëmijët e mi janë rritur sipas drejtimit të Jehovait. Patjetër që kemi pasur vështirësitë tona, por Perëndia na ka qëndruar gjithmonë pranë.»