Dëgjimi tejet i mprehtë i molës së madhe të hojeve

MOLA e madhe e hojeve mund t’i dëgjojë tingujt e lartë më mirë se çdo krijesë që njihet në botë. Megjithatë, veshët e saj kanë strukturë fare të thjeshtë meqë janë thuajse sa koka e një gjilpëre.

Shqyrto faktet: Dëgjimi i molës së madhe të hojeve ka qenë objekt studimi për vite me radhë. Kohët e fundit shkencëtarët në universitetin e Strathklajdit, Skoci, testuan dëgjimin e molës me një gamë të gjerë tingujsh. Ata matën dridhjet e membranave timpanale dhe regjistruan aktivitetin e nervave të dëgjimit. «Daullet e veshit» reaguan edhe kur u lëshuan tinguj me një frekuencë prej 300 kilohercësh. Në krahasim me këtë molë, lakuriqi i natës dëgjon me frekuencë 212 kiloherc, delfini 160 dhe njeriu jo më shumë se 20.

Këtë aftësi të lartë dëgjuese të molës së madhe të hojeve studiuesit do të donin ta përdornin si bazë për teknologjinë e re. Dr. Xhejms Uindmilli i universitetit të Strathklajdit shpjegon çfarë duan të bëjnë: «Mikrofona më të mirë e më të vegjël. Këta mund të vihen në një sërë aparatesh, si në celularë a pajisje dëgjimi.»

Si mendon? A erdhi me evolucion dëgjimi tejet i mprehtë i molës së madhe të hojeve? Apo është projektuar?