Ngjarja më e rëndësishme në historinë njerëzore
1 Jezui erdhi në tokë nën drejtimin e Atit të tij, për të sjellë dëshmi mbi të vërtetën që do të na çojë drejt jetës së përhershme. (Gjoni 18:37) Besnikëria e tij deri në vdekje, i solli nderim emrit të shenjtë të Perëndisë Jehova dhe siguroi shpërblerjen. (Gjoni 17:4, 6) Kjo e bëri vdekjen e Jezuit ngjarjen më të rëndësishme në të gjithë historinë e njerëzimit.
2 Që nga krijimi i Adamit, ka patur vetëm dy njerëz të përsosur që kanë jetuar mbi tokë. Adami ishte në një pozitë që mund t’u sillte bekime të mrekullueshme pasardhësve të tij ende të palindur. Në vend të kësaj, ai u rebelua në mënyrë egoiste duke i dënuar ata me një jetë të mjerueshme që do të përfundonte në vdekje. Kur erdhi në tokë, Jezui tregoi besnikëri dhe bindje të përsosur, duke u hapur mundësinë për jetën e përjetshme të gjithë atyre që ushtrojnë besim.—Gjoni 3:16; Rom. 5:12.
3 Asnjë ngjarje tjetër, nuk mund të krahasohet me vdekjen sakrifikuese të Jezuit. Ajo ndryshoi kursin e historisë njerëzore. Siguroi bazën për ringjalljen nga vdekja të miliarda njerëzve. Vuri themelin për një Mbretëri të përjetshme, që do t’i japë fund ligësisë dhe do ta kthejë tokën në një parajsë. Së fundi, do ta lirojë të gjithë njerëzimin nga çdo formë shtypjeje dhe skllavërimi.—Psal. 37:11; Vep. 24:15; Rom. 8:21, 22.
4 E gjithë kjo na ndihmon të çmojmë faktin se përse Jezui i mësoi nxënësit e vet që ta kremtojnë vdekjen e tij me ritin Përkujtimor çdo vit. (Luka 22:19) Duke e çmuar domethënien e tij, me padurim presim që të mblidhemi me kongregacionin e Dëshmitarëve të Jehovait në të gjithë botën, të premten më 14 prill, pas perëndimit të diellit. Përpara kësaj, do të ishte mirë të lexonit së bashku si një familje tregimet e Biblës mbi ditët e fundit të Jezuit në tokë dhe qëndrimin e tij të guximshëm për të vërtetën. (Fragmentet e rekomanduara janë të shënuara në Shkrimin e Ditës, nga data 9-14 prill.) Ai na la një shembull të devotshmërisë ndaj Krijuesit tonë. (1. Pjetr. 2:21) Le të bëjmë çdo gjë që mundemi për të ftuar shokët, familjen si edhe studentët tanë të Biblës bashkë me personat e tjerë të interesuar në këtë mbledhje të rëndësishme. Shpjegoju që më parë se çfarë do të ndodhë dhe domethënien e emblemave.—1. Kor. 11:23-26.
5 Pleqtë duhet të sigurohen që më parë se Salla e Mbretërisë është e rregullt dhe e pastër. Duhen marrë masat paraprake që dikush të sigurojë emblemat. Shërbimi i emblemave duhet të jetë i organizuar mirë. Do të ishte mjaft e përshtatshme për kongregacionin, që për të zgjeruar shërbimin në fushë, të organizonte aktivitete disa ditë përpara dhe pas darkës së përkujtimit.
6 Vitin e fundit, një numër prej 12.288.917 personash, ishin të pranishëm në mbarë botën për kremtimin e kësaj ngjarjeje të rëndësishme. Pasi ajo është dita më e rëndësishme në kalendarin tonë, të gjithë ne duhet të jemi të pranishëm.